Repsol YPF

Antes de construír a túa piscina, debes valorar as vantaxes e inconvenientes das distintas tipoloxías, segundo a súa estrutura e revestimento, e segundo a superficie e o tipo de terreo do que dispós. Aconsellámoste que consultes cos teus amigos e coñecidos acerca da súa propia experiencia, así como con un arquitecto, aparellador ou especialista na materia. É moi recomendable que pidas orzamentos en varias empresas.

As piscinas de obra pódense construír con formigón clásico, formigón de gunita ou co sistema de encofrados perdidos de formigón armado. As dúas últimas estruturas son, en opinión dos profesionais, as máis validas para a construción deste tipo de piscinas por ser sistemas máis resistentes, impermeables e durables que os aplicados con formigón clásico. 

Así, as realizadas en formigón de gunita, incorporan revestimento vítreo (gresite), o que prolonga o tempo de execución da obra; aínda que presenta o inconveniente do mantemento das xuntas: hai que extremar a súa limpeza para que non se depositen nas mesmas bacterias, algas e calquera tipo de materia orgánica, sucidade ou residuos. Non obstante, para moitos usuarios a beleza do acabado en gresite non é comparable con ningún outro tipo de revestimento. O sistema de encofrados perdidos de formigón armado, pola súa parte, revístese con liner, lámina armada de policloruro de vinilo de PVC, dúctil e flexible. 

Prefabricadas: de aceiro ou poliéster

Esta tipoloxía de piscinas salienta pola rapidez da súa execución (de 10 a 15 días) e porque resulta máis económica que a de obra. Non obstante, a súa gran desvantaxe radica na decoloración da superficie pola acción do sol e polos produtos químicos. Se te decides por unha piscina de aceiro con revestimento liner, debes optar por un liner reforzado e termosoldado, en cor branco. Se non é termosoldado, é dicir, liner nunha soa peza coa forma da estrutura, a piscina non se poderá baleirar a non ser que realice este labor o servizo técnico da empresa, o cal actuará coa eficacia necesaria para evitar a formación de engurras.

No caso de que elixas unha piscina de poliéster e fibra de vidro, debes fixarte, en opinión dos expertos, na correcta e minuciosa preparación do terreo: este debe incorporar capas de grava na base e no perímetro onde se asente o vaso da estrutura para impedir o contacto directo coas terras e, especialmente, coa humidade das mesmas.  

Piscinas naturalizadas: como bañarse nun estanque 

Esta modalidade imponse pouco a pouco en España, a medida que progresan os hábitos ecolóxicos, máis arraigados en Alemaña ou Austria, países onde as piscinas naturalizadas instálanse desde hai máis de quince anos, e nos que contan con empresas que patentaron excelentes sistemas para a súa execución rápida e eficaz .

Este tipo de piscina non require produtos químicos. O seu funcionamento baséase na capacidade de filtración que teñen algunhas plantas aptas para esta función, e na colocación de filtros de grava e area que se sitúan na zona denominada “de rexeneración”. Esta área, de pouca altura, é o lugar no que se plantarán as especies acuáticas depuradoras e filtrantes oportunas, e colocaranse os predadores naturais, como as ras, as libélulas voadoras, os zancudos de auga, etc., que se alimentarán dos molestos mosquitos. Non obstante, se te decides por unha piscina naturalizada, debes ter en conta que para conseguir unha área de natación equivalente á que proxectases cunha piscina tradicional, precisarás o dobre de espazo, xa que practicamente a metade da piscina debe destinarse ao proceso de rexeneración.  

Artigos relacionados:

- Piscinas ecolóxicas