Repsol YPF

A gripe é unha enfermidade infecciosa causada por un virus. Propágase dunha persoa a outra ao tusir e espirrar pero tamén é posible que alguén se infecte ao tocar algo que contén o virus e logo levar a man á boca ou o nariz. Os adultos poden infectar a outras persoas desde un día antes de que se presenten os síntomas ata 7 días despois de contraer a enfermidade. É dicir, pódese transmitir a gripe antes de saber que un mesmo está enfermo. 

O sistema respiratorio altérase, a tuse acostuma ser intensa, acompañada de dores de garganta e de cabeza, aparecen a febre e as dores musculares e o organismo queda rendido e sen forzas. Propágase rapidamente e aínda que as persoas que se atopan en bo estado físico non acostuman ter problemas para se recuperar, aquelas de idade avanzada ou os nenos poden estar suxeitos a maiores complicacións se contraen esta patoloxía. 

No seu tratamento os antibióticos non resultan eficaces e tan só queda a resignación de agardar a que transcorran os días e o corpo mellore. Porén, pódense tomar medicamentos que alivien os síntomas da gripe, como antipiréticos para baixar a febre, anticonxestivos nasais ou analxésicos, pero sempre despois de consultarlle ao médico, para non confundir esta enfermidade con outras propias desta época como unha bronquite. 

Grupos de risco
Ao se tratar dunha enfermidade vírica que se cura soa, as medidas preventivas son fundamentais para facer fronte a este proceso patolóxico. Por esta razón, desde o ámbito médico todos os anos lémbrase a importancia de se vacinar, como a mellor maneira de previr esta enfermidade. 

Unha vez que a OMS dispón da información precisa acerca da prevalencia de illamentos de cepas concretas que circulan por todo o mundo, establécese a composición exacta das vacinas que se empregan cada ano. Os meses de outubro ou novembro son o momento idóneo para se vacinar, aínda que tamén pode ser en decembro ou máis tarde xa que a tempada de gripe acostúmase se estender ata finais de maio. A vacinación diríxese principalmente ás persoas maiores de 65 anos, os enfermos crónicos, persoal sanitario de residencias, hospitais e centros de saúde e coidadores que lles atenden. 

Unhas dúas semanas despois da aplicación da vacina, o organismo comeza a producir anticorpos que o protexen contra a infección polo virus da gripe. A vacinación reduce o risco de ingreso hospitalario asociado á gripe nun 50-60% e o risco de morte asociada no 80% nos maiores de 65 anos, se ben a resposta inmune e a efectividade da vacina dependen da idade e do estado inmunitario da persoa que a recibiu.

Por outra parte, existen algúns medicamentos antivirais (como o oseltamivir) aprobados e dispoñibles nas farmacias. Requiren receita e tamén se debe consultarlle ao médico antes de os usar para previr a gripe. 

A alimentación, fundamental
A alimentación xoga un papel básico á hora de estimular o sistema inmunolóxico, o encargado de protexer fronte ás infeccións. Un dos nutrientes esenciais para este mecanismo é a vitamina C, presente nas laranxas, mandarinas, fresas, kiwis, pomelos, así como en verduras coma os pementos ou as coles. 

É importante inxerir alimentos con propiedades antioxidantes que fortalecen o organismo, coma os ricos en vitamina A. Son produtos tanto de orixe animal (a manteiga ou o fígado) coma vexetal, en concreto aqueles que conteñen caroteno e betacaroteno (cenorias, espárragos, cabaza, acelgas, tomates ou mazás). Débese inxerir unha alimentación rica en proteínas, como as que se atopan nas legumes, os froitos secos ou os cereais integrais. O leite quente achega calcio, ferro e proteínas. Nesta mesma liña, os lácteos fermentados, coma é o caso dos iogures, posúen bacterias ácido-lácticas que actúan sobre a flora intestinal e melloran o equilibrio da mesma.

Outros alimentos con propiedades inmunoestimulantes son o allo e a cebola, porque inclúen alicina, con propiedades antivirais e bactericidas. Alimentos coma o peixe, os cereais ou as legumes conteñen selenio, un oligoelemento que só existe en pequenas cantidades na alimentación cotiá pero cuxa deficiencia aumenta o risco de contraer infeccións. Outro tanto sucede co zinc, presente nos mariscos, as legumes, o ovo, o fígado, o queixo curado e os froitos secos.  

Todas estas medidas non garanten a inmunidade fronte a un contaxio de gripe, pero si axudarán a que o organismo estea máis preparado, responda mellor e, conseguintemente, as consecuencias sexan menores. 

Artigos relacionados:

- O deporte: medicina natural

- Sobrepeso: quilos de problemas