Repsol YPF

As técnicas de cociña saudables contribúen a que os alimentos conserven as súas propiedades nutritivas, sen engadirlles aos mesmos unha achega calórica excesiva. Así, pódenche axudar a perder peso (se es constante na súa aplicación), a manterte en forma e a estar mellor alimentado.

Verduras?... mellor ao vapor

A cocción ao vapor é a maneira máis correcta de cociñar as verduras para que conserven as súas propiedades nutritivas, as cales desaparecerían na auga, ou a causa da oxidación, se se cociñasen nunha cazola destapada. Por iso, lembra que os principais inimigos das súas vitaminas son a temperatura, a luz e a oxidación.

Peixes cheos de sabor

Que saudables son os peixes cociñados ao vapor!, é dicir, nunha cazola tapada onde os sabores de especias e ingredientes gañen en intensidade. E é que se lle queres dar máis gusto aos teus guisos, tan só tes que colocar o alimento dentro dun cesto ou encima dunha fenda (en cazola), con dez culleradas de auga debaixo, vixiando que esta non o chegue a tocar.

E por que non á prancha?

Grazas ás superficies antiadherentes podes chegar a cociñar con moi pouca graxa. Engade especias que enriquezan os teus pratos, ou se prefires un sabor máis forte un chorriño de limón mesturado con perexil e allo relado.

E se non contas cunha prancha improvisa cunha tixola e un pouco de papel de aluminio, tan só tes que envolver con el os alimentos que preparaches previamente. E se vas facer peixe lembra que podes combinar salsas como tomate triturado, especias e queixo fresco, ou probar con recheos de verduras que podes prequentar antes no microondas cunhas pingas de auga (sen introducir o papel de aluminio neste). Que queres un toque exótico? Combina ingredientes como piña, coco e mango triturado… a mestura sorprenderate.

Perfecta para aforrar enerxía e auga

A cocción ao vapor é fantástica para aforrar enerxía e auga. Diminuirás o gasto enerxético porque poderás apagar o lume da túa cociña a gas cinco ou dez minutos antes de que a elaboración finalizase; en canto á auga, reducirás o seu consumo porque che bastará cunha cantidade mínima da mesma.

Vai ben coas cociñas a gas

A cocción ao vapor funciona mellor coas cociñas a gas que coas eléctricas, porque só o gas nos permite baixar o lume inmediatamente -cando o consideremos oportuno ou cando o esixa a receita - sendo os gasodomésticos a mellor alternativa se o aforro enerxético preside a túa filosofía de vida.

Sabías que...

A achega calórica dun alimento cambia en función da técnica coa que fose cociñado. Por exemplo, a pataca fervida ou asada con pel ten 80 calorías por cada100 gr., fronte ás 220 calorías da pataca frita (á francesa) ou as 525 das patacas “chips”. 

Artigos relacionados:

- Sácalle o máximo partido aos moldes de silicona para repostería

- Si, roscón para todos