Repsol YPF

O aforro a longo prazo e a comodidade que supón o uso de pilas recargábeis se puxo de manifesto pola forte demanda de enerxía que precisan estes aparellos móbiles ou portátiles de alto consumo e de uso prolongado. As baterías recargábeis duran tres veces máis en dispositivos de gran consumo que as alcalinas. Así, as pilas renovábeis e reutilizábeis preséntanse como unha boa elección económica e ambiental. A súa tecnoloxía é respectuosa co medio ambiente. Non obstante, as pilas teñen compoñentes químicos que xeran á súa enerxía. Son metais pesados e substancias químicas que posúen propiedades corrosivas, reactivas, explosivas, tóxicas e inflamábeis.

Unha xestión ecoloxicamente apropiada das pilas comeza coa selección das mesmas, un produto que, como moitos outros, tras unha maior ou menor vida útil, rematará por transformarse en residuo. Polo tanto, é decisivo o momento de escollelas, ao igual que sucede cos acumuladores e baterías.

Primeiramente se recomenda empregar os aparellos eléctricos conectados á rede para evitar o uso de pilas. Pero se a súa utilización é inevitábel, é bo comprar pilas recargábeis. Entre as vantaxes, o aforro a longo prazo e o maior coidado do medio ambiente, porque evidentemente se produce unha gran redución no volume de residuos. A única desvantaxe é o desembolso inicial que hai que efectuar.

Calidade
Unha cuestión importante é que, tratándose de pilas recargábeis, o produto sexa de boa calidade. Non é estraño atopar ofertas tentadoras. Pero, como saber se son aconsellábeis? 

De entrada, unha pila barata ofrecerá unha menor vida útil que outra de maior prezo e calidade. A isto engádeselle o máis que probábel agravante que pode supor o que foran fabricadas mediante un proceso máis contaminante e que, por conseguinte, produce pilas máis nociva para o medio ambiente. 

As tecnoloxías produtivas máis novas son máis limpas, se ben tamén son máis complexas e implican maiores custos. Por esta razón é medioambientalmente máis recomendábel comprar pilas de marcas prestixiosas ou procedentes de países desenvolvidos, onde a normativa e o control sobre o proceso de produción presumiblemente son máis estritos. 

Distínguense dous tipos de pilas máis usuais, son as AA e as AAA. Ambas poden ser NI-CD (Níquel-Cadmio) ou NI-MH (Níquel-MetalHidruro, tamén denominadas ecolóxicas). Hai uns números que acostuman acompañar á descrición do tipo de pila, que indican a capacidade de carga (mAh, que significa mili amperes por hora) A máis capacidade de carga, máis tempo de duración da a pila, antes de ter que cargala de novo.

Estes números serán máis altos nas pilas AA que nas AAA, por unha simple cuestión de tamaño. As capacidades máximas están entre 2.300 e 2.800 mAh para as pilas AA, e 800 e 1.000 mAh para as pilas.

Menos contaminantes
Para ter a certeza de que no proceso de produción ou reciclaxe das pilas recargábeis non se van liberar elementos moi contaminantes como o mercurio, por exemplo, cómpre adquirilas coa lenda “Libre de Mercurio (Hg)” ou similar.

De feito, son preferíbeis as pilas de marcas que se producen baixo as leis da Comunidade Europea, EE.UU. e Xapón, que prohiben o emprego de dito metal pesado. As provenientes do sueste asiático requiren tratamentos posteriores máis caros para evitar que causen danos ao entorno.  En calquera caso, todas estas pilas precisan para o seu uso dun cargador eficiente.

Na súa maioría as pilas recargábeis son un produto de uso domiciliario e, desde este punto de vista, non lles afectan as leis sobre residuos perigosos ou industriais. As pilas e baterías usadas, provenientes do uso de xoguetes, electrodomésticos pequenos, equipos de música, teléfonos, ordenadores, etc., forman parte dos residuos domésticos ou domiciliarios. 

As pilas débense depositar nos contedores selectivos, xa que conteñen compostos químicos que poden perturbar negativamente ao ambiente, incluídos os seres vivos, se non se desbotan adecuadamente. Pouco a pouco foi aumentando o número de contedores destinados á recollida destas pilas e baterías. 

No tocante ás baterías dos coches, as de chumbo-ácido, ao ser substituídas, o establecemento vendedor terá que facerse cargo das vellas.

Tras a recollida selectiva, as pilas tritúranse e sepáranse dos seus diferentes materiais, valorizando algúns e convertendo en inertes outros para evitar que poidan contaminar o medio ambiente.