Repsol YPF

A clave dun bo ventilador de teito está na perfecta combinación do volume de ar que move e na eficiencia enerxética, característica que vén determinada pola potencia do motor que incorpora o aparello. Un motor de baixa potencia consume menos enerxía que outro con potencia superior, pero tamén o movemento do ar pode ser ineficaz, de forma que non se logre o nivel de frescor desexado.

Antes de adquirir un ventilador de teito, toma as medidas da habitación na que o vas instalar e consulta ao provedor acerca do produto que mellor se adapta ás túas necesidades. As opcións en canto ao tamaño do aparello acostuman estar entre os 107 e os 132 centímetros (de punta a punta da aleta), para axustarse a estancias de tamaño pequeno, mediano ou grande. Tamén debes informar o profesional acerca do tipo de teito do que se colgará o ventilador, pois non todos admiten o peso destes elementos, e en calquera caso, estaraslle dando pistas imprescindibles para a súa correcta instalación.  
 

Silenciosos e sen balanceos 

Dous aspectos fundamentais que debes valorar antes de comprar un ventilador de teito son o nivel de ruído e o balanceo. Non te deixes enganar con produtos de aparencia atractiva. Comproba a súa robustez, os materiais das palas, as unións destas co dispositivo central, e próbao antes de levalo ao teu fogar. Se detectas un zunido, será o ruído que te acompañará cando o poñas en marcha na túa casa. É de vital importancia que o teu ventilador sexa silencioso, pois o ruído que producen algúns modelos, constitúe a queixa máis repetida e habitual do consumidor con respecto a estes aparellos, e ao mesmo tempo, é un dos detalles que te servirán para saber se estás perante unha proposta de calidade. Xeralmente un ventilador de teito silencioso acostuma ser unha opción ben concibida e desenvolvida con rigor. É un dato evidente de que o fabricante non aforrou custos en canto a materiais e sistemas idóneos para garantir a ausencia de ruído e de balanceo. O prezo tamén será un valor a ter en conta. O rango de tarifas dos ventiladores de teito vai dos 100 aos 1.000 euros, aproximadamente. Dificilmente un aparello moi barato poderá satisfacer as necesidades de calidade requiridas.  

Obxectos decorativos  

Cando comprobes que o ventilador cumpre cos requisitos esixidos, poderás fixarte noutras cuestións, como a estética, as cores e os acabados, para escoller o modelo que mellor se adapte á decoración da estancia na que vas colocalo. Coloniais, ao máis puro estilo Hemingway; rústicos, con aspas de madeira de diferentes procedencias e texturas; modernos, con aspas de aluminio ou policarbonato en cores diversas compoñen unha interesante gama de opcións. Algúns dos mellores na actualidade son os deseñados por creadores de prestixio, como o italiano Ferdi Giardini que desenvolveu o modelo Blow hai máis de dez anos; o norteamericano Ron Rezec, fundador de Modern Fan Co., especialista en ventiladores de teito modernos, ou o equipo da norteamericana Hunter, unha das grandes empresas do sector, con infinidade de propostas e deseños de excelente calidade.

Hai versións con luz e sen luz, e con distintos tipos de mecanismos de activación. Están os que funcionan tirando das cadeas que colgan do aparello, e os máis prácticos, que se poñen en marcha a través dun mando a control remoto co que tamén podes regular as distintas velocidades, e o acendido ou apagado da luminaria.  

Artígos relacionados

- Camas para gañar espazo

- A túa casa, a través do espello