Repsol YPF

As orixes da soia sitúanse na zona de Extremo Oriente que comprende China e Xapón. Pertencente á familia das leguminosas, esta é unha planta resistente ás situacións climatolóxicas adversas, de cultivo sinxelo e rápida adaptación a calquera tipo de terreo. En canto ao seu aspecto, os seus froitos en forma de vaina acostuman conter unhas tres ou catro sementes.

O seu cultivo propagouse, tradicionalmente, en países cuxa poboación sufría problemas crónicos de nutrición porque, entre outros aspectos, a soia posúe un alto contido en proteínas, que pode chegar ata o 40%. Dentro da súa porcentaxe de graxas (20%) predominan as insaturadas, como o ácido linoleico (Omega 6) e outras, tipo Omega 3. A proporción de hidratos de carbono é algo inferior (10%), comparada con outros vexetais como as lentellas, máis ricas en hidratos de carbono aínda que non tanto en proteínas. Ademais, achega oligoelementos e minerais como calcio, fósforo, potasio, sodio, magnesio e zinc, nunha porcentaxe próxima ao 5%. 

As numerosas virtudes da soia pódense aproveitar en distintas presentacións: iogur, tofu —queixo de soia—, aceite, xerminados, proteína de soia texturizada, leite de soia e incluso como suplemento a outros alimentos, como pode ser fariña de trigo.

Reduce as molestias da menopausa

A soia é un alimento moi frecuente na dieta dos países do continente asiático. Diferentes estudos constataron que as mulleres que residen nesta zona do planeta padecen os síntomas da menopausa de maneira moito menos intensa. 

A razón atoparíase nos fitoestróxenos, unhas substancias de estrutura moi semellante aos estróxenos, das que as isoflavonas son as máis comúns. O alto contido en isoflavonas que posúe a soia convértea nunha alternativa de tratamento hormonal natural para as mulleres menopáusicas, xa que axudan a combater algúns dos seus síntomas, como os sufocacións, a sudación excesiva, o insomnio, a ansiedade, a irritabilidade ou a depresión. Nesta época, os niveis femininos de estróxenos diminúen e as isoflavonas axudan a compensar ese desequilibrio

Así mesmo, a proteína de soia conta cun alto poder antioxidante e aumenta a capacidade do organismo para reter e absorber calcio nos ósos. Pola súa parte, as isoflavonas axudan a manter a densidade ósea, retardan o deterioro dos ósos e axudan a previr a osteoporose.

Menos colesterol

Outra das propiedades que contén a soia é que as isoflavonas contribúen a diminuír os niveis de colesterol, e con isto os problemas cardiovasculares que frecuentemente acostuman aparecer asociados á menopausa. En liñas xerais, a soia ten a capacidade de interferir a absorción de colesterol, e o seu elevado contido en fibra axuda a controlar este problema. De aí que se lles recomende o seu consumo a todas aquelas persoas que presenten uns niveis altos.

Ademais, contribúe a mellorar o sistema inmunolóxico, e a súa acción antioxidante evita que as toxinas se adhiran ás paredes das células. Así mesmo, a proteína de soia e a súa fibra axudan a controlar os niveis de glicosa e as filtracións aos riles, co que se poden diagnosticar mellor posibles problemas de diabete ou ligados ao sistema renal. 

Por outro lado, a soia acostúmase empregar como un complemento dietético para aquelas persoas que padecen problemas de inxestión de alimentos ou ben presentan determinadas intolerancias, como é o caso da lactosa, xa que non contén este elemento na súa composición. 

A súa comercialización en comprimidos facilita o seu consumo, pero a pesar de contar cunha ampla lista de beneficios, convén ter en conta que as isoflavonas só son axeitadas para aquelas persoas que precisan doses altas de estróxenos, como é o caso das mulleres menopáusicas. Inxerir doses extras de estróxenos, cando o noso corpo realmente non os precisa, pode producir alteracións na glándula tiroides como bocio ou tiroidite autoinmune.

Artigos relacionados:

- Que son os fitatos?

- Alimentos que protexen fronte ao cancro