Repsol YPF

Con esta igualdade á fronte da xeral, ambos os pilotos chegaban a Barcelona dispostos a loitar polo liderado. Pero ambos os dous non debían esquecerse de Adam Raga, Jeroni Fajardo, James Dabill e do compañeiro de Bou no Repsol Montesa Honda, o xaponés Takahisa Fujinami.

Na manga clasificatoria, Toni Bou deu un aviso aos seus competidores, impóndose con autoridade e sen cometer erros. Bou completou o paso polas cinco zonas sen marcar un punto, anotándose o único cero total. A continuación do piloto Repsol, terminou Cabestany, que marcou un 5 na terceira zona. Takahisa Fujinami foi terceiro, despois de marcar 2 puntos na zona dúas, 2 máis na zona tres, e un 5 na cuarta.

Estes tres pilotos, xunto a Fajardo, pasaron directamente a semifinais, onde de novo Toni Bou volveu marcar as diferenzas. O de Piera sumou un novo cero nas tres zonas, mentres que o resto de rivais marcaban 15 puntos a excepción de James Dabill, con 12. Na carreira paralela, Toni Bou cedeu a vitoria fronte a Fajardo, mentres que Fujinami vencía na súa disputa con Gubian.

E na gran final, disputada entre Toni Bou, Takahisa Fujinami, Albert Cabestany e James Dabill, Bou seguiu mantendo o seu impecable ritmo. O do Repsol Montesa Honda volveu marcar tres ceros consecutivos, mentres os seus rivais seguían sumando puntos. Na cuarta e última zona da proba de Barcelona, a dos troncos, Bou sumou un 5 tras fallar na entrada á zona. Con todo xa decidido, o fallo foi algo anecdótico para pechar unha actuación impecable do piloto Repsol. Esta nova vitoria, e a segunda posición final de Albert Cabestany, permiten a Toni Bou recuperar o liderado da posición xeral, con cinco puntos de vantaxe sobre o seu compatriota.

Takahisa Fujinami, protagonista dunha intensa loita pola terceira posición do podio xunto a James Dabill, finalmente tivo que conformarse coa cuarta posición, despois de sufrir algúns problemas técnicos co freo traseiro da súa moto que lle impediron loitar co británico polo terceiro posto final. Co seu cuarto posto, o xaponés do Repsol Montesa Honda mantén a súa sexta posición na clasificación xeral.

A cuarta e penúltima proba puntuable para o Campionato do Mundo de Trial Indoor disputarase o día 13 de marzo en Madrid.

Toni Bou
“Estou moi contento porque soñaba cunha carreira como esta, na que me saíu todo. Considero que hoxe fixen unha gran carreira, porque tiña moita presión polo axustado que estaba o Mundial e polo feito de correr en casa, que sempre é complicado. A miña pilotaxe foi incrible grazas a que a moto funcionou moi ben, e o traballo do equipo durante toda a semana foi perfecto, o que me permitiu ter unha moto ben preparada para este tipo de zonas. Sen unha boa posta a punto en Barcelona non se pode gañar, e este resultado é a mellor maneira de agradecerlles o seu esforzo. Na final, notouse moito a cantidade de po nas zonas, o que complicou moito o poder arrincar con forza e fixo que fose moi difícil.”

Takahisa Fujinami
“Foi unha carreira bastante diferente da que fixo Toni Bou, porque tivemos moitos chanzos e pasos moi altos nos que só é capaz de pasar el. Persoalmente, estou contento co meu rendemento, aínda que tiven algúns problemas co freo traseiro que me prexudicaron ao final, especialmente en zonas que me gustaban moito. Foi unha mágoa, porque na manga de clasificación pasei ben pero na final, debido a este problema, foi moito máis complicado. Quedei a un punto do podio e é unha mágoa. Non estou moi contento, pero o rendemento foi mellor que noutras ocasións.”

Ligazóns de interese:
• Todo sobre o Mundial de Trial Indoor
• Así está a clasificación
• As mellores imaxes do Mundial

01/02/2010

Últimas noticias

> Segunda posición de Toni Bou no Trial Indoor de Marsella
> Vitoria de Toni Bou na primeira proba do Campionato do Mundo de Trial Indoor