Repsol YPF

Elixir un lugar onde pasar unha agradable velada ao acubillo dun bo prato de comida é, nestes momentos, todo un reto. O abano de posibilidades abrangue desde a máis tradicional das receitas asturianas, ata uns picantes tacos mexicanos, pasando polo olor a mozzarella dos restaurantes italianos. En medio desta apertura aos novos sabores irrompe o Teppanyaki, un fragmento da cociña xaponesa no que a destreza do chef e os mellores ingredientes se combinan para crear unha sa receita.

A palabra “teppanyaki” derívase do “teppan”, que significa “prancha de aceiro” e “yaki”, que significa “á grella”. Este estilo culinario xaponés, que emprega unha prancha de aceiro para cociñar, está pisando forte e conseguindo a aprobación dos padais máis esixentes. Para aqueles que pensen que a cociña xaponesa só se nutre dos shushi, shashimi ou nori, deben actualizar o concepto da carta nipona, onde unha inxente forma de cociñar vén determinada pola utilización do lume.

O espectáculo está servido

Unha inmensa prancha conforma a mesa Teppanyaki, onde os asistentes se sentan arredor da mesma e contemplan como se prepara o seu prato, entre a calor da placa de aceiro e os malabares dos expertos cociñeiros xaponeses. Optar polo Teppanyaki non é só apostar por unha sa forma de preparar vexetais e carnes, senón que ademais se trata de todo un espectáculo, onde a pericia do cociñeiro deixa a máis dun coa boca aberta, e non precisamente de fame. Os áxiles dedos dos mestres xaponeses sacan partido ao xogo de coitelos, cun curioso repertorio de movementos malabares, para entretemento dos asistentes. 

Os que decidan dar unha oportunidade a esta dieta nipona tamén poderán ver como os habilidosos chef  cortan un ovo no ar e o esparexan co coitelo, arroxan anacos de camarón co peto da camisa na boca dos comensais, ou amorean aros de cebola en forma de montaña e lles prenden lume, creando un volcán flamante.

Ingredientes máis comúns

A calor da prancha bríndalle un sabor moi natural aos ingredientes empregados, que son,  principalmente, carne de res ou polo, milanesa, peixes e vexetais. O bisté non pode faltar nesta forma de cociñar, onde as verduras, cortadas de forma moi fina, saltéanse para converterse no perfecto acompañante dun prato lixeiro, saboroso e moi saudable.

Fungos, xudías, pementos, ceboliñas, bambú e berenxena son os vexetais máis usados nos menús do Teppanyaki, nos que a carne pode ser substituída por peixe. Con frecuencia tamén pasan pola prancha camaróns, lumbrigantes, lagostinos e gambas, para crearlles máis opcións aos diferentes gustos do padal.

O arroz, cocido ou frito, nunca falta entre as ofertas xaponesas, e aquí non podía ser menos. Entre unha gran variedade de carnes e ricas verduras tamén hai oco para este coñecido produto oriental, que dota aínda de máis sabor a oferta xaponesa. Tipicamente, a salsa de soia é utilizada para cociñar estes ingredientes. En Xapón, moitos restaurantes ofrecen carne de Kobe, que é moi apreciada no mundo dos gourmets.

Teppanyaki significa abrir a porta a unha nova forma de cociñar, libre de graxas, onde a fusión do mellor sabor e as receitas máis sas crean o equilibrio perfecto, acorde coa mellor filosofía oriental. Trátase dunha aposta segura á hora de conquistar padais.
 

Artigos relacionados:

- Delicias orientais

- Multiespazos, a última tendencia