Repsol YPF

As piscinas de poliéster  son unha boa alternativa para que poidas gozar dun refrescante baño diario na túa vivenda. E aínda estás a tempo de ter a túa propia para este verán, xa que no mercado existen modelos que se instalan en menos dunha semana. 

O poliéster é unha resina termoplástica obtida a partir da reacción química do estireno e outros produtos químicos, cuxas principais calidades son a durabilidade, a resistencia e a impermeabilidade. As aplicacións do poliéster son de gran utilidade en practicamente todos os sectores industriais, pola súa gran resistencia á humidade e aos impactos e axentes ambientais. Láminas, contedores, fibras, recubrimentos e todo tipo de pezas de poliéster forman parte dos obxectos, elementos e estruturas que utilizamos a diario e, por suposto, este material tamén está presente no sector das piscinas, mercado que se apuntou á innovación, ao avance tecnolóxico e á construción de vangarda.  

A novidade máis importante no mercado das piscinas nas últimas décadas son as piscinas de poliéster reforzado con fibra de vidro, porque ao ser prefabricadas e estar realizadas nunha soa peza, garanten a súa estanquidade e permiten unha instalación moi rápida. Este material resulta perfecto para todo tipo de execucións que requiran durabilidade, resistencia e impermeabilidade. 

Vantaxes do poliéster 

Entre as vantaxes das piscinas de poliéster salientan o prezo, a estanquidade garantida, a rapidez da súa execución, a sinxela reparación de gretas e roturas, e o fácil mantemento. Ao ser estruturas dunha soa peza, unicamente teñen que introducirse na escavación; este traballo acostuma levar de catro a cinco días, o que o converte nun proceso de instalación moi rápido.

Unha vez que te decidises por un modelo en concreto de piscinas de poliéster, debes ser especialmente coidadoso na fase de preparación do terreo para o asentamento do vaso. Segundo indican os expertos, o terreo debe incorporar capas de grava na base e en todo o perímetro, para que o vaso se asente correctamente e para impedir o seu contacto directo coa terra e, en especial, coa humidade da mesma.
 
Coa túa piscina ben instalada, só te falta atender os consellos do instalador ou do fabricante en canto ao seu mantemento, e xa podes comezar a gozar duns merecidos mergullos estivais.

Artigos relacionados:

- Piscinas climatizadas