Repsol YPF

As festas medievais proliferaron nos últimos anos para rescatar a historia propia de aldeas, vilas e pobos e dalas a coñecer ao gran público. Unha interesante proposta para vivir durante uns días na Idade Media. En toda a xeografía española podes atopar diferentes eventos nos que se recrean pasaxes do medievo, en ocasións, da man dos propios habitantes do pobo. Propoñémosche algunhas opcións para que tomes boa nota e non che escape ningunha.

Semana Cervantina
Na primeira quincena de outubro e como homenaxe ao ilustre escritor Miguel de Cervantes, Alcalá de Henares vístese de festa. Ademais de numerosos actos culturais, celébrase oMercado de Don Quijote, eno casco antigo da cidade, cuxas rúas se cobren de palla para darlle máis realismo e onde se instalan numerosos postos ao máis puro estilo medieval. Non hai que perder as representacións que durante a semana, e en vivo, se realizan da obra de Cervantes.

Mercau Astur de Ceceda
O Mercau Astur de Ceceda ofrece múltiples posibilidades e non che defraudará. Poderás asistir a espectáculos en directo, dende danzas medievais a xogos malabares. E para os máis atrevidos, ¿quen se atreve a montar nun burro? Non deixes de probar os produtos típicos, como os casadielles e os falluelos. Hai que destacar o enorme esforzo que realizan os pouco máis de 200 habitantes de Ceceda, que conseguen transportar os visitantes a outra época. Celébrase na segunda quincena de xullo.

O desembarco de Carlos V
O 28 de setembro de 1556 desembarcou en Laredo (Cantabria) o rei Carlos V, cuxo destino era o mosteiro de Yuste onde pasaría os seus últimos días. No seu percorrido, Carlos V pasou por 24 pobos, un deles era o de Medina del Pomar en Burgos.A finais de setembro, unha comitiva real chega ao pobo para rememorar a última viaxe do rei e a súa estanza na cidade. Poderás comprar no seu mercado artesanía popular e doces típicos da rexión.

A lenda de Sant Jordi de Montblanc
Segundo a lenda (recollida polo escritor Joan Amades no Costumari Cátala), foi en Montblanc (Tarragona) onde San Xurxo (Sant Jordi) matou o dragón. Durante dúas semanas -que coinciden coa celebración do día do santo o 23 de abril- a cidade engalánase para poñer en escena a lenda e matar cada ano o dragón. Non falta o mercado medieval, unha representación das Cortes Catalás celebradas en Montblanc e o encontro de dragóns e demos. Para non perdelo.

A Aguia Branca en Alburquerque
Cada ano e coa interpretación de máis de 200 actores da propia localidade, Alburquerque (Badajoz) pon en escena A Aguia Branca, unha obra que recrea o asedio ao castelo que sufriu o pobo de mans do cabaleiro Don Álvaro de Luna para arrebatárllelo aos infantes de Aragón, Don Enrique e Don Pedro. Durante os días que dura a festa simúlase á perfección o que sería a vida na Idade Media: pedichóns, mancebas, mercadores, artesáns e ata un museo vivente ao que dá vida o propio pobo de Alburquerque. Celébrase na segunda quincena do mes de agosto.

As vodas de Isabel de Segura, Teruel
Dende 1997, recréase na cidade a historia dos amantes de Teruel, dende o romance xuvenil de Don Diego e Dona Isabel, a voda desta co señor de Albarracín e o posterior desenlace coa morte dos amantes. Os visitantes poderán somerxerse nun Teruel ambientado no século XIII con música en vivo, teatros na rúa e un mercado medieval onde degustar a gastronomía da rexión. Xa temos data para o 2005, os días 4, 5 e 6 de febreiro.