Repsol YPF

Cando xorde a posibilidade de comer fóra de casa, inmediatamente formúlase a elección do lugar. Esta decisión vólvese especialmente importante cando hai nenos polo medio, xa que acostuman ser eles os que condicionan o destino final coas súas preferencias ou ben pola idade que teñen. 

Hoxe en día, numerosos restaurantes contan cun menú infantil pensado para os máis cativos. Nel ofrécense dous ou tres pratos para elixir, aínda que as preferencias adóitanse decantar xeralmente pola pasta, os rebozados e polo ou carne con gornicións abundantes de patacas fritas, servidos sobre manteis decorados con motivos infantís. 

Saír da rutina

Porén, comer fóra de casa pode ser unha oportunidade para que os máis pequenos se vaian acostumando, pouco a pouco, a probar sabores novos e así, saír dunha rutina alimenticia que a eles nunca lles cansa pero que, co tempo, pode supor problemas de saúde. Outros estabelecementos, polo contrario, non contan con menú específico para nenos. Nestes casos, pódese elixir algún prato que sexa do seu gusto e compartilo con el, se as racións son abundantes. 

Á hora de elixir un establecemento, convén coñecer de antemán certos aspectos importantes como que conte cunha zona para non fumadores, xa que non é nada recomendábel que os nenos estean comendo, expostos ao fume dos cigarros do seu entorno. Tamén é convinte asegurarse de que o local conte con cadeiras para os máis pequenos que faciliten o darlles a comida. Desta forma, os bebés incorpóranse á mesa e ocupan un espazo xunto á familia. Se os nenos son máis maiores, pero non o suficiente como para acadar a táboa con facilidade, determinados locais dispoñen de cadeiras infantís que solucionan este inconveniente. 

En ocasións preséntase a alternativa de que os nenos coman antes que os adultos para que, unha vez que rematen, poidan saír xogar e os pais queden no interior saboreando con calma o menú. Noutros casos, todos os asistentes séntanse na mesa xuntos e comparten mantel. Este pode ser un bo momento para que os nenos vaian aprendendo as normas de educación á hora de comer e saiban cómo deben se comportar. 

Zonas de ocio

Hai restaurantes que incluso contan cunha zona con xoguetes, onde tamén se lles acostuma ofrecer papel e pinturas e hainos con grandes encerados que se comparten para debuxar. En determinados estabelecementos incluso pódese atopar un servizo de gardería. Polo xeral, os restaurantes máis demandados polos pais acostuman ser aqueles que contan con bambáns no exterior e zonas axardinadas lonxe do tráfico rodado, que lles permitan aos nenos se mover en liberdade e sen perigos. Neste sentido, pode ser unha boa idea achegarse ata algún restaurante rural ou algunha antiga pousada restaurada, locais situados en zonas verdes onde os nenos poden xogar ás súas anchas e que lles sirvan aos maiores para gozar do entorno.

Unha alternativa que conta con gran demanda adoitan ser os restaurantes de comida rápida, facilmente recoñecíbeis polos nenos polos seus característicos carteis. O menú infantil está composto por un prato principal a elixir entre diferentes propostas, unha sobremesa que xeralmente acostuma ser un xeado ou un batido e un refresco. Cada menú leva consigo un agasallo. Porén, trátase dunha comida altamente calórica e rica en graxas que non resulta conveniente para o organismo máis que de vez en cando. Conscientes disto, cada vez é máis frecuente encontrar locais nos que se introducen as ensaladas e outros pratos máis saudábeis como o polo asado.

Artigos relacionados:
-Como organizar unha festa infantil