Repsol YPF

Como distinguilas?

O tamaño e o sabor son os seus elementos diferenciadores, xa que en liñas xerais os amorodos son máis pequenos e doces que os fresóns. A tempada propia destes manxares abrangue desde marzo ata xullo, aínda que os suaves invernos dalgunhas zonas de España garanten a súa presenza na nosa mesa durante a práctica totalidade do ano.

Sabor sen apenas calorías

A variedade na familia destas froitas é moi ampla, e no mundo coñécense xa máis de 1.000 clases distintas de amorodos e fresóns. Iso si, a súa achega calórica é mínima, xa que aproximadamente o 85% da súa composición é auga, e inxeriremos en torno a 35 calorías por cada 100 gramos. Por iso, incluídas nunha dieta equilibrada, son ideais para gozar do seu sabor mentres mantemos a raia o noso peso.

Eficaces contra enfermidades

Inxerindo 100 gramos de amorodos aportarás ao teu organismo aproximadamente a cantidade diaria de vitamina C recomendada (uns 60 miligramos), e a túa saúde agradecerao especialmente nas épocas de frío. Estas froitas son tamén ricas en vitaminas E e A, e en betacarotenos, uns antioxidantes que preveñen o envellecemento celular, o cancro e outras enfermidades como a arterioesclerose.

Circulen por favor

A circulación sanguínea e o tránsito intestinal melloran co consumo de amorodos e fresóns. A razón? O seu alto contido en fibra contribúe a evitar que o colesterol se adhira ás arterias, ademais de combater o constrinximento. E segue sumando beneficios, porque as súas propiedades diuréticas facilitan a eliminación de ácido úrico, así que son moi aconsellables no día a día dos enfermos de gota e artrite.

Ata o rabo todo é amorodo (ou fresón)

Procura escoller os exemplares máis brillantes, tersos e de cor viva tanto no froito como no pedúnculo (o rabiño). O seu período de consumo óptimo é de aproximadamente un día desde que se arranca da planta, aínda que segundo o seu grao de madurez poden aguantar entre 4 e 5 días na neveira. Nunca quites o rabo antes de lavar estas froitas, porque absorberán demasiada auga e perderán propiedades, e procura almacenalas estendidas para que duren máis tempo.

Incontables receitas

A mellor forma de gozar o sabor dun amorodo ou fresón é, simplemente, lavando o froito e consumíndoo directamente. A partir de aí as posibilidades son infinitas. A que esperas para gozar delas?

Sabías que...

Estudos recentes demostraron que o consumo habitual de amorodos e fresóns mellora sensiblemente a capacidade antioxidante do sangue, estimula a memoria a longo prazo e axuda a previr o cancro de esófago.

Artigos relacionados: