Repsol YPF

Durante os últimos anos, o espazo do fogar que máis rapidamente evolucionou é sen dúbida a cociña. Equipada con modelos de lavalouzas, microondas e frigoríficos, entre outros electrodomésticos, cada vez máis eficientes e prácticos, a cociña non quere porén resignarse a converterse nun lugar simplemente funcional, aspirando tamén a ser un espazo para o deseño, como demostra a evolución das novas encimeiras. As campás extractoras de fumes, pola súa parte, poden xogar con esa dobre función: eliminar os fumes e malos cheiros, e tamén ser un elemento atractivo que realce a aparencia do lugar. 

No momento de escoller unha, en primeiro lugar temos que valorar canto queremos gastarnos, porque os modelos dispoñibles no mercado presentan unha gran diferenza de prezo segundo as súas características técnicas e o seu deseño, oscilando entre os 60 euros e os 1.000. Outro factor importante a ter en conta é a elección da saída de fumes: que sexa ao exterior ou non. O segundo caso resulta máis sinxelo e económico, aínda que loxicamente non expulsa o fume da cociña, limitándose a absorber a graxa e os cheiros mediante filtros. Tamén é conveniente fixarse no sistema de protección contra incendios co que conta, as garantías e servizos posvenda que ofrece, e se está incluído ou non no Plan Renove de electrodomésticos. 

Campás de deseño 

Xeralmente, as campás extractoras acostuman estar fabricadas en aceiro, un material elegante que lle proporciona un aspecto moderno e aséptico á cociña e que, ademais, resulta fácil de limpar. Nalgúns modelos a campá pode chegar a converterse nun moble independente facendo as veces de estante, para situar nel os obxectos que podamos precisar. 

Tamén poden ter forma de “illa”, é dicir, estar instalada directamente ao teito sobre unha zona de cocción. Por outra parte están as extraplanas, que quedan totalmente integradas na fila de armarios superiores da cociña e unicamente queda visible —mentres se estea a empregar— a pantalla plana extraíble. 

Por último, están os sistemas de extracción remota, nos que a campá carece de motor no seu interior, quedando este ao final do sistema de condutos de aireación. A principal vantaxe disto é que resulta máis silenciosa. Así mesmo, ten en conta que hai diferentes opcións en función de se estes motores están situados na parede ou no teito. 

Mantemento axeitado

Á hora de instalala hai que asegurarse de que haxa unha toma de terra e de que a tensión sexa acorde á potencia do aparello; sobra dicir que, previa á súa manipulación, é necesario desconectala. Respecto ao mantemento dos filtros, temos que distinguir os antigraxa —metálicos e de fácil limpeza no lavalouzas— dos filtros anticheiro de carbón activo —son de suar e tirar e polo tanto, débense substituír con asiduidade—. Neste sentido, hai campás que contan cun indicador de saturación de filtros pasar saber cando se deben cambiar. En último lugar, o mantemento debe incluír unha limpeza exterior da campá cun trapo húmido e un limpador neutro, así como a substitución das lámpadas cando se fundan. 

Artigos relacionados:

- Mantemento óptimo do frigorífico e o conxelador

- Escolle a mellor encimeira para a túa cociña