Repsol YPF

En calquera caso, cada vez son máis os colexios que puxeron en marcha experiencias de ciberaulas. Os profesores virtuais, os encerados electrónicos, as pantallas interactivas ou os pupitres electrónicos comezan a deixar de ser cousa de ciencia ficción para converterse nunha realidade.

Pasaron xa tres anos dende a primeira experiencia española de aula completamente dixitalizada. Foi na escola rural de Ariño (Teruel). A Consellaría de Educación do Goberno de Aragón e Microsoft chegaron a un acordo para dotar de Tablet PC a 16 nenos de cuarto curso de Primaria. Ademais, o tradicional encerado foi substituído por un encerado electrónico.

As Tablet PC están conectadas en rede co ordenador do profesor mediante tecnoloxía sen fíos. Grazas a este sistema, o docente pode enviarlles aos alumnos textos ou gráficos sen necesidade de recorrer a fotocopias ou libros. Os estudantes poden así mesmo navegar por Internet e visitar páxinas relacionadas coa materia que están tratando.

Este proxecto piloto foi todo un éxito e xa hai unha xeración de escolares que está totalmente acostumada a escribir sobre pantallas.

Adaptarse aos tempos
Os colexios deben adoptar todas as innovacións tecnolóxicas para non quedar atrás e adaptarse aos novos tempos. O futuro da educación pasa irremediabelmente polo uso das novas tecnoloxías que, contrariamente ao que xeralmente se pensa, en moitos casos favorecen o rendemento escolar. Un recente estudo da OCDE (Organización para a Cooperación e o Desenvolvemento Económico) poñía de manifesto que os alumnos que usaban de forma regular o ordenador tiñan mellores notas en matemáticas.

Neste contexto, as aulas intelixentes revélanse imprescindíbeis. Basicamente unha aula deste tipo caracterízase por dispoñer de conexión a Internet, encerado electrónico, vídeo proxector dixital, DVD e conectividade a todo tipo de dispositivos portátiles. Ademais, todas as aulas poden estar conectadas mediante unha rede interna ou Intranet, que, entre outras cousas, facilítalles aos alumnos a recepción e o envío de tarefas, programas, temarios, avisos informativos e mensaxes persoais.

Outro modelo de aula intelixente é o que se desenvolveu en Alemaña dentro do proxecto europeo NIMIS (Networked Interactive Media in Schools). Trátase dunha iniciativa da Comisión Europea para impulsar o uso das novas tecnoloxías como ferramentas docentes na educación Infantil e en Primaria. 

As aulas piloto alemás do proxecto NIMIS están dispostas de tal maneira que a luz do exterior non prexudique a visión das pantallas do ordenador. Estas están integradas nos pupitres dos alumnos de forma que poidan ver sen problemas o encerado electrónico no que o profesor escribe mediante un punteiro que substitúe os tradicionais xices. Calquera estudante pode escribir no encerado electrónico sen necesidade de erguerse do seu asento.

Internet na Aula
Pero para que estas innovacións se estendan por todos os colexios son necesarios plans que as impulsen. Un deles é Internet na Aula, no que participan os ministerios de Industria e Educación, xunto á empresa pública Red.es, o Fondo Europeo de Desenvolvemento Rexional e a empresa de certificación AENOR.

Este programa pretende garantir o uso efectivo do equipamento informático existente nos centros educativos e reforzalo con novas dotacións dirixidas especificamente cara ás aulas, así como eliminar as barreiras que dificultan o uso das Tecnoloxías da Información e da Comunicación (TIC) no ámbito educativo ao tempo que se potencia a comunicación das familias cos colexios facendo uso destas.

Os centros que se están beneficiando desta iniciativa son aqueles financiados con fondos públicos de réxime xeral non universitario e de réxime especial, e centros e escolas universitarias de formación de profesores.

As principais actuacións de Internet na Aula diríxense a conectar os centros educativos a Internet de banda ancha e a poñer á súa disposición máis de 50.000 equipos fixos e portátiles para as clases, así como proxectores con pantallas de proxección e encerados interactivos. Tamén se ofrece equipamento adaptado aos alumnos con necesidades educativas especiais e garantía de soporte e mantemento de calidade sobre toda a infraestrutura despregada.

Por outro lado, o programa facilítalles aos pais dos alumnos créditos ao 0% de xuro para a adquisición de ordenadores con acceso a Internet e telecentros co fin de mellorar a comunicación entre eles e os colexios a través das novas tecnoloxías.