Repsol YPF

Atrás quedaron as ensaladas nas que só o tomate e a leituga estaban presentes, en ocasións acompañados dun pouco de ceboliña. O concepto de ensalada cambiou moito nos últimos tempos e a mesma oferta en canto a leitugas ofrece diferentes posibilidades, tanto en tamaño como en cor e sabor. 

Unha destas variedades é a leituga de folla de carballo. Recibe este nome porque as súas follas, cunha coloración que vai do verde aos tons violetas e avermellados, lembran ás desta árbore. Resulta unha excelente base para ensaladas xa que as súas follas, crocantes e de sabor doce, son moi rizadas e resultan moi decorativas. Pódese combinar con queixo azul cortado en dados, noces picadas e aceite de oliva virxe. Tamén a podes empregar en gornicións de pratos de caza, por exemplo cuns cóengos e unhas setas salteadas. 

Debido á maior influencia do sol, as leitugas de primavera e verán acostuman ser máis ricas en nutrientes que as de outono e inverno. Por outra parte, convén escoller as de tonalidades máis escuras, como a de folla de carballo, xa que son máis nutritivas. 

Innumerables combinacións

Sobre a base dunha ensalada de folla, pódense engadir tantos ingredientes como se desexe, sempre tendo en conta que o contraste de texturas é tan importante como a elección do aliño. As opcións son infinitas: champiñóns crus fileteados, regados con limón para evitar que se oxiden, todo tipo de verduras pequenas, tanto cocidas al dente como crúas, cítricos que achegan un toque ácido e zumarento, xamón ibérico ou de pato, mariscos xa cocidos e pelados e incluso láminas de foie. 

Dentro da familia da leituga podes atopar outra variedade como é o radiccio, que se caracteriza pola peculiar cor morada das súas follas con nervaduras brancas. A súa textura é firme e crocante e ten un sabor bastante amargo, polo que se acostuma incluír nas ensaladas só en pequenas proporcións. Cómese cru con apenas un pouco aceite de oliva e sal pero tamén mesturado. Pódese combinar con outros tipos de leituga como a escarola e ingredientes como o tomate, a cenoria, a laranxa ou o ovo. Tamén podes achegar un toque diferente se o inclúes nun risotto ou nunha pizza, xa que se pode enfornar ou saltear.

Outro ingrediente que hoxe en día atopas con facilidade no mercado son os cóengos, unhas pequenas follas de cor verde intenso, que se agrupan en ramiños dunhas 4 ou 6 follas. O seu sabor é delicado, cun matiz que lembra ás noces, un fondo algo picante e textura crocante. Serven como adorno, achéganlle frescura aos pratos e pódense preparar tanto sos cun aliño como formando parte de exquisitas ensaladas con tomates, champiñóns, noces e abelás.

Á hora de engadir os cóengos nunha ensalada, convén facelo xusto antes de servir o prato e incluso despois de telo aliñado para que non perdan a súa frescura. Os condimentos fortes como o vinagre ou o aceite e a calor deterióranos rapidamente, perden a súa textura e a súa cor escurécese. 

Combinados con verduras e froitas

Son un ingrediente idóneo para elaborar ensaladas de verduras frescas, con espinacas, cenoria, champiñóns, cebola e millo, todo isto regado cun aliño de noces, aínda que tamén se pode achegar un toque diferente substituíndoo por crema de leite cun chisco de vainilla, zume de limón e aceite de oliva, todo ben batido. 

Outra forma de preparalos é colocalos nunha fonte e sobre eles aguacates en tiras. Engádense champiñóns cortados en rodas e unhas láminas finas de queixo parmesano. Prepárase un aliño, mesturando aceite, limón, allo picado, sal e pementa e bótase un momento antes de servir a ensalada. Se queres engadir este aliño sobre unha ensalada só con cóengos, é preferible que elimines o allo, para poder aprecialos en todo o seu sabor. 

Acostúmanse consumir crus en ensaladas, acompañados de endivias, apio ou remolacha. Combinan ben con froitos secos, xerminados, froitas como a laranxa, a mazá verde, o pomelo ou outros alimentos como as cenorias, as patacas, os aguacates ou os champiñóns. Así mesmo, resultan especialmente saborosos se os mesturan con diferentes variedades de queixo como o roquefort, o de cabra, o queixo feta ou o brie. Outra posibilidade é que os prepares con pasas, millo, piñóns e anaquiños de queixo curado, aliñándoos con aceite e vinagre de módena. 

Non tes que esquecer que cando consumes leituga fresca cómpre empregar aliños lixeiros para variedades de follas ternas e outros máis consistentes para as leitugas de follas máis carnosas e rizadas. O sabor delicado dos cóengos, necesita un aliño suave e en pouca cantidade, para poder gozar do seu sabor herbáceo e fresco. Un aliño perfecto para ensaladas de folla é o aliño francés, que consiste en engadirlle aos ingredientes da vinagreta básica, unha culleradiña de azucre ou de mel e outra de mostaza. 

Artigos relacionados

- Zumes naturais, preparar e consumir

- Verduras de verán