Repsol YPF

Pouco espazo, moita xente

Case dous terzos da humanidade vive mirando ao mar. Moita xente se se ten en conta o reducido do espazo. A acumulación de poboación na costa ten a súa explicación nos abundantes recursos mariños, aproveitados polo ser humano desde hai séculos, ao que se une o seu habitual clima suave.

Un ecosistema fráxil

Nas zonas de litoral, medio mariño e terrestre conflúen nun diálogo que dá lugar a ecosistemas do máis variados: praias, dunas, acantilados, fondos mariños… son a residencia de infinidade de seres vivos, tanto animais como vexetais. Unha convivencia harmoniosa pero moi fráxil, que se ve moi afectada por unha acción excesiva do ser humano. Calquera cambio nunha das súas partes, afecta o conxunto.

Que é ser sostible?

Non é só frear a contaminación ou garantir o que se chama a ‘hixiene ambiental’, é dicir, evitar que a acción humana sobre o ambiente prexudique a saúde dos seus habitantes. Ser sostible ten que ver tamén con pór límites para non forzar a máquina da natureza e con protexer e conservar espazos naturais. Consumir recursos por encima da súa taxa de reposición, producir residuos por encima da capacidade natural de reabsorción, ou permitir procesos de exclusión social e de acceso inxustos para os recursos son condutas que se deben mellorar.

Por onde comezar?

Definindo como debe crecer unha cidade. Ás veces, en espazos tan reducidos recoméndanse poboacións máis compactas en vez de conxuntos de vivendas dispersas que ocupan máis espazo e solo. Tamén é preciso fomentar un uso máis sostible do patrimonio edificado, recuperando e rehabilitando o parque inmoble. Non é ningún secreto que o ambiente costeiro xera maior desgaste en cerramentos e outros elementos das vivendas: elixir os materiais adecuados e realizar un bo mantemento é clave para a sostibilidade doméstica e evitar, por exemplo, recorrer á calefacción cando unha boa ventá sería suficiente.

Pero hai moito máis onde se pode traballar: favorecer as zonas verdes, apostar polo transporte público, reducir o consumo de enerxía en iluminación pública, coidar o produto local, recuperar técnicas tradicionais de pesca ou cultivo, aproveitar a sabedoría do mar para desenvolver fontes de enerxía alternativas…

Sabías que...

Entre os últimos proxectos para deseñar a urbe do século XXII, a cargo de IBM, Cisco e o MIT, está o dos americanos Rychiee Espinosa e Seth McDowell, que propoñen crear espazos urbanos sobre a auga, co fin de utilizar esta para xerar enerxía sostible.

Artigos relacionados:

- 2012 toma conciencia sobre a enerxía sostible 

- A nova tarxeta de crédito, ou teu smartphone