Repsol YPF

O gran esperado Seat Altea Freetrack, o primeiro SUV da casa española, está sendo un dos maiores focos de atención do Salón. A berlina familiar de Peugeot, o 207 SW; o Citröen C4 Sedán, unha berlina de tres volumes; e o restyling do Kia Picanto eran as outras novidades mundiais anunciadas. Pero Opel quíxose sumar á festa cunha nova versión que a marca gardaba en segredo, o Corsa GSI. Por último, Land Rover elixiu tamén a Barcelona para presentar ao mundo a súa gama 2008 de todoterreos.

O Salón alberga tamén o lanzamento europeo de dous modelos de Nissan, o Navara e o Pathfiner, un pick up e un todoterreo respectivamente. Non hai dúbida de que este Salón é un claro referente mundial no mundo do motor, pero do que hai menos dúbida é de que este evento é toda unha institución nacional. O público da Fira ten ao seu alcance toda a oferta automobilística que hai en España recollida nun só recinto.

Neste sentido, as marcas esperaron a esta nova edición do evento para lanzar en España até un total de 45 novidades. Os vehículos todocamiños teñen unha presencia importante neste Salón, como proba o desembarco do Peugeot 4007, o Citröen C-Crosser, o Mazda CX-7, o Nissan X-Trail ou o concept car do futuro Renault Koleos.

O novo Ford Mondeo é unha das berlinas que máis expectación crearon no Salón do Automóbil. Outros vehículos compactos para os que este Salón supón a súa estrea en España son o Alfa Romeo 159, os Audi A5, o Fiat Linea, o Hyundai i30, o Skoda Fabia ou o Toyota Corolla Verso.

Pero uns dos vehículos que máis olladas atraen neste tipo de eventos sempre son os coches deportivos. Todo un abano que abarca dende os coches máis accesibles até os máis luxosos. Como novidades destacan o Opel Corsa OPC, o Passat R36, a serie limitada do Alfa Romeo 8C Competizione, o convertible Aston Martin V8 Vantage Roadster ou o Maserati Granturismo.