Repsol YPF

Desde setembro de 2006, o Código Técnico de Edificación esixe que os edificios de nova construción incorporen sistemas para quentar a auga a través de enerxía solar. Nos tellados dos inmobles xa non é difícil ver paneis solares para lograr este cometido, enmarcado na loita do Goberno de España contra o cambio climático. 

Xunto á enerxía solar térmica, comezan a proliferar polo territorio español inmobles que apostan por paneis solares fotovoltaicos que, en vez de quentar auga para uso doméstico ou similares, converte directamente a luz do sol en electricidade. Desta forma, os usuarios poden prescindir ou, polo menos, ver sensiblemente reducida a súa dependencia doutras fontes de electricidade máis contaminantes.

Polas súas características, a enerxía fotovoltaica resulta unha solución óptima para levar a electricidade a zonas afastadas das redes e infraestruturas eléctricas. É fiable, non precisa combustibles, ten un mantemento de baixo custo e pódese usar en calquera lugar con calquera tamaño. 

Estas instalacións fotovoltaicas illadas son as menos comúns en España. Segundo o último informe da Asociación da Industria Fotovoltaica (ASIF), máis dun 90% dos xeradores fotovoltaicos están conectados á rede de distribución eléctrica e verten a ela a súa produción enerxética. Este feito, sinala o documento, constitúe unha aplicación máis directa e eficiente da tecnoloxía. De feito, España, xunto a Xapón, Alemaña e os Estados Unidos, é un dos países máis punteiro neste tipo de solucións.

Por que instalar paneis fotovoltaicos na casa? 

Segundo ASIF, os sistemas fotovoltaicos non só se poden instalar nos tellados. Pódense aproveitar fachadas, ventás, lamas, parasoles, lucernarios, pérgolas, marquesiñas, etcétera. E as motivacións para a súa colocación son diversas. Estas son as dúas máis destacadas: conciencia ambiental, e gañar diñeiro coa venda de electricidade solar grazas aos excedentes da nosa produción. 

O mellor de todo é que ambas son compatibles. O Instituto para a Diversificación e Aforro da Enerxía (IDAE) exemplifícao: se colocas no tellado da túa vivenda unifamiliar unha instalación fotovoltaica fixa cunha potencia nominal de 5 quilowatts/hora (Kwh). O seu réxime de funcionamento achegará ao fogar 6.500 Kwh ao ano. Con isto, evitarás a emisión de 2,68 toneladas de Co2 á atmosfera cada ano e, se aforras enerxía cun consumo eficiente, podes vender o teu excedente de acordo coa tarificación do Goberno. Os expertos do IDAE calculan que se poden obter ingresos anuais que superan os 2000 euros anuais, segundo a normativa vixente. A vida media destes aparellos acada os 25 anos.

Un custo demasiado elevado 

Un dos escollos para animarse a converter as nosas casas nunha pequena central solar é o seu custo. Unha instalación fixa de 5 Kwh de potencia nominal oscila, segundo datos do IDAE, os 22.500 euros, cun custo adicional 220 euros anuais en mantemento. 

As administracións públicas ofrecen axudas, sobre todo para instalar dispositivos fotovoltaicos que non estean conectados á rede, como os que se utilizan en zonas rurais con escasa ou nula conexión eléctrica ou vivendas integramente sostibles. Tamén existen facilidades no caso de instalacións conectadas á rede.

Estes contan, como mellor aliado, co prezo bonificado fixado polo Goberno para vender a súa enerxía ás redes eléctricas. Na actualidade, tras unha revisión á baixa, o Real Decreto 1578/2008 establece unha retribución de 0,32 euros Kwh para dispositivos instalados no solo e de 0,34 Kwh no caso dos colocados no teito. 

Segundo a norma, o Executivo decidiu primar as instalacións nos teitos polos seus maiores beneficios económicos, xa que reduce os investimentos en infraestruturas e as perdas na rede. Tamén esgrimen razóns ambientais, pois permiten unha 
mellor utilización do solo e a preservación de zonas con potencial valor natural. O Ministerio de Industria é o encargado de xestionar o proceso. Os usuarios pódense informar e presentar a súa solicitude telemática na súa web.

En definitiva, o Sol pode ser o gran protagonista do cambio cara á fontes enerxéticas respectuosas co planeta e xa existe a posibilidade de participar nel.

Artigos relacionados:

- Solares no tellado

- Enerxía solar na casa