Repsol

Trátase dunha iniciativa pioneira en Europa

Repsol presenta o seu libro branco da contratación de persoas con capacidades diferentes

Nota de Prensa

8 de xullo de 2009 13:30 CET

Repsol presentou o seu Libro branco da contratación de persoas con capacidades diferentes, cuxo obxectivo é ofrecer unha guía de procedementos que permita a estandarización e mellora dos procesos de contratación e xestión da diversidade destes traballadores. 

Acudiron ao acto, que tivo lugar na sede da Fundación Repsol, o vicepresidente executivo da Fundación Once, Alberto Durán, o vicepresidente executivo da Fundación Repsol, Enrique Locutura e a directora xeral de Persoas e Organización da compañía, Cristina Sanz Mendiola.

A elaboración deste libro forma parte do Plan de Integración de Persoas con Capacidades Diferentes de Repsol, iniciado en 2005. Grazas a este plan, pasouse de 131 empregados con discapacidade en decembro de 2004, un 0,80% do cadro de persoal, a 423 persoas en decembro de 2008, o que supón un 2,31% do cadro de persoal total de Repsol. O impulso da alta dirección resultou determinante para o logro dos obxectivos do plan.

O Libro branco da contratación de persoas con capacidades diferentes de Repsol, o primeiro deste tipo que elabora unha empresa en Europa, inscríbese no marco dos valores da compañía e reflicte o seu compromiso coa sociedade. Para Repsol, a integración de persoas con discapacidade vai máis alá da obriga legal e responde á convicción de que a empresa se enriquece coa achega das persoas con capacidades diferentes, que achegan valor engadido á compañía. 

O vicepresidente executivo da Fundación Repsol, Enrique Locutura, sinalou que a integración das persoas con capacidades diferentes é unha das principais necesidades sociais. Locutura apuntou que se trata dun reto que as institucións, empresas e organizacións deben afrontar e no que o Grupo Repsol está cada vez máis implicado.

Pola súa parte, a directora xeral de Persoas e Organización de Repsol, Cristina Sanz Mendiola, expresou o seu desexo de que este libro "poida servir a outras empresas que se inician no camiño de integrar persoas con discapacidade no seu cadro de persoal e favoreza a integración deste colectivo na sociedade". 

O vicepresidente executivo da Fundación ONCE, Alberto Durán, destacou na súa intervención o exemplo de Repsol, que deu un paso de reflexión e revisión das súas instalacións e dos seus procesos, coa idea de potenciar que as persoas con discapacidade se poidan incorporar ao seu cadro de persoal.

Repsol e as persoas discapacitadas

Repsol tamén dispón dunha guía de accesibilidade para as súas estacións de servizo, que permitiu que dúas delas (en Madrid e Zaragoza) sexan as únicas de España certificadas en Accesibilidade Global por AENOR (norma 170001). Así mesmo, en 2008 inaugurou en Móstoles (Madrid) a primeira estación de servizo atendida na súa totalidade por un equipo de 10 persoas con capacidades diferentes.

A compañía conta cunha longa traxectoria no desenvolvemento de distintos proxectos que favorecen a igualdade de oportunidades e a integración na sociedade de todos os colectivos, en especial daqueles que máis o necesitan e que presentan unha maior dificultade no acceso ao mercado laboral. Colabora coa Fundación ONCE no programa INSERTA para a promoción da integración laboral de persoas con discapacidade en grandes empresas, e coa Fundación Paideia no desenvolvemento de distintas actuacións de formación ocupacional. 

Este labor que realiza Repsol a favor da integración de persoas con capacidades diferentes foi premiado en diversas ocasións. O Observatorio de Empresa e Sociedade recoñeceu a Repsol como a empresa que máis emprego directo creou para este colectivo no período 2005-2007, e o Comité Español de Representantes de Persoas con Discapacidade (CERMI) premiou en decembro de 2008 a campaña de comunicación da compañía a favor da inclusión social e laboral das persoas con capacidades diferentes.

Información adicional

Metodoloxía de elaboración do libro:

Co fin de afianzar os resultados de integración e mellorar os sistemas de xestión, Repsol solicitou á empresa Technosite apoio técnico para a elaboración deste libro. A metodoloxía de elaboración do libro foi a través de:

. Elaboración documental: como punto de partida, procedeuse a solicitar e sistematizar o conxunto de informacións documentais da compañía no ámbito da discapacidade.

. Entrevistas con informantes claves: realizáronse un total de 21 entrevistas con responsables de RRHH, dirección, organizacións sindicais, postos intermedios, entidades colaboradoras e empregados.

. Grupos de discusión: considerouse necesario que a análise do proceso de integración de persoas con capacidades diferentes en Repsol contase coa perspectiva de: 

Os propios traballadores con capacidades diferentes.
Os xefes de equipo
Compañeiros de traballo destes empregados con capacidades diferentes.

. Estudos de caso: leváronse a cabo estudos de caso a través de prácticas de observación directa nos puntos e nas entrevistas en profundidade. Visitáronse dúas estacións de servizo abandeiradas, xestionadas en acordo comercial por centros especiais de emprego e unha estación de servizo de xestión directa.