Repsol YPF

A firma xaponesa Honda presentou a nova versión da súa clásica scóoter Scoopy. Sen perder un chisco da súa identidade, a Scoopy reaparece na escena case 8 anos despois da súa última renovación. Funcionalidade, confort e seguridade son as principais características coas que a firma nipona deu un paso adiante para reinventar un dos seus modelos máis populares.

A base continúa sendo a mesma nesta nova versión da Scoopy, xa que desde a firma Honda querían evitar que esta renovación restase valores de identificación para o público nun modelo tan popular e rendible como a Scoopy. Desde 1984 no mercado e cunha última renovación no ano 2001, a Scoopy pedía outra volta máis para adaptarse aos tempos.

A súa grella frontal e as súas rodas de 16 polgadas seguen sendo algúns dos principais sinais de identidade desta moto. O faro con lente transparente tamén axuda ao impacto visual, ademais de proporcionar unha excelente visibilidade nocturna. Esta nova Scoopy inclúe na parte frontal un pequeno parabrisas, que lle dá un estilo máis actual e ademais achega aerodinámica e protección. A parte traseira segue a mesma liña atractiva e moderna co colín e un piloto máis rechamante.

En canto á motorización, monta un propulsor de catro tempos, con inxección electrónica e refrixeración líquida. Cun consumo moderado e unhas baixas emisións, mantén un bo desenvolvemento, que grazas ás súas rodas de 16 polgadas e as suspensións que inclúe, lle dan a nova Scoopy unha moi boa puntuación en manexabilidade. A Scoopy chega ao mercado nunha primeira fornada a primeira semana de Febreiro en dúas cilindradas, 125 e 150 centímetros cúbicos.

28/01/2009

Últimas noticias

> A ITV tamén obrigatoria para os ciclomotores
> Suzuki Gladius SFV 650: liña clásica con novo motor