Repsol YPF

O arrendamento de prazas de garaxe converteuse nun negocio boiante na última década, xa que é un produto que actualmente ten unha gran demanda debido ao problema de aparcamento existente en practicamente todas as cidades españolas, e especialmente nas grandes urbes. A busca de solucións e fórmulas para resolver esta dificultade pasa por arrendar por horas ou por intercambiar prazas de garaxe entre persoas que se teñen que trasladar diariamente ás mesmas zonas. 

Algúns concellos inclúen nos seus websites listaxes cos residentes que precisan arrendar prazas de garaxe durante franxas horarias concretas para que poidan ser contactados por outros coas mesmas necesidades. Desta forma, os usuarios poden chegar a acordos para intercambiar as súas prazas de garaxe ou para arrendalas por horas, en virtude das súas necesidades. Tamén existen varios portais de Internet especializados neste tipo de servizos que actúan de intermediarios. Algúns dos máis visitados son: www.compartirparking.com, www.buscogaraje.com, www.parkingparacompartir.com e www.plazas-garaje.com. O custo do arrendamento por horas depende da cidade e da zona, e así en localidades pequenas o prezo non acostuma superar os 60 euros ao mes (as máis elevadas), mentres que nas áreas máis caras de Madrid, o custo mensual non baixa dos 200 euros.  

O arrendamento dunha praza de garaxe é o gran negocio desta década porque desde o punto de vista xurídico ten múltiples vantaxes. Esta figura non está delimitada pola Lei de Arrendamentos Urbanos, que protexe o inquilino durante un tempo mínimo en canto ao goce da vivenda. Os contratos que fixan o arrendamento dunha praza de garaxe inclúen as condicións pactadas polo arrendador e o arrendatario, sendo bastante flexibles en canto ao tempo de duración e no que respecta á rescisión dos mesmos. Xeralmente, pódense concluír avisando cun mes de antelación a parte contraria, o que dinamiza moito o mercado. 

Os prezos do arrendamento dunha praza de garaxe varían en virtude da cidade e da zona. Nas grandes urbes, en áreas consolidadas, con comercio, oficinas e vivendas, as tarifas son moi elevadas e poden chegar a acadar os 200 euros. Porén nos barrios novos, onde as construcións acostuman incluír aparcadoiro ou onde é máis fácil atopar aparcadoiro, o arrendamento dunha praza de garaxe non acostuma superar en ningún caso os 80 euros. No centro dunha cidade de tamaño medio, a tarifa mensual oscila os 90 euros, mentres que en localidades pequenas, os prezos van dos 20 aos 60 euros mensuais. 

Outra solución pode ser a compra da praza de garaxe. Se estás neste caso, saberás que o prezo da mesma segue un comportamento similar ao do mercado inmobiliario. E así, o custo medio sitúase nos 30.000 euros, unha cantidade que se pode incrementar ata os 100.000 euros en San Sebastián e os 120.000 euros en Madrid, ou que se pode reducir aos 12.000 euros en Pontevedra. A compra dunha praza de garaxe implica o pagamento anual duns 70 euros de contribución ao Imposto sobre Bens Inmobles (IBI) e o abonamento mensual en concepto de gastos de comunidade (luz, auga, vixilante, ascensor...), unha cantidade que depende do tipo de aparcadoiro e dos servizos e prestacións que ofreza.

Artigos relacionados:

- Aparcadoiros robotizados   

- A contabilidade na comunidade de veciños