Repsol

Traballarán en estacións de servizo da provincia de Málaga

Catorce persoas con capacidades diferentes inician a súa carreira profesional en Repsol

· Máis de 300 persoas con algún tipo de discapacidade traballan xa en Repsol
· Os novos empregados forman parte do programa INSERTA para a integración laboral, no que participan a Fundación Once e Repsol
·Repsol desenvolve un plan de acción orientado a formar e incorporar persoas con capacidades diferentes ás súas estacións de servizo

Nota de Prensa

18 de xuño de 2008 16:00 CET

Catorce persoas con capacidades diferentes, tanto físicas como intelectuais, iniciarán a súa carreira profesional en estacións de servizo Repsol da provincia de Málaga tras finalizar con éxito o curso de "Vendedor-Expendedor de carburantes", que se clausurou hoxe no Parador Málaga Gibralfaro.

A formación iniciouse o pasado 12 de maio e ao longo do curso os alumnos recibiron tanto formación teórica como práctica na estación de servizo de Arroyo de la Miel. Este é o cuarto curso que se realiza en España durante 2008, tras os celebrados en Valladolid, Valencia e Palma de Mallorca, e está prevista a realización de dous novos ciclos formativos en Sevilla e Murcia. Nestes momentos, xa son máis de 300 as persoas con algún tipo de discapacidade que traballan en Repsol.

Todos estes cursos enmárcanse nun plan de acción de Repsol orientado a formar e incorporar persoas con capacidades diferentes nas estacións de servizo da Rede de Xestión Directa de Repsol, en colaboración con entidades especializadas na atención a este colectivo.

Neste sentido, dende o ano 2006 estabeleceuse unha estreita colaboración con Fundosa Social Consulting, consultora de Recursos Humanos da Fundación ONCE especializada na inserción laboral de persoas con discapacidade. O plan concretouse no Programa INSERTA, iniciativa desenvolvida para promover a integración laboral de persoas con discapacidade en grandes empresas, no que participa a Fundación ONCE e Repsol.

Sempre co apoio e a colaboración de entidades locais, no caso do curso finalizado hoxe en Málaga participaron, achegando candidatos, AMADPSI (Agrupación Malagueña de Asociacións de Personas con Atraso Mental), FAMF (Federación de Asociacións de Minusválidos Físicos de Málaga) e FAISEM (Fundación Andaluza para a Integración Social do Enfermo Mental).

O acto de clausura estivo presidido por Amparo Bilbao, delegada de Asuntos Sociais da Xunta de Andalucía, e contou coa presenza de Mariví Romero, concelleira de Asuntos Sociais do Concello de Málaga, e Raúl López, concelleiro de Mobilidade Universal do mesmo concello.