Repsol YPF

Desde sempre, a sabedoría popular afirmou que os cambios nas condicións meteorolóxicas influían na dor que padecían os enfermos reumáticos. Hoxe en día está demostrado que a climatoloxía propia da época invernal con choiva ou vento frío inflúe no organismo das persoas xa que deriva en situacións de falta de luz, humidade e frío ambiental. 

Diferentes estudos médicos comprobaron que, nunha porcentaxe superior ao 80% dos casos, existe unha relación entre os cambios meteorolóxicos e a dor e a rixidez articular. Un dos axentes físicos que máis interfire na saúde é a presión barométrica que, ao diminuír, afecta ás terminacións nerviosas e especialmente a quen padece artrose, que co tempo húmido teñen máis dor, mentres que as baixas temperaturas incrementan a dor das persoas que sofren artrite reumatoide. 

A humidade afecta

Ambas enfermidades vénse seriamente afectadas en situacións de elevada humidade. Hai que precisar que vivir nun clima húmido non favorece a aparición de máis casos de artrose que noutras zonas, pero si inflúe na súa sintomatoloxía. De feito, prodúcense casos de artrose en todo o mundo. 

Segundo explican fisioterapeutas e reumatólogos, o corpo humano conta cuns baroreceptores, unhas conexións que serven para interceptar a dor e que cambian segundo a presión barométrica, facendo que o organismo sexa máis sensible ás dores. Un exemplo atópase en diversos estudos médicos nos que se revela que as persoas con artrose de xeonllo sofren máis dor cando baixan as temperaturas ou cambia a presión atmosférica.

No estado español, preto do 14% da poboación padece algún tipo de reuma e son a artrose e a artrite as doenzas máis comúns, ata tal punto que a artrose converteuse na segunda causa de baixa laboral.

As articulacións son as partes do esqueleto que permiten o movemento. Están formadas pola unión de dous ósos cuxos extremos están recubertos dunha cartilaxe articular. Co paso dos anos e como consecuencia da fricción duns ósos con outros, as cartilaxes articulares desgástanse, as articulacións comezan a rozar entre si e aparece a artrose, unha enfermidade caracterizada pola dor de forma continuada ou ben ao realizar un movemento. Acostuma aparecer principalmente na columna vertebral, nos dedos das mans,  en xeonllos e  cadeiras e produce unha dor e inchazón nas articulacións que poden chegar ata a perda do movemento normal. 

As causas da artrose son diversas: pode herdarse xeneticamente (especialmente en casos de artrose de mans en mulleres), por idade avanzada ou ben por lesións nas articulacións ou obesidade (o sobrepeso dana as cartilaxes articulares). 

Dor nas  articulacións

A artrose pode ser primaria, provocada por unha dexeneración normal das cartilaxes co transcurso dos anos que afecta á maior parte das articulacións. Pero tamén existe unha artrose secundaria que só afecta a unha articulación determinada, como é o caso das persoas que padecen problemas de obesidade e que padecen artrose nos xeonllos. 

Os síntomas caracterízanse porque, na primeira fase da enfermidade, séntense dores ao mover a articulación, que desaparecen ao deixala en repouso. Pero a medida que a doenza avanza, pódese chegar a sentir dor sen necesidade de movemento, rixidez e atrofia muscular. Ademais, acostuma producirse unha deformidade nas articulacións cando o paciente apenas realiza exercicio e tanto os cotobelos das mans como os xeonllos comezan a sufrir unha malformación e engrósanse. 

A artrose é unha enfermidade crónica, non ten curación. Os tratamentos que na actualidade existen no mercado serven para diminuír o albor da dor, aliviar os síntomas e mellorar a calidade de vida dos enfermos. A calor en forma de bolsas de auga quente ou mantas eléctricas resulta moi efectivo porque alivia a dor e relaxa a musculatura. En ocasións acostuman realizarse infiltracións, destinadas a protexer as cartilaxes e retrasar a evolución desta enfermidade. 

Artigos relacionados:
< ¿Pódese previr a gripe?
< Riscos da automedicación