Repsol YPF

Xeración eléctrica

Naquelas aplicacións que precisan subministración eléctrica e que non dispoñen de conexión á rede, ou ben nas que é necesaria unha xeración alternativa á subministración dende a rede para casos de emerxencia, a enerxía necesaria é producida por un grupo electróxeno, que consiste basicamente nun motor estacionario de combustión interna que move un alternador.

Os grupos electróxenos equípanse con motores alimentados con gasolina, gasóleo, gas natural ou GLP. Nós imos referirnos a estes últimos.

Pequena potencia

Cando a demanda eléctrica é moi pequena (aproximadamente ata 10 kVA), adoitan usarse grupos electróxenos con motores que utilizan gasolina como combustíbel, pero que se poden transformar para ser alimentados con gas propano, dende botellas ou depósitos;
o máis frecuente é o uso do gas envasado. Estes motores son axeitados como xeradores de emerxencia en industrias, construción, obras públicas, canteiras, agrícola, gandeira, hoteis, hospitais, discotecas, polideportivos, etc.

A adaptación dun motor de gasolina a propano implica a incorporación dos correspondentes tubos de alimentación dende o depósito ou botella de GLP ao motor, e dun equipo de vaporización. As vantaxes máis significativas do uso do propano nestes motores son:

• Mestura do propano (gaseoso) co aire máis homoxénea que a da gasolina (líquido) co aire.
  
• Combustión máis perfecta, o que supón unha ganancia de rendemento do motor e un menor consumo de calorías por kW.
  
• Redución dos depósitos de feluxe provocados por combustións imperfectas.
  
• Menor deterioración dos aceites lubricantes, xa que, con gasolina ou gasóleo, os compoñentes minerais dos combustíbeis atacan o lubricante.
  
• Mellor repartición da carga nos cilindros, mellor regularidade no par de arranque e mellor ralentí.
  
• Mellor calidade de fumes de escape fronte aos combustíbeis líquidos: reducións do 48-83% en emanacións de CO inferiores, do 30-58% en inqueimados, do 4-18% en CO2, do 10% en NOx menor e, por último, ausencia de compoñentes ácidos de xofre.    

Media-alta potencia

Para demandas eléctricas superiores a 10 kVA, e sobre todo cando é necesaria unha produción eléctrica en réxime continuo, os grupos electróxenos a GLP que se utilizan deben posuír unhas calidades semellantes aos motores diésel, a partir dos cales se transforman algúns dos motores a propano.

Este tipo de motores está indicado para pequenas industrias, establecementos de hostalaría, chalés, casas de campo, refuxios de montaña, cámpings, obras públicas, etc.
As características principais destes grupos electróxenos a propano serán:

• Robustez.
• Elevada vida útil para soportar moitas horas de funcionamento (xeralmente continuo).
• Baixo réxime de xiro (1500 r.p.m.). En xeral, os motores de pequena e media potencia son de aspiración natural e os de maior potencia son turboalimentados, é dicir, utilizan un compresor de aire movido por unha pequena turbina alimentada cos gases de escape. No caso de motores a propano, a turboalimentación presenta inconvenientes, dado o reducido índice de metano do devandito gas, polo que as altas presións poden provocar autodetonacións.     

Os motores turboalimentados dan máis potencia no eixo para o mesmo consumo. Non obstante, para lograr esta maior eficacia, o aire quente debe arrefriarse á saída do turbocompresor, e é necesario un sistema de refrixeración independente, que subministre auga a unha temperatura inferior á que normalmente se dá nos sistemas de refrixeración do motor.