Repsol YPF

Ademais de diversión, descanso e evasión das rutinas diarias, as vacacións de verán, supoñen en moitas ocasións esforzos físicos que o corpo acaba notando. Desafortunadamente para moitos, os días de descanso pódense converter nunha auténtica odisea por culpa das temidas queimaduras solares, picaduras de mosquitos diarreas, mareos ou intoxicacións, que podes previr e curar facilmente con algunhas plantas naturais, que poderás levar na túa equipaxe.

Un dos males máis acusados por viaxeiros que elixen como destino o estranxeiro son as infeccións víricas e en consecuencia, as molestas diarreas. Neste sentido, o máis importante son as precaucións, que debes tomar dun modo estrito e cauteloso durante a viaxe; seleccionar ben os alimentos que consumirás, e tomar sempre auga embotellada  son requisitos imprescindibles para non ter problemas. Non obstante, se xa é demasiado tarde para isto, beber abundante líquido e auga de té, que podes levar contigo, axudarante a paliar os efectos. A limoada alcalina pódese converter na solución perfecta; só precisarás para elaborala un litro de auga fervida, dez culleradas de azucre, unha cullerada de sal, outra de bicarbonato de sodio e zume de un ou dous limóns.  Son todos produtos moi sinxelos de conseguir, e se ademais o teu destino de vacacións é unha segunda vivenda, conservaranse sen ningún tipo de coidados ano tras ano.  Tamén o fiúncho se postula como a resposta perfecta para problemas estomacais e cólicos infantís.

O verán e as calores son tamén épocas de picaduras de mosquito. E que molestas son! Ademais dos repelentes químicos que atoparás en calquera farmacia, existen outras alternativas que che poden resultar interesantes: trátase dos aceites esenciais. Se ben a duración dos seus efectos repelentes fronte aos mosquitos é máis breve que a doutras composicións químicas, a súa actividade ofrece bos resultados. Así por exemplo, as esencias de eucalipto protexerante incluso ata seis horas. Podes utilizar tamén aceites de tomiño, alfabaca, poexo ou limón, aínda que nestes casos o seu efecto prolongarase tan só durante dúas horas.

Non obstante, se sofres unha picadura, cunhas follas de salvia e lingua de vaca a man, o problema será menor. Trátase de plantas moi comúns, e que podes ter no teu propio xardín. Para aplicalas só terás que machucar as súas follas e co zume que obteñas disto, estendelo sobre unha gasa e deixar que seque colocándoo sobre a picadura. O aceite de lavanda é eficaz para aliviar este tipo de doenzas.

Constipado en verán?


Pero se de verdade es un debilucho e tamén te arrefrías en verán, como consecuencia dos cambios bruscos de calor a frío, a familia das mentas en forma de infusións ou inhalacións (por exemplo bafos de folla de eucalipto), axudarate. O própole pola súa parte, que é a resina que as abellas extraen das plantas para recubrir e protexer a colmea, é moi útil para aliviar a irritación de gorxa e mellorar a afonía. Poderás atopalo en calquera herboristería.

A planta estrela: o aloé vera


O Aloé Vera é un excelente limpador e antiséptico natural que penetra facilmente na pel e nos tecidos (nalgunhas ocasións cruzando sete capas distintas), que actúa como anestésico calmando todo tipo de dores; é perfecto para aliviar queimaduras solares, úsase como antiinflamatorio, ademais das súas propiedades altamente nutritivas e a súa capacidade para destruír os tecidos mortos (incluído o pus). Trátase sen dúbida dun elemento imprescindible en calquera caixa de primeiros auxilios, aínda que quizais neste caso é máis complicado desprazalo ou levalo na equipaxe. Se finalmente decides levar algunha folla desta planta, envólvea en papel transparente e consérvaa nun lugar fresco.

Artigos relacionados:

- Tratar a febre en verán