Repsol

A compañía reforza o seu compromiso con este colectivo

Repsol asina un acordo coa Fundación ONCE para impulsar a integración das persoas con discapacidade

Nota de Prensa

17 de febreiro de 2010 17:41 CET

Repsol e a Fundación ONCE asinaron un acordo de colaboración co obxectivo de impulsar proxectos encamiñados a lograr a integración socio-laboral das persoas con discapacidade.

O acto de sinatura foi presidido pola directora xeral de Persoas e Organización de Repsol, Cristina Sanz Mendiola, e o vicepresidente 1º executivo da Fundación ONCE, Alberto Durán.

En virtude deste acordo, Repsol renova a súa adhesión ao Programa INSERTA da Fundación ONCE, para incorporar ao seu cadro de persoal a persoas con discapacidade durante os tres anos de vixencia do convenio. Pola súa banda, a Fundación ONCE colaborará na formación, selección e seguimento dos posibles candidatos.

Ademais, Repsol promoverá a integración laboral indirecta a través da compra de bens ou servizos en Centros Especiais de Emprego do ámbito da ONCE e a súa Fundación. No acordo prevese a posibilidade de desenvolvemento de boas prácticas en materia de accesibilidade a bens e servizos dentro do ámbito de actividade de Repsol, que promoverá distintas accións de difusión e sensibilización para conseguir os obxectivos marcados no convenio.

Pola súa banda, a Fundación ONCE proporcionará asesoramento en todo o referido ás necesidades especiais que poidan demandar as persoas con discapacidade, e ofrecerá os seus servizos específicos nos ámbitos de colaboración definidos.

Para o desenvolvemento e cumprimento dos obxectivos de inserción laboral de persoas con discapacidade, Repsol contará cos servizos de FSC Inserta, asociación sen finalidade de lucro constituída por Fundación ONCE.

Repsol e as persoas discapacitadas

Repsol ten unha longa traxectoria no desenvolvemento de distintos proxectos que favorecen a igualdade de oportunidade e a integración na sociedade de todos os colectivos, en especial dos que máis o necesitan e que presentan unha maior dificultade de acceso ao mercado laboral. Para Repsol, a integración de persoas con discapacidade vai máis alá da obriga legal e responde á convicción de que a empresa se enriquece coa achega das persoas con capacidades diferentes, que achegan valor engadido á compañía. 

A compañía conta cun total de 544 traballadores con discapacidade. En España, traballan 357 deles por contratación directa e outros 47 por medidas alternativas, o que supón máis dun 2% do cadro de persoal. Repsol é a única empresa do Ibex que supera esa porcentaxe de empregados con capacidades diferentes no total do seu cadro de persoal. 

En 2009, a compañía presentou o seu Libro Branco da Contratación de Persoas con Capacidades Diferentes, unha iniciativa pioneira en Europa cuxo obxectivo é ofrecer unha guía de procedementos que permita a estandarización e mellora dos procesos de contratación e xestión da diversidade destes traballadores.

Repsol tamén dispón dunha Guía de Accesibilidade para as súas estacións de servizo, que permitiu que dúas delas (en Madrid e Zaragoza) sexan as únicas de España certificadas en Accesibilidade Global por AENOR (norma170001). Así mesmo, a compañía conta en Móstoles (Madrid) coa primeira estación de servizo atendida na súa totalidade por persoas discapacitadas.

Este labor que realiza Repsol a favor da integración de persoas con capacidades diferentes foi galardoado en diversas ocasións. O Observatorio de Empresa e Sociedade recoñeceu a Repsol como a empresa que máis emprego directo creou para este colectivo no período 2005-2007 e o Comité Español de Representantes de Persoas con Discapacidade (CERMI), premiou en decembro de 2008 a campaña de comunicación da compañía a favor da inclusión social e laboral das persoas con capacidades diferentes.