Repsol YPF

 
A orixe do melón sitúase en Africa e na India, aínda que serán os gregos e, especialmente, os sibaritas romanos os que o estenderán por todos os recunchos do Imperio. Tratábase dunha froita substanciosa pero insípida que precisaba o aderezo do sal
e da pementa.
 
Tipos de melóns
Os primeiros melóns doces proceden de Armenia e foron cultivados polos monxes en Cantalupo (Italia) e aínda hoxe existe unha variedade que leva este nome e se caracteriza pola súa forma redondeada, unha pel listada de verde e unha polpa alaranxada moi doce e aromática. De tamaño e forma parecido ao anterior é o melón Galia, de codia verde amarelenta e recuberta de estrías tipo palla. A súa carne é branca, doce e moi aromática. O melón estival por excelencia é o da variedade pel de sapo, de forma ovalada e pel rugosa verde escuro. Destaca a súa polpa branca, doce, substanciosa e moi saborosa. E tamén o melón de mel, de pel dourada e fragrante.
 
O acerto na elección dun melón é un misterio. É certo que hai que escoller os duros e pesados con respecto á súa medida, achegalos ao nariz para detectar o seu aroma. O rabo debe desprenderse con facilidade e, a pesar de todas estas precaucións, encomendarse aos deuses dos cultivos de secaño para que o que promete unha doce
e substanciosa polpa non resulte un insulso cogombro. Porque o punto de maduración no momento da recolleita é vital xa que o que non madura na rama non madurará máis tarde xa que precisa o sol para que os seus hidratos de carbono se transformen en azucre.
 
Se ao abrir o melón este non ten sabor, máis vale empregalo inmediatamente en forma de crema fría, acompañado de xamón serrano e dunhas cotas de oporto, incorporalo a unha ensalada de aguacate, mazá e queixo azul ou empregalo como gornición de calquera peixe afumado ou marisco, e teremos un entrante fresco e delicioso. En calquera caso, hai que ter en conta que unha lixeira nube de xenxibre relado, zume de limón ou
lima e xerez poden potenciar o seu sabor.
 
Como comelo
Cando un melón sae bo, o mellor é comelo tal cal sen esquecer de cubrir a superficie con plástico de cociña antes de introducilo de novo no frigorífico xa que se trata dunha froita que absorbe rapidamente os olores dos alimentos que o rodean. O melón admite de bo grao a compañía doutras froitas, de cava e de viños olorosos e doces. Combina de marabilla cos xeados máis diversos e acompañado de zume de limón e mel ou azucre resulta un refrescante picado.
 
O melón emprégase en excelentes compotas e marmeladas, sempre que gusten os sabores moi doces, e é un ingrediente presente en moitos chutneys, unha compota agridoce de orixe india que acompaña de marabilla ás carnes frías.
 
O melón é unha froita moi rica en auga e pouco calorífica, polo que resulta excelente nas dietas de adelgazamento. As pebidas secas son un delicioso aperitivo moi apreciado nos países orientais.