Repsol YPF

A solución con gas propano permite cubrir todas as necesidades térmicas da vivenda cunha única fonte de enerxía. O local onde se sitúen os aparatos de consumo de gas terá que estar dotado cunha ventilación axeitada, e a caldeira conectará cun conduto de evacuación dos produtos da combustión, que os verca ao exterior da edificación. A emisión de calor no sistema de calefacción realízana os radiadores, situados en cada un dos cuartos ou dependencias das vivendas. Unha rede de auga para calefacción, habitualmente con circuíto de ida e de retorno, encárgase de distribuír a auga quente de calefacción polos radiadores, retornando novamente á caldeira. A regulación do sistema está asegurada por un único termóstato que goberna a marcha e a parada da caldeira (xa sexa esta individual para cada vivenda ou centralizada) ou por válvulas termostáticas individuais situadas en cada radiador. Un sistema alternativo ao anterior, empregado nalgunhas zonas non moi frías, consiste na instalación dun radiador mural a gas nalgúns cuartos. Neste caso a rede interior de distribución de gas é máis complexa e ramificada, pero non existe rede de distribución de auga quente para calefacción. Os radiadores son estancos e están dotados dunha toma de aire exterior e unha saída dos produtos da combustión.