Repsol YPF
Ruta
NAIAS 2007
A primeira das grandes citas internacionais do mundo do motor no 2008 é o Salón do Automóbil de Detroit, a capital da industria automobilística norteamericana. Algúns dos modelos que chegarán ao mercado ao longo deste ano farán a súa aparición na moqueta da edición número 20 da cita estadounidense que exhibirá, dende o 19 até o 27 de xaneiro, as apostas de futuro das distintas marcas.
As presentacións de Detroit
BMW aterrará en Detroit con dúas esperadas novidades. A primeira delas, o Serie 1 Coupé, chegará ás estradas en marzo do 2008. Construído a partir do Serie 1, este convertible con teito de lona e catro prazas recorda máis á versión Coupé que os clásicos modelos de tres e cinco portas.
BMW X6
Ademais, a marca alemá centrará toda a atención coa presentación dunha das estreas máis esperadas do ano: o X6. Sen deixar de lado toda a esencia da prestixiosa firma e derivado do popular X5, este atractivo todocamiño presenta unha aparencia máis deportiva cunhas liñas máis suaves e unha traseira que corresponde á estética coupé. O X6 convértese deste xeito no pioneiro dun novo segmento.
Mercedes GLK Freeside
Mais BMW terá que compartir protagonismo con Mercedes-Benz que exhibirá en Detroit unha das novidades máis esperadas: o seu novo SUV compacto, o GLK Freeside. Cunha tecnoloxía herdada doutros segmentos, este novo modelo combina o luxo cunha imaxe robusta. Outono do 2008 é a data prevista para que este vehículo chegue ao mercado, equipado cun motor 2.2 litros turbodiésel de catro cilindros e de 168 CV.
Kia Borrego
Pola súa parte Kia presentará en primicia mundial o seu novo todoterreo de tamaño medio, que levará o nome de Borrego. Derivado do prototipo Mesa que apareceu por primeira vez en Detroit no ano 2005, destaca por estar realizado sobre un chasis monocasco que incorpora o último en enxeñaría para lograr unha maior suavidade de marcha. Ademais, este vehículo, con capacidade para sete persoas, ofrece unha imaxe forte e poderosa.
Subaru Forester
Tamén Subaru dará a coñecer en Detroit unha nova xeración do Forester. A terceira versión deste todocamiño, que se porá á venda en marzo de 2008, ofrece unha imaxe completamente renovada e semella máis grande que o seu predecesor, aínda que só medrou 7,6 centímetros. O novo Forester chega con melloras de seguridade, confort e rendemento mecánico e a súa aterraxe nos concesionarios españois está prevista para o mes de marzo.
Nota informativa: Tradución do orixinal en castelán. No caso de calquera discrepancia, prevalecerá a versión en castelán.