Repsol YPF

Dende a máis simple á máis sofisticada, as vinagretas representan un elemento indispensábel da cociña e o mellor xeito de rematar unha morea de receitas, aumentando as súas calidades. Conforman un matrimonio perfecto con ensaladas de folla e hortalizas, toda clase de verduras, pescados, legumes e pastas, por poñer só os exemplos máis significativos das súas moitas posibilidades. Ademais, trátase de aderezos sans, moi sinxelos de elaborar e sobre todo rápidos, algo importante en momentos como o actual onde os minutos valen ouro.

Os dous ingredientes básicos de calquera vinagreta son o aceite e o vinagre. Tanto un coma o outro ofrecen unha enorme diversidade de clases. De tódolos xeitos, no caso do aceite, o mellor é elixir as variedades de oliva, tendo en conta que os virxes teñen un sabor máis forte que os refinados. Aínda así, sempre se pode empregar unha clase virxe e logo rebaixala cun pouco de aceite de millo. Non hai que esquecer adecuar o tipo de aceite aos ingredientes sobre os que se vai dispoñer a vinagreta.

A cada unha, o vinagre axeitado
Igualmente, é posíbel atopar no mercado unha grande oferta de vinagres: de viños branco, tinto e rosado, de Jérez, de cava, de Módena e, por suposto, de mazá, o máis suave de todos. Os vinagres de viño van ben con ensaladas de escarola e de folla rizada, mentres que o de Jérez resulta ideal para peixes, ao igual que o de cava, co que se poden elaborar tanto vinagretas frías como quentes.O de Módena representa unha excelente alternativa se a vinagreta acompaña algún tipo de carne.O de mazá ou de sidra combinan con todo tipo de ensaladas lixeiras, de legumes e, tamén, de pasta. Outra opción que pode substituír ao vinagre e que lle proporciona un sabor máis leve ao aderezo, é o zume de limón.

¿Como se elaboran?
A forma tradicional de preparar a vinagreta é seguir unha proporción na que unha parte sexa de vinagre e outras tres de aceite, aínda que a regra admite variacións en función dos gustos. Para realizala, colócase nun bol o vinagre, sazónase ou salpeméntase e finalmente engádese o aceite. Posteriormente bátese enerxicamente. En caso de que leve outros ingredientes, estes deben incorporarse sempre antes que o aceite para lograr que a salsa emulsione correctamente. Hai que recordar que a vinagreta pódese elaborar con antelación e gardala nun recipiente hermético na neveira á espera de ser empregada.

Varios sabores para elixir
Pero máis alá do aceite e o vinagre, é posíbel botar man dunha morea de produtos para preparar variantes orixinais e algo máis traballadas da clásica vinagreta. É o caso dos curtidos, como cogombros novos ou alcaparras, do ovo duro ou do allo. Igualmente pódese empregar mostaza, froitos secos, pasas, un bo número de herbas aromáticas, mesmo deliciosas grosellas e ata mel. A que leva allo, por exemplo, que se realiza, ademais de con este ingrediente, con aceite, vinagre, sal, pementa, un chisco de azucre e un pouco de mostaza, irá moi ben para aliñar un bo prato de pasta. A variedade elaborada con mel dará un toque delicioso a unha ensalada con rúcula, escarola e tomates confeitados; ademais de mel pode incorporar aceite de oliva, vinagre de mazá e unhas gotas de balsámico xunto con alfábega picada. Pola súa parte unha ensalada a base agróns e queixo combinará perfectamente cunha vinagreta que integre froitos secos picados, vinagre balsámico, aceite de oliva e un pouco de ourego.