Repsol

Única compañía española que alcanza a máxima cualificación

Repsol, premio á transparencia polo seu informe sobre emisións

Nota de Prensa

12 de marzo de 2010 11:35 CET

Repsol foi premiada co Emissions Tracking Carbon Verification Leaders Award 2010, en recoñecemento á información facilitada pola compañía sobre a verificación e contabilización das súas emisións de gases de efecto invernadoiro.  

Segundo este galardón que outorga a EIO (Environmental Investment Organization), Repsol é unha das sete empresas, entre as 1.000 analizadas neste estudo, cuxo Informe de Emisións foi totalmente aceptado e verificado e é, ademais, a única compañía enerxética que obtivo un recoñecemento completo.

Con este estudo, a EIO, unha prestixiosa organización independente, pretende impulsar a creación do ET Carbon Ranking, un índice de sostibilidade que valora os esforzos das compañías por frear a emisión de gases que contribúen ao quentamento global.

O premio supón un novo recoñecemento ao traballo levado a cabo por Repsol en asuntos relacionados co respecto ao medio e a loita contra o cambio climático. 

Ademais, durante 2009 e por cuarto ano consecutivo, Repsol foi incluída nos prestixiosos índices de sostibilidade global DJSI World (Dow Jones Sustainability Index World) e europeo DJSI STOXX, (Dow Jones Sustainability Index STOXX) polos seus comportamentos en sostibilidade. Repsol alcanzou a máxima puntuación do índice na súa estratexia fronte ao cambio climático, biodiversidade, política e sistema de xestión ambiental e información ambiental. 

Así mesmo, o pasado 11 de febreiro a compañía recibiu a cualificación de compañía "Gold Class" segundo o Anuario de Sostibilidade 2009, realizado pola consultora PricewaterhouseCoopers e Sustainable Asset Management (SAM), compañía independente encargada de realizar as análises anuais para o Índice de Sostibilidade Dow Jones. A publicación inclúe as empresas con mellor comportamento en materia de sostibilidade e responsabilidade corporativa do mundo.