Repsol YPF

Fixéronse moi populares e a grande aceptación por parte de pais e fillos posibilitou a creación de múltiples tipos de campamentos creados para todas as necesidades.

Escolle o teu
Dependendo da idade dos teus fillos e dos seus gustos persoais, podes escoller entre atractivas ofertas para eses días de ocio. Normalmente, case todos os campamentos se estruturan en quendas duns 15 días de duración, aínda que, se os teus fillos e ti queredes, poden permanecer máis dunha quenda.

Os campamentos máis tradicionais son os que se levan a cabo en plena natureza, con actividades como a natación, senderismo, rutas en bici, etcétera. Tamén se poden atopar outros máis específicos: para aprender a montar a cabalo, con talleres creativos de manualidades, para que aprendan unha boa alimentación, etcétera.

Aínda que enviar aos teus fillos de campamento non é unha opción moi barata, tes que saber que a ampla oferta existente no mercado fai cada vez máis accesíbeis para todo o mundo este tipo de ocio estival. A quincena adoita andar entre 350 e 600 euros, dependendo das actividades que se realicen. Iso si, se viaxan irmáns xuntos é máis que probábel que obteñas algún tipo de desconto a partir do segundo fillo.

Normas básicas dos campamentos...
Ante todo, tes que estar seguro de a ónde envías o teu fillo a pasar 15 días de verán. Se non tes referencias doutros pais con fillos que pasaran por alí, non dubides en visitar as instalacións persoalmente para asegurarte de que o lugar ofrece garantías.

Así mesmo, solicita ver os permisos de que dispoña a empresa para desempeñar o seu labor, sobre todo o de sanidade, xa que son comúns as infeccións leves que se poden producir nestes estabelecementos por razóns alimenticias.

Unha vez revisado, no campamento informaranche daquilo que o teu fillo debe ou non levar e do material apropiado. Intenta cinguirte ao máximo a estas especificacións e fai que o teu fillo tamén as siga. Un exceso ou defecto de material ou roupa pode carrexarlle algún que outro rompedeiro de cabeza durante a súa estanza.

...e para os teus fillos
Pode que, para algúns, esta sexa a primeira vez que os os teus fillos se separan durante tanto tempo do núcleo familiar. Polo tanto, é importante que esteades seguros de que o pequeno desexa ir. Ata é preferíbel botarse para atrás no último momento, se el así o decide, que envialo e que pase unha mala experiencia.

Se está feliz de marchar, o máis habitual, faille saber que aínda que ti non estás no campamento, verase obrigado a manter unha disciplina, impartida polos monitores adultos, que deberá cumprir. E aínda que ambos estades de vacacións, dálle un teléfono no que sempre te poida localizar en caso de emerxencia ou ben porque vos bote de menos.