Repsol YPF

Os primeiros documentos nos que se ten noticia da cervexa proceden da vila sumeria (Baixa Mesopotamia) onde nunhas taboíñas de barro do ano 4.000 a. C. se menciona unha bebida chamada sikaru, feita coa fermentación de gran e pans de cebada fermentada. En Exipto o malte (chamado zythum) chegou a converterse na bebida nacional e era costume engadirlle mel, xenxibre, dátiles e azafrán. 

Os habitantes de Europa Occidental na época romana consumían cerevisium, (un caldo elaborado con trigo e auga que se diferenciaba segundo o proceso de elaboración), os galos coñecíano como cervisia e os hispanos como ceria. Os propios romanos elaboraban ceres-vis con trigo, avena ou centeo, ademais da cebada e adozábana con dátiles e mel. 

A cervexa contén ingredientes beneficiosos para o organismo como o lévedo, o malte ou o lúpulo. Consumida con moderación, contribúe a mellorar a saúde cardiovascular, polo alto poder antioxidante e antiinflamatorio dos polifenois que contén, axuda a retrasar a aparición da menopausa e a reducir malformacións na medula espiñal, ademais de mellorar a resposta inmune contra axentes patóxenos, responsábeis de desenvolver enfermidades infecciosas.

Fonte de vitaminas B
Na actualidade, os estudos realizados sobre esta bebida consideran que a súa porcentaxe de extractos naturais convértena nun bo aperitivo, xa que estimula as papilas gustativas e abre o apetito. O consumo diario de 1/3 de cervexa achega aproximadamente un 6,6% das necesidades diarias de calorías. Ademais, achega unha importante cantidade da fibra solúbel que se recomenda inxerir diariamente e que pode axudar a complementar a achega de fibra de alimentos ricos en fibra dietética insolúbel, como os cereais. 

Está especialmente indicada en dietas hiposódicas, polo seu baixo contido en sodio e ademais achega fósforo e vitaminas solúbeis do grupo B como a tiamina (B1) que actúa sobre o metabolismo dos glícidos, a rivoflabina (B2) que facilita a dixestión, a piridoxina e niacina, así como ácido fólico e folatos. Estes últimos asócianse coa posibilidade de reducir o risco a sufrir anemia  megaloblástica e malformacións na medula espiñal. 

Segundo datos dun estudo realizado na Facultade de Medicina da Universidade de Innsbrück, en Austria, a cervexa podería ter un efecto inmunorregulador de carácter anti-inflamatorio e aínda que nun principio se pensaba que era o baixo contido en etanol o que axudaba a previr este tipo de enfermidades, chegouse á conclusión de que o beneficio proviña da cebada e o lúpulo, os ingredientes naturais cos que se elabora esta bebida. 

Tamén é unha excelente fonte de minerais esenciais como o potasio, o calcio, o magnesio e o silicio. Precisamente, algúns traballos científicos confirman que este último mineral contido na cervexa pode ter un efecto positivo sobre a osteoporose xa que, xunto aos flavonoides e o baixo contido alcohólico da cervexa, favorecen que haxa unha maior masa ósea. 

Usos estéticos
Tamén, se investigou o xanthohumol, un flavonoide presente na cervexa e a súa contribución a previr certos tipos de cancro. Posúe unha  capacidade de inhibir unha familia de enzimas que pode activar o proceso canceríxeno e desta forma exerce un papel antioxidante moi importante, incluso maior que o da vitamina E. Precisamente polo seu elevado contido en antioxidantes, os expertos creen que un consumo moderado despois da actividade física podería ser útil para permitir unha mellor recuperación despois do esforzo realizado. 

Desde a antigüidade, a cervexa foio valorada polas súas propiedades refrescantes, os seus usos medicinais e tamén estéticos. En Exipto, empregábase a espuma da cervexa para unxirse e así conservar o frescor natural da pel. Moitos anos máis tarde,  na corte de Prusia do século XVI, recuperábase esta costume e a cervexa volvía a utilizarse como un tonificante cutáneo, para manter unha pel fresca. Nesta liña de coidados corporais, a República Checa, país gran consumidor desta espumosa bebida, conta cun balneario que ofrece baños quentes con auga mineral e cervexa da zona. Os seus efectos relaxantes están destinados a suavizar a pel, eliminar as dores musculares e coidar o cabelo.  

Na actualidade, o estado español é o terceiro produtor de cervexa da Unión Europea e o cuarto produtor de lúpulo, unha das súas materias primas. Non obstante, o consumo por persoa ao cabo do ano é un dos máis moderados no ámbito europeo e, de feito, España é o país onde máis cervexa “sen” se consume, máis dun 10%.