Repsol YPF

Nas sociedades industrializadas a maioría dos profesionais non desempeñan un traballo físico na súa ocupación laboral. Así, o noso día a día está marcado por cadeiras, automóbiles ou mostradores, polo que permanecemos sentados ou de pé firme, sen que os nosos músculos e ósos teñan case actividade.

 O sedentarismo propicia a aparición de enfermidades e doenzas. É o caso de problemas relacionados directa ou indirectamente co corazón, co peso, co aparato locomotor ou co equilibrio emocional, que está probado que melloran notabelmente cando o deporte fai acto de presenza.

Enfermidades que melloran
 -A hipertensión: Os beneficios do exercicio son incuestionábeis: algúns estudos falan dun descenso de 10 a 20 mmHg nas horas seguintes a unha actividade física moderada como andar á présa, pasear en bicicleta ou nadar durante media hora. Curiosamente as investigacións tamén revelan que os beneficios son maiores na medida en que a hipertensión é máis severa, xa que o corazón fortalécese e osixénase mellor, o que repercute nun descenso da presión arterial. O deporte mellora a hipertensión, rebaixa as cifras de colesterol e mellora o corazón. Mesmo nas insuficiencias cardíacas, para as que hai tempo se recomendaba repouso, agora aconséllase un plan de exercicios moderado.
 -Diabete Tipo II: Esta enfermidade incrementa notabelmente o risco de sufrir un infarto. Non obstante, o exercicio contribúe a rebaixar os niveis de glicosa no sangue debido a que se produce mellor receptividade á insulina.
- Obesidade:  Co deporte, incrementa o gasto enerxético do corpo e é máis difícil que se acumulen esas reservas que orixinan o sobrepeso.
 -Osteoporose: Trátase dun tipo de fraxilidade ósea propia das mulleres despois da menopausa. A evolución desta enfermidade faise máis lenta  se se realizan exercicios de resistencia como os pesos. Ademais, aquelas mulleres que practicaron deporte ao longo da súa vida teñen unha masa ósea máis desenvolvida.
- Sistema inmunolóxico: Uns largos na piscina ou uns quilómetros sobre a bicicleta melloran o sistema inmunitario. As defensas do organismo estimúlanse e fortalécense, elimínanse mellor as substancias tóxicas, aumenta a produción de endorfinas e diminúe a de catecolaminas e corticoesteroides, procesos que incrementan o número de linfocitos.
- Saúde psíquica: O deporte rebaixa as tensións e axúdanos a desconectar dos problemas causantes do estrés e da ansiedade. Provócanos esa agradábel sensación de cansazo físico que permite relaxarse e que tan distinta resulta do esgotamento mental. Non hai que esquecer que as endorfinas aumentan a sensación de benestar e, como diciamos, a súa secreción medra co deporte.

Deporte con moderación
Por moitas vantaxes que se obteñan da actividade física, resulta temerario lanzarse á estrada, á piscina ou a montaña sen acudir antes ao médico, realizar unha revisión e consultar que tipo de actividade é a máis axeitada en función da idade e do estado de saúde que se teñan.

Para que o deporte sexa eficaz e saudábel resulta fundamental que teña unha intensidade media e que se manteña no tempo. Non vale con cinco minutos diarios ou con tres horas cada 15 días. Hai que practicalo de tres a cinco días á semana durante polo menos 30 minutos.