Repsol YPF

Á hora de elaborar as receitas, pódese dar o toque final engadindo xunto ao ingrediente principal un acompañamento que, en ocasións, pode adquirir tanta importancia coma o prato en si. Unicamente convén ter en conta se se cociña carne ou peixe, porque as gornicións variarán en sabores e consistencia.
 
Estes acompañamentos poden ir dende o máis sinxelo, como un puré de patacas ou unhas cenorias bañadas, ata o máis elaborado. Dentro do terreo das carnes e se se preparan asados un bo acompañamento son as patacas asadas mesturadas con queixo cremoso, as cabaciñas recheas con brécol e cenorias ou uns champiñóns recheos. Se se desexa unha gornición orixinal para un asado, pódense servir peras cocidas recheas de grosellas, xa que son moi vistosas e acompañan ben o sabor da carne. As boliñas de pataca e améndoa resultan exquisitas con rosbif, redondo ou carnes asadas, pero se se preparan carnes de sabor forte como a caza, o complemento perfecto é o escalibada, elaborado a base de berenxenas e pementos vermellos.
 
Compensar sabores
Cando o prato contén unha costeleta de tenreira ou un entrecosto, os pementos verdes engaden o seu toque de sabor característico pero hai que servilos moi quentes e coa carne acabada de facer. Se a receita está elaborada a base de carne de ave, pódese acompañar duns roliños de touciño entrefebrado, suxeitos cun escarvadentes e dourados ao forno que tamén se servirán moi quentes.
 
Unhas tartaletas de millo cocido con noces e pasas son o complemento perfecto das carnes de porco. O seu segredo está en enchelas cando están quentes e sacalas á mesa coa carne antes de que arrefríen. Tamén se pode acompañar este tipo de ingrediente cunha gornición a base de cebolas e mazás verdes cortadas en láminas e cociñadas a pouco lume cunha culleriña de po curry.
 
Para acompañar pratos cuxa base é o polo, resultan moi saborosas unhas boliñas de mazás verdes e de remolachas cocidas, colocadas nunha tixola con manteiga e cun pouco azucre e removidas ata que se bañen. Cando se preparan carnes á grella, unha opción é acompañalas de aros de cebola, somerxidos nunha masa de fariña e ovo e fritos en aceite abundante.
 
As salchichas de Frankfurt son outra posibilidade sinxela que, ademais, é moi axeitada para pratos de ovos ou peixe. Pódense servir quentando primeiro a salsa de tomate e agregando as salchichas cortadas en anacos. Engádese un pouco de alfábega e pemento e danse varias voltas rápidas para que este último non se queime.
 
Verduras para o peixe
Os peixes tamén admiten opcións diversas. Coas receitas á prancha pódense preparar uns tomates ao forno e recheos de arroz cocido. Unhas patacas en toros rebozadas en fariña e ovo e posteriormente pasadas polo forno con queixo relado e nata líquida realzan o sabor dos peixes asados, pero se a opción é preparar o ingrediente rebozado, pódese sorprender aos comensais facendo unhas tortillas de herbas moi finas. Unha vez rematadas, colocaranse unha enriba da outra, enrolaranse e cortaranse en tiras de medio centímetro, co que se ofrece unha presenza visual diferente.
 
Os espárragos verdes fritos son un clásico neste tipo de pratos, xa que cadran á perfección con todo tipo de peixes e o mesmo pode dicirse dos volováns quentes recheos de ovos revoltos.
 
Para os peixes brancos, que adoitan asociarse con dietas máis lixeiras, as verduras fritas complementan moi ben, son sinxelas de presentar e ademais permiten a imaxinación persoal á hora de combinar sabores. Unicamente é necesario lavalas e secalas ben, para despois cortalas en tiras finas e pasalas pola tixola.  O pisto, ademais de ser un excelente primeiro prato, pode servirse sobre pequenos boliños e converterse en acompañamento. Outro comodín é a pasta fresca, mesturada cunha pouca manteiga e unhas tiras de touciño entrefebrado.
 
En canto aos peixes azuis, adoitan servirse con atados de verduras. Estes prepáranse cortando cenorias e feixóns verdes en bastóns do mesmo tamaño. Cócense ao vapor ata que estean feitas, pero deixándoas un pouco enteiras. Despois escórrense, átanse con rabiños de perexil e énchense cunha pouca manteiga derretida.