Repsol

- Cando vai ter lugar a próxima Xunta Xeral Ordinaria de accionistas?

A Xunta Xeral Ordinaria de accionistas está convocada para o día 30 de maio de 2012, ás 12:00 horas, en primeira convocatoria, e o día 31 de maio de 2012 á mesma hora, en segunda convocatoria. Prevese a realización da Xunta en segunda convocatoria, é dicir, o día 31 de maio de 2012 ás 12:00 horas. De non ser así, anunciaríase na prensa diaria coa antelación suficiente, así como na páxina web da Sociedade (www.repsol.com).

- Onde vai ter lugar a Xunta Xeral Ordinaria de accionistas?

O lugar de realización da Xunta é o Palacio Municipal de Congresos, Avenida de la Capital de España Madrid, sen número, Campo de las Naciones, de Madrid. Ten á súa disposición na páxina web da Sociedade (www.repsol.com), na sección de Xunta Xeral, "Acceso ao recinto", un plano de acceso ao recinto.

- Quen realiza a convocatoria da Xunta Xeral Ordinaria de accionistas e a través de que medios?

A Xunta Xeral Ordinaria de accionistas convócase polo Consello de Administración mediante anuncio publicado: (i) no Boletín Oficial do Rexistro Mercantil; (ii) nun dos diarios de maior circulación na provincia do domicilio social; (ii) na páxina web da Comisión Nacional do Mercado de Valores (www.cnmv.es); e (iii) na páxina web da Sociedade (www.repsol.com), con antelación suficiente á súa realización e, polo menos, un (1) mes antes da data fixada para a súa realización, salvo nos casos en que a Lei estabeleza unha antelación diferente, en cuxo caso se seguirá o disposto nesta. 

Tamén se envía unha copia do anuncio de convocatoria ás bolsas nas que cotizan as accións e ás entidades depositarias das accións, para que estas procedan á emisión das correspondentes tarxetas de asistencia, delegación e voto.

- Que documentación relativa á Xunta Xeral Ordinaria se pon a disposición dos accionistas antes de que esta teña lugar?

Dende a publicación do anuncio de convocatoria e ata a realización da Xunta Xeral Ordinaria, a Sociedade publica na súa páxina web (www.repsol.com), de xeito ininterrompido, salvo forza maior ou imposibilidade técnica allea á súa vontade, entre outra, a seguinte documentación: 


1. O anuncio da convocatoria da Xunta Xeral Ordinaria de accionistas. 

2. O número total de accións e dereitos de voto existentes na data da convocatoria. 

3. As Contas Anuais de Repsol YPF, S.A. e as Contas Anuais Consolidadas do Grupo Repsol YPF correspondentes ao exercicio pechado con data 31 de decembro de 2011. 

4. O Informe dos Auditores Externos sobre as Contas Anuais de Repsol YPF, S.A. e sobre as Contas 
Anuais Consolidadas do Grupo Repsol YPF correspondentes ao exercicio pechado con data 31 de decembro de 2011. 

5. O Informe de Xestión de Repsol YPF, S.A. e o Informe de Xestión Consolidado do Grupo Repsol YPF correspondentes ao exercicio pechado con data 31 de decembro de 2011. 

6. A Declaración de responsabilidade dos conselleiros prevista no artigo 35 da Lei do mercado de valores, que, xunto aos documentos indicados nos tres puntos anteriores, constitúen o Informe Anual da Sociedade correspondente ao exercicio pechado con data 31 de decembro de 2011. 

7. O texto literal das propostas de acordo correspondentes aos puntos da orde do día, así como os informes do Consello de Administración referentes a cada unha das propostas de acordos correspondentes aos puntos da orde do día. 

8. Os textos refundidos vixentes dos Estatutos Sociais, do Regulamento da Xunta Xeral de Accionistas e do Regulamento do Consello de Administración. 

9. O Informe sobre a Política de Retribucións dos Conselleiros de Repsol YPF, S.A. correspondente ao exercicio pechado con data 31 de decembro de 2011. 

10. O Informe Anual de Goberno Corporativo correspondente ao exercicio pechado con data 31 de decembro de 2011. 

11. A Memoria de Actividades da Comisión de Auditoría e Control correspondente ao exercicio pechado con data 31 de decembro de 2011. 

12. O Informe de Responsabilidade Corporativa correspondente ao exercicio pechado con data 31 de decembro de 2011. 

13. O modelo de tarxeta de asistencia, delegación e voto a distancia para a Xunta Xeral Ordinaria de accionistas. 

14. Os informes da Comisión de Nomeamentos e Retribucións e do experto independente previstos na letra (b) do artigo 22.2 do Regulamento do Consello de Administración, relativos a operacións vinculadas autorizadas polo Consello ao abeiro do previsto na letra (c) do indicado precepto. 

Así mesmo, cando exista un complemento da convocatoria, a Sociedade fará públicas a través da súa páxina web (www.repsol.com), dende a data de publicación do citado complemento e de xeito ininterrompido, o texto das propostas xustificadas de acordo ás cales se refire o devandito complemento que fosen remitidas á Sociedade. Igualmente, a Sociedade publicará na súa páxina web as novas propostas fundamentadas de acordo sobre asuntos xa incluídos ou que debesen incluírse na orde do día da xunta convocada que lle tivesen sido remitidas.

- Onde e como poden obter os accionistas a documentación relativa á Xunta Xeral 2012?

Toda a documentación relativa á Xunta Xeral estará dispoñible na páxina web da Sociedade (www.repsol.com) no espazo dedicado á Xunta Xeral 2012 e na Oficina de Información ao Accionista, situada no domicilio social da Sociedade (Paseo de la Castellana 278) no seguinte horario: de luns a venres de 10:00 a 18:00 horas. 

Así mesmo, no lugar sinalado para a realización da Xunta Xeral e o día da súa realización, existirán a disposición dos accionistas varios puntos de entrega da documentación.

- Que é o complemento da convocatoria e quen pode solicitalo?

Unha vez publicada a convocatoria da Xunta Xeral, os accionistas que representen, polo menos, o 5% do capital social, poderán solicitar que se publique un complemento a esta, incluíndo un ou máis puntos na orde do día da reunión, sempre que os novos puntos vaian acompañados dunha xustificación ou, se é o caso, dunha proposta de acordo xustificada. 

Este dereito deberá exercitarse mediante notificación fidedigna á Sociedade, na que deberá acreditarse a titularidade da indicada porcentaxe, e que deberá recibirse no domicilio social dentro dos cinco (5) días seguintes á publicación da convocatoria. 

O complemento da convocatoria publicarase polos mesmos medios que a convocatoria inicial, con, polo menos, quince (15) días de antelación á data establecida para a reunión da Xunta Xeral.

- Pódense presentar novas propostas de acordo sobre asuntos xa incluídos na orde do día?

Os accionistas que representen polo menos o 5% do capital social poderán presentar novas propostas fundamentadas de acordo sobre asuntos xa incluídos ou que deban incluírse na orde do día da xunta convocada. 

Este dereito deberá exercitarse mediante notificación fidedigna á Sociedade, na que deberá acreditarse a titularidade da indicada porcentaxe e que deberá recibirse no domicilio social dentro dos cinco (5) días seguintes á publicación da convocatoria. 

Publicarase na páxina web da Sociedade (www.repsol.com) o texto completo das novas propostas fundamentadas de acordo, así como a documentación que segundo o caso se achegue co fin de asegurar a difusión destas entre o resto de accionistas.

- Como poden os accionistas formular cuestións ou realizar suxestións sobre a Xunta Xeral?

En todo momento, os accionistas, logo de consignación da súa identidade como tales, poderán, por medio da Oficina de Información ao Accionista (a través do teléfono 900 100 100, mediante correo postal ao Paseo de la Castellana 278-280, 28046 Madrid ou mediante correo electrónico ao enderezo infoaccionistas@repsol.com), formular cuestións ou realizar suxestións que garden relación coas actividades e intereses da Sociedade e consideren que deben ser tratadas na Xunta Xeral de Accionistas. 

Convocada a Xunta Xeral e antes dos sete (7) días inmediatos á data fixada para a súa realización en primeira convocatoria, os accionistas poden utilizar os mesmos medios para comentar ou realizar suxestións por escrito con relación ás propostas incluídas na súa orde do día. 

Os Servizos da Sociedade examinarán as cuestións, suxestións e comentarios dos accionistas e, de forma agrupada segundo o caso, difundiranse as súas respostas na páxina web da sociedade (www.repsol.com) ou, de consideralo procedente o Consello de Administración, serán tratadas en Xunta Xeral de Accionistas, aínda que non sexan incluídas na Orde do Día. 

Así mesmo, os accionistas que representen polo menos o 5% do capital social poderán solicitar: (i) que se publique un complemento da convocatoria da Xunta incluíndo un ou máis puntos na orde do día sempre que os novos puntos vaian acompañados dunha xustificación ou, se é o caso, dunha proposta de acordo xustificada; e (ii) presentar novas propostas fundamentadas de acordo sobre asuntos xa incluídos ou que deban incluírse na orde do día da xunta convocada. 

O exercicio destes dereitos deberá facerse mediante notificación fidedigna que haberá de recibirse no domicilio social dentro dos cinco (5) días seguintes á publicación da convocatoria.

- Quen ten dereito a asistir á Xunta Xeral de Accionistas?

Poderán asistir á Xunta Xeral todos os accionistas da Compañía, con independencia do número de accións do que sexan titulares, sempre que as teñan inscritas no correspondente rexistro contábel con cinco (5) días de antelación á realización da Xunta, e dispoñan da correspondente tarxeta de asistencia, delegación e voto. 

O rexistro das tarxetas de asistencia, delegación e voto comezará dous (2) horas antes da sinalada para a realización da Xunta.

- Que debe facerse se non se recibe ou se perde a tarxeta de asistencia, delegación e voto para a Xunta?

Debe dirixirse á entidade financeira na que se encontran depositadas as súas accións, onde lle facilitarán un duplicado da tarxeta, ou, se non, un certificado que acredite a súa condición de accionista; ou ben completar cos seus datos o modelo de tarxeta de asistencia, delegación e voto dispoñíbel na páxina web da Sociedade (www.repsol.com) e na Oficina de Información ao Accionista e utilizar o devandito modelo para asistir e votar na Xunta Xeral.

- Que debe facerse se algún dos datos persoais que aparecen reflectidos na tarxeta de asistencia, delegación e voto non é correcto?

Para realizar cambios nos datos persoais da tarxeta para esta ou futuras realizacións de Xuntas Xerais, debe dirixirse á entidade financeira onde se encontren depositadas as súas accións e notificar alí a modificación dos seus datos. 

Non obstante, coa tarxeta de asistencia recibida, poderá asistir e votar na Xunta Xeral sempre que o nome e apelidos, número de identificación fiscal (NIF) e número de accións sexan correctos. Se non o fosen, deberá completar cos datos correctos o modelo de tarxeta de asistencia, delegación e voto dispoñíbel na páxina web da Sociedade (www.repsol.com) e na Oficina de Información ao Accionista e utilizar o devandito modelo para asistir e votar na Xunta Xeral.

- Como podo obter o certificado electrónico recoñecido emitido pola Autoridade Pública de Certificación Española (CERES) dependente da Fábrica Nacional de Moeda e Timbre para exercitar os meus dereitos a través de medios electrónicos?

Na páxina web da Fábrica Nacional de Moeda e Timbre (www.fnmt.es), atopará información detallada para obter o Certificado de usuario.

- Pode acudir un accionista acompañado por un familiar ou un terceiro á Xunta Xeral?

O accionista poderá acudir acompañado á Xunta Xeral por un familiar ou un terceiro sempre que estas persoas sexan á súa vez accionistas da Sociedade ou representantes dalgún accionista.

- Se na tarxeta de asistencia aparecen varios titulares, cantos poden ir á Xunta Xeral?

Unicamente un deles terá dereito de asistencia á Xunta xeral. Este considerarase designado polo resto dos cotitulares para exercitar os dereitos do accionista.

- Como poden solicitar os accionistas informes ou aclaracións sobre a orde do día da Xunta Xeral?

Ata o sétimo día anterior ao previsto para a realización da Xunta, os accionistas poderán solicitar do Consello de Administración, a través da Oficina de Información ao Accionista, logo de acreditación da súa condición de accionista, as informacións ou aclaracións que consideren precisas sobre os asuntos comprendidos na orde do día ou formular por escrito as preguntas que consideren pertinentes. Os accionistas poderán solicitar, ademais, informacións ou aclaracións ou formular preguntas por escrito sobre a información accesíbel ao público que fose facilitada pola sociedade á Comisión Nacional do Mercado de Valores dende a realización da última Xunta Xeral e sobre o informe de auditor. 

Así mesmo, durante a realización da Xunta Xeral, os accionistas da sociedade poderán solicitar verbalmente as informacións ou aclaracións que consideren convenientes sobre os asuntos comprendidos na orde do día e, en caso de non ser posíbel satisfacer o dereito do accionista nese momento, o Consello de Administración estará obrigado a facilitar esa información por escrito dentro dos sete (7) días seguintes ao día da terminación da Xunta. 

O Consello de Administración estará obrigado a proporcionar a información solicitada salvo nos casos en que, a xuízo do presidente, a publicidade da información solicitada prexudique os intereses sociais e a devandita solicitude non estea apoiada por accionistas que representen, polo menos, o 25% do capital social. Tampouco estará obrigado a responder ás solicitudes de información cando, con anterioridade á súa formulación, a información estea clara e directamente dispoñíbel para todos os accionistas na páxina web da Sociedade (www.repsol.com), na sección de preguntas frecuentes.

- Como pode facerse un accionista representar na Xunta Xeral?

Os accionistas que non asistan á Xunta poderán delegar o seu voto a favor de calquera persoa física ou xurídica, sexa ou non accionista, para que o represente. A representación deberá conferirse por escrito ou por medios de comunicación a distancia con carácter especial para cada Xunta, salvo o disposto no artigo 187 da Lei de sociedades de capital, é dicir, que o representante sexa o cónxuxe ou un ascendente ou descendente do representado ou posúa un poder xeral conferido en documento público con facultades para administrar todo o patrimonio que o representado teña en territorio nacional.
 
O accionista deberá comunicar por escrito ou por medios electrónicos a quen designe como representante, a representación conferida ao seu favor. Cando esta se confira a favor dalgún membro do Consello de Administración, a comunicación entenderase realizada mediante a recepción na Sociedade da documentación na que conste esta. 

O accionista deberá, así mesmo, notificar á Sociedade, por escrito ou por medios electrónicos, tanto o nomeamento dun representante como, se é o caso, a revogación deste. 

A comunicación á Sociedade do nomeamento de representante entenderase efectuada: (i) mediante o envío, por correspondencia postal, da tarxeta de asistencia, delegación e voto á atención da Oficina de Información ao Accionista; (ii) mediante o outorgamento polo accionista da súa representación a través da páxina web da Sociedade (www.repsol.com) ou ben; (iii) mediante a presentación polo representante da tarxeta de asistencia, delegación e voto nos rexistros de entrada de accionistas no lugar e día sinalados para a realización da Xunta. 

Pódese revogar a representación conferida?

A representación é sempre revogábel. A asistencia persoal á Xunta do representado, ou o exercicio por parte do indicado accionista do voto a distancia, tanto por medios electrónicos coma por vía postal, supón a revogación de calquera delegación, con independencia da súa data.

Como se pode conferir a representación por medios de comunicación a distancia?

Os medios de comunicación a distancia válidos para conferir a representación son a correspondencia postal e os medios electrónicos. 

Correspondencia postal 

Para conferir a súa representación por correspondencia postal, os accionistas deberán 
cubrir a sección correspondente a "Delegación" da tarxeta de asistencia, delegación e voto que lles facilite a entidade participante de IBERCLEAR na que teñan depositadas as súas accións ou, cubríndoa debidamente, do modelo de tarxeta dispoñíbel na páxina web da Sociedade (www.repsol.com) e na Oficina de Información ao Accionista. 

A dita sección deberá ser asinada -con sinatura manuscrita- polo accionista e debe facerse chegar á Sociedade, á atención da Oficina de Información ao Accionista, Paseo de la Castellana n.º 278, 28046 Madrid, ou ao representante designado para a súa presentación o día de realización da Xunta Xeral. 

Medios electrónicos 

O accionista poderá conferir a súa representación a través da páxina web da Sociedade (www.repsol.com), accedendo ao espazo dedicado á Xunta Xeral de Accionistas 2012 e seguindo o procedemento alí estabelecido, sempre que dispoña dun DNI electrónico ou unha sinatura electrónica recoñecida ou avanzada baseada nun certificado electrónico recoñecido e vixente, emitido pola Entidade Pública de Certificación Española (CERES), dependente da Fábrica Nacional de Moeda e Timbre, e se identifique mediante calquera dos devanditos dispositivos.

Cal é o prazo para a recepción das representacións conferidas?

Para a súa validez, a representación conferida por correspondencia postal ou por medios electrónicos deberá ser recibida pola Sociedade antes das 09.00 horas do día 29 de maio de 2012. Con posterioridade, a Sociedade unicamente admitirá as representacións conferidas por escrito mediante as tarxetas de asistencia, delegación e voto que se presenten nos rexistros de entrada de accionistas o día de realización da Xunta Xeral de accionistas.

Que acontece se no documento da representación que se recibe na Sociedade non consta o nome do representante?

Cando o documento da representación se reciba na Sociedade co nome do representante en branco, a representación entenderase conferida ao presidente do Consello de Administración e, en ausencia deste, ao secretario da Xunta Xeral Ordinaria de accionistas.

Que acontece se no documento no que consta a representación non se marcan as casas de instrucións?

Nos documentos nos que consten as representacións, reflectiranse as instrucións de voto, entendéndose que, de non se marcar as correspondentes casas de instrucións, o representado imparte instrucións precisas de votar a favor das propostas de acordo formuladas polo Consello de Administración.

Que acontece coas propostas de acordo non formuladas polo Consello de Administración ou os asuntos que, aínda que non figuren na orde do día da reunión, poidan ser sometidos a votación na Xunta por así permitilo a lei?

Salvo indicación contraria do accionista representado, o apoderamento esténdese ás propostas de acordo non formuladas polo Consello de Administración ou aos asuntos que, aínda que non figuren na orde do día da reunión, poidan ser sometidos a votación na Xunta por así permitilo a lei. Neste caso, se o accionista non indica outra cousa, entenderase que imparte instrucións precisas ao representante de votar en sentido negativo. 

Para os efectos do disposto nos artigos 523 e 526 da Lei de sociedades de capital, infórmase do seguinte: (i) o presidente do Consello de Administración e o resto de membros do Consello poderán encontrarse nunha situación de potencial conflito de intereses respecto dos puntos segundo (Exame e aprobación, se procede, da xestión do Consello de Administración de Repsol YPF, S.A. correspondente ao exercicio social 2011) e décimo quinto (Votación consultiva do Informe sobre a Política de Retribucións dos Conselleiros de Repsol YPF, S.A.) da orde do día; (ii) os conselleiros cuxa reelección se propón baixo os puntos sétimo (Reelección como Conselleiro de D. Isidro Fainé Casas) e oitavo (Reelección como Conselleiro de D. Juan María Nin Génova) da orde do día encóntranse en conflito de intereses nos devanditos puntos; e (iii) no caso de que, por así permitilo a lei, sexan sometidos á Xunta algunha ou algunha das propostas ás que se refiren as alíneas b. (destitución, separación ou cesamento) ou c.(exercicio da acción social de responsabilidade) do artigo 526 da Lei de sociedades de capital, o conselleiro ou conselleiros afectados polas devanditas propostas encontraríanse en conflito de intereses na votación destas.

Como se pode votar a través de medios de comunicación a distancia?

Os medios de comunicación válidos para a emisión do voto a distancia son a correspondencia postal e os medios electrónicos. 

Correspondencia postal 

Para a emisión do voto por correspondencia postal en relación cos puntos comprendidos na orde do día, os accionistas deberán cubrir e asinar a sección correspondente a "Voto a distancia" da tarxeta de asistencia, delegación e voto expedida pola entidade participante de IBERCLEAR na que teñan depositadas as súas accións ou, cubríndoa debidamente, do modelo de tarxeta dispoñíbel na páxina web da Sociedade (www.repsol.com) e na Oficina de Información ao Accionista. 

Unha vez cuberta e asinada -con sinatura manuscrita- a tarxeta na sección correspondente, o accionista deberá facela chegar á Sociedade, á atención da Oficina de Información ao Accionista, Paseo de la Castellana n.º 278, 28046 Madrid. 

Medios electrónicos

O accionista poderá emitir o seu voto en relación cos puntos da orde do día da Xunta Xeral, a través da páxina web da Sociedade (www.repsol.com), accedendo ao espazo dedicado á Xunta Xeral de Accionistas 2012, e seguindo o procedemento alí establecido, sempre que dispoña dun DNI electrónico ou unha sinatura electrónica recoñecida ou avanzada, baseada nun certificado electrónico recoñecido e vixente, emitido pola Entidade Pública de Certificación Española (CERES), dependente da Fábrica Nacional de Moeda e Timbre, e se identifique mediante calquera dos devanditos dispositivos.

Cal é o prazo para a recepción dos votos a distancia?

Para a súa validez, o voto emitido por correspondencia postal ou por medios electrónicos deberá ser recibido pola Sociedade antes das 09.00 horas do día 29 de maio de 2012. Con posterioridade, a sociedade unicamente admitirá os votos presenciais emitidos no acto da Xunta.

Que acontece se, en relación con algún dos puntos da orde do día, o accionista que emita o seu voto a distancia non marcase algunha das casas destinadas para o efecto?

Se, en relación con algún dos puntos da orde do día, o accionista que emita o seu voto a distancia non marcase algunha das casas destinadas para o efecto, entenderase que vota a favor da correspondente proposta de acordo formulada polo Consello de Administración.

Cales son as regras de prelación aplicábeis á representación e o voto a distancia?

A asistencia persoal á Xunta Xeral do accionista que tivese delegado ou votado a distancia previamente, con independencia do medio empregado, deixará sen efecto a devandita delegación ou voto. 

A representación quedará revogada no caso de que o accionista representado emita un voto a distancia. 

O voto emitido e a representación conferida mediante comunicación electrónica prevalecerán fronte aos emitidos por correspondencia postal.

Que requisitos deben cumprirse para que a Xunta Xeral sexa constituída de forma válida?

A Xunta Xeral queda constituída de forma válida en primeira convocatoria, cando os accionistas, presentes ou representados, posúan, polo menos, o 25% do capital subscrito con dereito a voto. 

En segunda convocatoria, é válida a constitución da Xunta Xeral calquera que sexa o capital concorrente a esta. 

Para que a Xunta Xeral Ordinaria ou Extraordinaria, poida acordar validamente, a emisión de obrigas, o aumento ou a diminución do capital e a transformación, fusión, escisión ou disolución da sociedade e, en xeral, calquera modificación dos Estatutos sociais, será necesaria, en primeira convocatoria, a concorrencia de accionistas presentes ou representados que posúan, polo menos, o 50% do capital subscrito con dereito a voto. En segunda convocatoria, será suficiente a concorrencia do 25% do devandito capital.

Cando pode acordar a Xunta Xeral de forma válida a modificación dos Estatutos Sociais?

A Xunta Xeral pode acordar de forma válida a modificación dos Estatutos Sociais co voto favorábel da maioría do capital con dereito a voto presente e representado na Xunta sempre que en primeira convocatoria concorran accionistas presentes ou representados que posúan, polo menos, o 50% do capital subscrito con dereito a voto. Cando en segunda convocatoria concorran accionistas que representen menos do 50% do capital subscrito con dereito a voto, os acordos de modificación dos Estatutos Sociais só poderán adoptarse de forma válida co voto favorábel dos dous terzos do capital presente ou representado na Xunta.

Quen preside a Xunta Xeral de Accionistas?

A Xunta Xeral é presidida polo presidente do Consello de Administración; en ausencia deste, por un vicepresidente e, en ausencia deste, polo accionista que en cada caso elixan os accionistas asistentes á reunión. 

O presidente estará asistido por un secretario, que será o do Consello de Administración; en ausencia deste, actuará o vicesecretario do Consello de Administración e, en ausencia deste, a persoa que designe a propia Xunta.

Poden intervir os accionistas ao longo da Xunta Xeral de Accionistas?

O presidente, antes de comezar co seu informe sobre o exercicio e as propostas que se someten á Xunta Xeral, e para facilitar o desenvolvemento do acto, solicita que os accionistas que queiran facer uso da palabra se dirixan aos auxiliares da Mesa mostrando a súa tarxeta de asistencia para organizar as quendas de intervención. 

Unha vez finalizada a exposición do presidente sobre os aspectos máis relevantes do exercicio, este concede a palabra aos señores accionistas que o solicitasen, dirixindo e mantendo o debate dentro dos límites da orde do día, salvo o disposto nos artigos 223.1 e 238 da Lei de sociedades de capital. O presidente poñerá fin ao debate cando o asunto quede, ao seu xuízo, suficientemente debatido.

Como se acadan os acordos na Xunta Xeral de Accionistas?

Os acordos deben adoptarse co voto favorábel da maioría de capital con dereito a voto, presente e representado na Xunta, coas excepcións previstas na lei e nos estatutos. 

Salvo que o presidente dispoña outra cousa, o proceso de adopción de acordos desenvolverase seguindo a orde do día prevista na convocatoria. En primeiro lugar, someteranse a votación as propostas de acordo que en cada caso tivese formulado o Consello de Administración e, a continuación, se procede, votaranse as formuladas por outros accionistas seguindo unha orde de prioridade temporal. En todo caso, aprobada unha proposta de acordo, decaerán automaticamente todas as demais relativas ao mesmo asunto que sexan incompatíbeis con ela, sen que, polo tanto, proceda sometelas a votación. Se se tivesen formulado propostas relativas a asuntos sobre os que a Xunta poida resolver sen que consten na orde do día, o presidente decidirá a orde na que serán sometidas a votación. 

Por regra xeral, e sen prexuízo de que, a xuízo do presidente, poida empregarse o sistema de votación por aclamación ou man alzada ou outros sistemas alternativos, a votación das propostas de acordos realizarase conforme ao seguinte procedemento: 

(i) A votación das propostas de acordos relativas a asuntos comprendidos na orde do día efectuarase mediante un sistema de dedución negativa. Para estes efectos, consideraranse votos a favor os correspondentes a todas as accións presentes e representadas, unha vez deducidos (a) os votos correspondentes ás accións cuxos titulares ou representantes manifesten que votan en contra ou se absteñen, mediante a comunicación ou expresión do seu voto ou abstención ao notario (ou, na súa ausencia, ao secretario ou persoal que o asista), para a súa constancia en acta, (b) os votos correspondentes ás accións cuxos titulares votasen en contra ou manifestasen expresamente a súa abstención, a través dos medios de comunicación a distancia considerados como válidos conforme a este regulamento e (c) os votos correspondentes ás accións cuxos titulares ou representantes abandonasen a reunión con anterioridade á votación da proposta de acordo de que se trate e deixasen constancia de tal abandono ante o notario (ou, na súa ausencia, ante o secretario da sesión ou persoal que o asista). 

(ii) A votación das propostas de acordos relativas a asuntos non comprendidos na orde do día efectuarase mediante un sistema de dedución positiva. Para estes efectos, consideraranse votos contrarios os correspondentes a todas as accións presentes e representadas, deducidos (a) os votos correspondentes ás accións cuxos titulares ou representantes manifesten que votan a favor ou se absteñen, mediante a comunicación ou expresión do seu voto ou abstención ao notario (ou, na súa ausencia, ao secretario ou persoal que o asista) para a súa constancia en acta e (b) os votos correspondentes ás accións cuxos titulares ou representantes abandonasen a reunión con anterioridade á votación da proposta de acordo de que se trate e deixasen constancia de tal abandono ante o notario (ou, na súa ausencia, ante o secretario da sesión ou persoal que o asista). 

(iii) As comunicacións ou manifestacións ao notario ou ao secretario previstas nas dúas alíneas precedentes relativas ao sentido do voto ou abstención poderán realizarse de xeito individual con relación a cada unha das propostas de acordos ou conxuntamente para varias ou para todas elas, expresando ao notario (ou, na súa ausencia, ao secretario da sesión ou persoal que o asista) a identidade e condición (accionista ou representante) de quen as realiza, o número de accións ás que se refiren e o sentido do voto ou, se é o caso, a abstención. 

(iv) Para a adopción de acordos relativos a asuntos non comprendidos na orde do día, non se considerarán como accións presentes, nin tampouco representadas, as daqueles accionistas que tivesen participado na Xunta a través de medios de votación a distancia previos á realización da Xunta. Así mesmo, para a adopción dalgún dos acordos aos que se refire o artigo 526.1 da Lei de sociedades de capital, non se considerarán como representadas, nin tampouco como presentes, aquelas accións respecto das cales non se poida exercitar o dereito de voto por aplicación do estabelecido no devandito precepto.

Como se aproba a acta da Xunta Xeral?

A acta da Xunta poderá ser aprobada pola propia Xunta despois de ter lugar a Xunta e, se non, dentro do prazo de quince (15) días, polo presidente da Xunta e dous interventores, un en representación da maioría e outro pola minoría. A acta aprobada de calquera destas dúas formas terá forza executiva a partir da data da súa aprobación. 

En caso de que a Xunta tivese lugar coa presenza de notario, a acta notarial terá a consideración de acta da xunta e, por tanto, non será necesaria a súa aprobación e os acordos que consten nela poderán executarse a partir da data do seu peche. 

É habitual que o Consello de Administración, conforme ao previsto no artigo 203 da Lei de sociedades de capital, requira a presenza de notario na Xunta Xeral para levantar acta da reunión. Así mesmo, o Consello de Administración estará obrigado a facelo cando o soliciten accionistas que representen, polo menos, o 1% do capital social.

Que obxectivo ten o Foro?

O Foro habilítase co fin de facilitar a comunicación entre os accionistas da Sociedade con ocasión da convocatoria e ata a realización de cada Xunta Xeral de accionistas. Os accionistas poderán acceder a este a través da páxina web corporativa (www.repsol.com) con ocasión da convocatoria e ata a realización da Xunta Xeral de accionistas.

Quen pode utilizar o Foro Electrónico de accionistas?

O acceso e uso do Foro queda reservado exclusivamente aos accionistas individuais da Sociedade, así como ás asociacións voluntarias de accionistas validamente constituídas e inscritas no rexistro especial habilitado para este efecto na Comisión Nacional do Mercado de Valores conforme ao disposto no artigo 539.2 da Lei de sociedades de capital e a súa normativa de desenvolvemento.

Como podo acceder ao Foro?

Para acceder ao Foro, os accionistas deberán obter a través da páxina web (www.repsol.com) unha clave de acceso específica, seguindo para isto as instrucións e condicións de uso do Foro que para este efecto figuran no espazo dedicado á Xunta Xeral de Accionistas 2012. A acreditación para obter a clave poderá facerse, con carácter xeral, ben a través do DNI electrónico ou ben a través dunha sinatura electrónica recoñecida ou avanzada, baseada nun certificado electrónico recoñecido e vixente, emitido pola Entidade Pública de Certificación Española (CERES), dependente da Fábrica Nacional de Moeda e Timbre.

Que tipo de comunicacións podo enviar?

No Foro poderán publicarse: 

• Propostas sobre novos puntos da orde do día que pretendan presentarse como complemento á convocatoria da Xunta Xeral ordinaria, acompañando a correspondente xustificación ou proposta de acordo xustificada. 
  
• Solicitudes de adhesión a tales propostas. 
  
• Iniciativas para alcanzar a porcentaxe suficiente para exercer un dereito de minoría previsto na lei (por exemplo, propoñer un complemento á convocatoria da xunta cando se é titular de, polo menos, un 5% do capital social). 
  
• Ofertas ou peticións de representación voluntaria. 
  
  Igualmente, os accionistas poderán presentar, no prazo e forma sinalados, propostas fundamentadas de acordos sobre asuntos xa incluídos ou que deban incluírse na orde do día.   

Como podo, a través do Foro Electrónico, exercitar os meus dereitos como accionista?

En relación con todos os dereitos e facultades (de información, de formulación de propostas ou de calquera outra índole) que os accionistas ou, na medida permitida, as asociacións de accionistas, queiran exercitar, estes deberán facelo a través das canles estabelecidas legalmente, conforme ao previsto, se é o caso, na lei, os estatutos ou os regulamentos, as demais normas internas da Sociedade e o anuncio de convocatoria, sen que o Foro sexa, en ningún caso, unha canle válida para estes fins.

Podo realizar notificacións á Sociedade a través do Foro Electrónico?

O Foro non constitúe unha canle de comunicación entre a Sociedade e os accionistas. Ningunha comunicación realizada ou publicada no Foro poderá entenderse en ningún caso como unha notificación á Sociedade para ningún efecto e, en particular, para os efectos do exercicio de calquera dereito do que sexan titulares os accionistas, individual ou colectivamente, nin suplir os requisitos necesarios conforme á lei, os estatutos e os regulamentos e demais normas internas da Sociedade para o exercicio de calquera dos devanditos dereitos ou o desenvolvemento das iniciativas e actuacións dos accionistas.