Repsol YPF

As cafeterías están deixando de ser un lugar de paso, moitas veces masificado e ruidoso, para converterse nun punto de encontro. Dentro dunha liña de demanda que cada vez esixe máis produtos e servizos de calidade, este tipo de locais evolucionaron nos últimos anos ata se converter en lugares que ofrecen moitas posibilidades. 

Unha boa parte das cafeterías ampliaron a súa franxa horaria, que abrangue desde o almorzo ata a cea, un espazo de tempo no que, xunto a un aromático café se pode degustar repostería, pratos de pasta ou ensaladas. 

Locais confortables

Un aspecto primordial destes locais é o aspecto do local, a súa decoración, o medio que fará que o cliente se sinta nun ambiente cálido, rodeado de madeiras combinadas con tons confortables e mesas baixas que suxiren un ambiente acolledor. Outros, con elegantes deseños Art-Decó, convidan á lectura. Os denominados “coffee shops”, por exemplo, convertéronse nun fenómeno social e cultural, espazos aos que os clientes acoden para degustar os seus produtos, pero tamén para conversar e ler. 

Á hora de apostar pola cultura cada un elixe a súa propia vía. Existen cafeterías que, co fin de fomentar a cultura, venden libros ao módico prezo de un euro e destinan os beneficios obtidos para axudar as ONGs. Outras ofrecen edicións en tirada curta de autores noveles.

A oferta resulta variada e cada un pode elixir, en función das súas preferencias. Podemos atopar cafeterías culturais en cuxas paredes se expoñen fotografías e incluso cadros, establecementos convertidos en pequenos museos que poñen a arte ao alcance da cidadanía. Hainas que amosan cámaras fotográficas doutras épocas e locais nos que se realizan sesións para tomar fotografías. 

Outras inclúen pequenas bibliotecas ás que se pode acceder mentres se goza dun café nun intre de ocio. Ademais de ler o xornal, unha publicación cotiá ao alcance de todos desde hai anos, existen establecementos que contan con outro tipo de publicacións como cómics e outros que se decantan por instalar unha zona wifi, onde pasar a tarde saboreando un capuccino mentres se navega por Internet. 

Un teatro-librería

Un caso curioso, dentro deste auxe pola lectura, constitúeo a librería El Ateneo Grand Splendid, situada na cidade de Bos Aires. Nas súas orixes foi o teatro Grand Splendid transformado, desde o ano 2000, nunha inmensa librería. A primeira impresión ao acceder ao recinto é a de entrar nun teatro no que se respectaron a arquitectura e a decoración orixinais. Porén, o escenario converteuse nunha cafetería, o seu patio de butacas está repleto de estantes con libros e butacas para sentarse e ler e os seus palcos pódense utilizar como reservados gabinetes de lectura. Un lugar axeitado para a presentación de libros e para os faladoiros. O local tamén conta con música en directo para acompañar as conversas ou mentres se goza dun bo libro. 

Artigos relacionados:

- Show Cooking, a cociña como espectáculo

- Cear nun lounge