Repsol YPF

Recomendacións xerais

Os gases propano e butano non son tóxicos e pesan máis que o aire, polo que teñen tendencia a acumularse en lugares baixos e non se poden utilizar nos sotos.

Son inodoros. Engádeselles un olor característico para que vostede o note inmediatamente en caso de existir unha fuga.

Todos os aparellos de consumo han de corresponder aos tipos homologados polo Ministerio de Enerxía e deberán levar nun lugar visíbel a placa do fabricante.

Onde funcione un aparello a gas, ten que haber sempre ventilación. Non se deben tapar as reixas nin colocar obxectos que impidan a correcta ventilación.

Vixíe os recipientes postos ao lume. O seu contido poderá derramarse e apagar os queimadores provocando unha fuga de gas.

Limpe periodicamente os condutos de evacuación de gases e fumes.

Unha lapa viva de cor azulada indica unha boa combustión e, polo tanto, seguridade, economía e limpeza.

Contrate exclusivamente cunha empresa instaladora de gas autorizada as reparacións e os cambios que requira a súa instalación. Solicite a súa identificación e os certificados correspondentes.

Cando se vaia ausentar durante un tempo prolongado, non esqueza pechar as chaves de paso e a xeral da vivenda. Faga revisar periodicamente os seus aparellos. Unha lapa ruidosa e inestábel indica que o aparello que a produce debe ser revisado.

A lapa con puntas vermellas ou amarelas indica unha mala combustión debido a unha deficiente regulación ou a sucidade nos queimadores. Unha mala combustión produce un gas tóxico chamado monóxido de carbono e chisna o fondo dos recipientes de cociña.

Asegúrese de que non hai materiais combustíbeis (madeiras, aceites, herbas secas, etc.) nas proximidades do depósito.

Manteña a superficie arredor do depósito nun bo estado de limpeza. Evite que as herbas invadan a zona de almacenamento.