Repsol YPF

A gastronomía vasca está considerada como unha das mellores de toda España pola variedade e calidade dos seus ingredientes. Entre os populares doces vascos atópase a famosa pantxineta, unha torta de follado   rechea con crema de améndoas que se serve temperada. 

Cara a 1915, a pastelería Otaegui de San Sebastián creou esta torta que, co paso dos anos, foi adquirindo gran prestixio, ata se converter nun clásico de gran aceptación.  

En síntese, a pantxineta consiste en dúas pezas circulares de pasta de follado, entre as que se pon unha crema elaborada con ovos, leite, fariña e azucre aromatizado con canela.  

Follado de calidade

O secreto desta receita, ao igual que calquera elaborada a partir de follado, baséase nos seus compoñentes. As pastelerías vascas, desde sempre, manifestaron unha gran preocupación por elaborar un follado de calidade. Para isto hai que empregar tanto manteiga como fariña de boa calidade, que sexa rica en glute.  

Na superficie onde se vaia traballar bótase un pouco de fariña. Dóbrase cada lateral da lámina de follado cara ao centro e estírase cun rolo, repetindo esta operación tres veces. Débese traballar ata conseguir unha masa fina, deixar repousar un pouco e seguir traballando a masa co rolo. 

Unha vez estirado o follado, fanse dous discos finos un duns 25 centímetros de diámetro e outro duns 27. Tamén se poden preparar pantxinetas individuais, duns dez centímetros de diámetro. Para cortar estas circunferencias de follado pódese empregar unha tapa de cazola, pero con coidado de non facer presión porque senón, o follado non subirá. Esta masa redonda colócase sobre unha lámina de papel de enfornar, pínchase cun garfo para que a crema ao ferver non rompa o follado e píntase cunha xema batida con nata. Convén ter coidado de que o ovo non reborde polos bordos do follado, de ser así este non subirá.

A lume suave

Para elaborar a crema comézase mesturando fariña, xemas de ovo, azucre e leite. Por outro lado, cócese outro pouco de leite con vainilla tamén se pode utilizar canela e, cando ferva, bótase sobre a mestura anterior. Déixase cocer a lume suave durante uns cinco minutos, batendo constantemente para que non se pegue. Logo déixase arrefriar, pero convén seguir removendo coas varas para que non se forme unha costra. Se se quere potenciar o seu sabor, pódeselle engadir á crema unhas gotiñas de licor de laranxa. 

Para montar a pantxineta cóbrese unha placa de forno con papel parafinado, colócase encima a circunferencia pequena de follado e encima desta a crema pasteleira, deixando os bordos libres. Estes bordos úntanse cun pouco de auga e encima colócase a circunferencia máis grande, facendo presión sobre os bordos para que se pechen. A superficie píntase cun pouco de ovo batido e bótaselle por riba améndoa picada. A continuación métese no forno, que previamente se queceu a uns 160º, durante uns 40 minutos. Cando se retire, déixase que tempere, e bótaselle azucre glas  e sérvese. 

Ademais de degustarse soa, a pantxineta pódese acompañar de xeado cremoso, nata montada ou chocolate quente. 

Artigos relacionados:

- Crêpes, recheas de calquera cousa

- Sobremesas italianas... na túa casa