Repsol YPF

As exixencias dos motoristas van calando pouco a pouco nas institucións, que comezan a darse conta de que a solución ao problema da sinistralidade deste colectivo está tamén nas súas mans. Así, o fiscal delegado da Seguridade Viaria, Bartolomé Vargas, recoñeceu que os motoristas están “cargados de razón” nas súas protestas e pediu que se leve a cabo unha política de mellora das estradas que afecte a sinalización e elimine os gardarraís.

Vargas apoiou o colectivo moteiro nas súas protestas pola presenza destas perigosas barreiras nas estradas españolas e lembrou a gran cantidade de persoas que perden a vida en accidentes pola presenza dun gardarraíl ou nunha saída de vía cando o motorista se topa con este elemento de seguridade.

Ademais, o fiscal pediu a posta en marcha dunha política de mellora das estradas, coa que poder loitar contra a sinistralidade. Ao seu xuízo, deberíanse levar a cabo reformas urxentes nas vías convencionais, na sinalización, nos puntos negros e nos gardarraís. Por outra banda, Bartolomé Vargas propuxo a creación dunha “estratexia global” que contemple non só medidas penais e punitivas senón tamén campañas de concienciación.

Nese sentido, o xuíz resaltou a importancia da educación viaria, tanto na familia coma nas escolas e da “reciclaxe de por vida” dos condutores, para que conten sempre cunha formación axeitada. Asemade, Vargas mirou cara a industria e asegurou que as medidas institucionais e sociais deberían vir acompañadas dunha aposta por introducir novas tecnoloxías nos vehículos, independentemente da gama á que pertenzan.

Por último, o fiscal referiuse á Reforma do Código Penal, e lamentou que as leis se estean a aplicar con “excesiva benevolencia”, xa que ao seu xuízo, tanto xuíces e fiscais coma os cidadáns non teñen conciencia da seguridade viaria.

30/01/2008

Últimas noticias:

- Moteiros de Aragón denuncia ás institucións
- O Goberno endurece o carné de motos