Repsol YPF

Primeiro foron os produtos de limpeza específica para o forno, que prometían desincrustar calquera residuo das paredes do teu aparello con facilidade e un pano. Seguíronlles os fornos de autolimpeza catalítica, no que se desaconsella o uso de produtos limpadores. O seu segredo está no interior: teñen paredes rugosas para absorber a sucidade e a súa superficie é porosa, o que permite descompor a graxa e os olores en dióxido de carbono e auga. Para eliminar os restos adheridos, basta con ter paciencia e utilizar varias veces o forno, ou recorrer a un pano ou cepillo de celas.

Porén, a limpeza a través da calor acadou cotas insospeitadas de hixiene grazas á pirólise, un fenómeno químico que provoca a descomposición da materia orgánica mediante o seu quecemento a altas temperaturas e sen empregar osíxeno ou outros reactivos. 

Antes da súa chegada ao mundo dos fornos, a pirólise era xa unha vella coñecida da humanidade porque, por exemplo, é o proceso utilizado para converter a madeira en carbón vexetal. Emprégase tamén no tratamento de residuos ou na creación de fibra de carbono. E está moito máis presente na nosa vida cotiá do que imaxinas: se torras o pan ou asas na grella unha salchicha en exceso, a pirólise pode acabar co teu prato.

Os fornos pirolíticos someten os residuos de graxas e alimentos a unha temperatura duns 500 ºC, calcinando calquera resto de sucidade. A súa acción garante unha limpeza uniforme, xa que a calor chega a todas as cavidades do forno, por pequenas que sexan. 

Antes de instalar un forno destas características, a pregunta resulta obvia: é seguro ter na túa cociña un aparello capaz de quentar a 500 graos? Os fabricantes e instaladores non dubidan en contestar afirmativamente e lembran que estes electrodomésticos acostuman incluír catro cristais na súa porta para reducir a temperatura exterior e evitar, así, riscos de queimaduras.

Ademais, sabedores de que o sistema supón un consumo adicional de enerxía, os novos deseños ofrecen diferentes graos de limpeza pirolítica para adaptar o proceso as necesidades do momento. Incluso hainos con sistemas intelixentes, que programan a limpeza de forma automática cando o forno está o suficientemente sucio.

A auga, o novo competidor

Nos últimos años, a pirólise ten un novo rival no mercado: a auga. Os fabricantes empregan diferentes denominacións para referirse a este sistema de autolimpeza, baseado no vapor de auga. 

Basta con verter medio litro de auga —con ou sen deterxente, segundo a marca— e seleccionar o programa de limpeza. O forno quentará o líquido a uns 50 ou 60 ºC, ata que o seu vapor se estenda por todo o aparello. O revestimento especial das paredes, deseñado para que a súa limpeza sexa máis fácil, fai o resto. Só restará pasar un pano ou esponxa para retirar os residuos.

Elixir cal dos sistemas é máis sostible depende do modelo de forno que prefiramos e do uso que lle vamos dar. O máis recomendable é deixarse aconsellar.


 
Artigos relacionados:

- Aforrar co forno

- O regreso dun clásico