Repsol YPF

Se estás pensando en construír unha vivenda, merece a pena que valores as novas iniciativas concibidas desde a bioconstrución e a sostibilidade, así como as propostas dalgúns arquitectos que conciben os seus proxectos a partir de materiais reciclados. Latas de aluminio, botellas de vidro e conforman os muros das vivendas que constrúe o arquitecto Michael Reynolds, que leva máis de tres décadas levantando casas en Norteamérica con estes materiais, debidamente aliñados (ao igual que se colocan os ladrillos), oportunamente encaixados con terra da zona onde se empraza a vivenda, e cubertos ao completo con adobe. 

Non é necesario, porén, viaxar ata o continente americano para descubrir vivendas con materiais reciclados. En España, existen proxectos realizados con contedores de porto, raíles e outros elementos aproveitables para levantar casas a partir de materiais recuperados, é dicir, procedentes do lixo industrial ou urbano. Desta forma a construción causa un efecto positivo no ambiente, xa que contribúe a rexenerar os residuos, empregándoos nas novas edificacións residenciais. 

Por citar un exemplo do exposto, o estudo Infiniski, formado polo arquitecto colombiano Mauricio Galeano e o español Jaime Gaztelu, constrúe vivendas con materiais reciclados, recuperados, verdes e non contaminantes nun 80%, coas mesmas garantías de calidade que os materiais tradicionais. Aceiro e aluminio reciclados, contedores de barco, illante de celulosa reciclada, madeiras nobres recuperadas…, son algúns dos materiais que emprega Infiniski para levantar casas a prezos moi competitivos. 

Onde debes acudir

Se estás interesado en construír a túa casa con materiais reciclados e reciclables aconsellámoste que te informes a conciencia antes de deixar o teu proxecto en mans de oportunistas, pois non é ouro todo o que reluce neste universo solidario e verde. É conveniente que te dirixas á área de Medio Ambiente das institucións locais ou rexionais do teu concello ou cidade. Alí poden facilitarte o nome dalgunha entidade ou asociación que te poida ofrecer a documentación necesaria para o teu proxecto, con listas de provedores e arquitectos afíns á construción sostible. 

A información facilitada desde as institucións dependerá do nivel de implicación que a propia corporación teña con este tipo de temas. O Centre Català del Reciclatje, por exemplo, conta cunha iniciativa denominada Red Compra Reciclado, un espazo de encontro virtual entre ofertantes e demandantes de produtos reciclados, reciclables e/ou biodegradables, creado para dinamizar o consumo e a comercialización destes produtos.  

Dous contactos interesantes son tamén a Asociación Española de Bioconstrución e a empresa Biohaus Goierri. A primeira é unha organización sen ánimo de lucro que reúne a bioconstrutores, arquitectos, urbanistas, deseñadores e outros profesionais que promoven prácticas ambientais responsables e saudables na construción;
Biohaus Goierri é o primeiro almacén de materiais de construción ecolóxicos que se abriu en España en 1997. Ten a súa sede en Alsasua (Navarra) e traballa coas principais marcas europeas en materiais e sistemas para a construción sostible. É provedor de produtos illantes, de estruturas e taboleiros de madeira, de pinturas naturais, de morteiros e revoques, de conectores para madeira, de ventás de madeira, etc. Esta empresa está constituída por profesionais da bioconstrución e a construción en madeira que desenvolveron os seus traballos en Centroeuropa, así como enxeñeiros, arquitectos técnicos e especialistas con formación e moita experiencia no sector. 

Artigos relacionados:

- Axudas para vivendas ecolóxicas

- As 10 claves do fogar sostible