Repsol YPF

Desde sempre considerouse a ameixa como un alimento de alto valor nutritivo, deliciosa e moi saborosa. Existen diversas variedades. Poden ser amarelas (ácidas e de abundante zume), vermellas (algo máis doces), negras (as que habitualmente se empregan para cocer) ou ameixas Raíña Claudia, nome imposto en honra a Claudia de Francia, que se caracterizan pola súa dozura e a súa carne firme e grosa. 

As mellores son as que se compran maduras e frescas. Estes zumarentos froitos, cubertos dunha fina pel onde se atopan a maioría das súas propiedades. Conteñen unha alta porcentaxe de minerais como o ferro, calcio, magnesio, potasio (axuda a eliminar a retención de líquidos) e sodio e un importante contido en vitaminas. Por esta razón, acostúmaselles recomendar a persoas que padecen afeccións renais, cardiocirculatorias, reumáticas ou de artrose. 

Ademais son ricas en hidratos de carbono pero baixas en graxas. As súas propiedades como laxante suave son coñecidas desde moito tempo atrás. As ameixas posúen fibras como a frutosa ou o xofre, que presentan esta característica e a súa inxestión de forma habitual pode contribuír a regular o organismo, pero sen chegar a crear o denominado “colon preguizoso”. Tamén conteñen fibra soluble que axuda a contrarrestar o colesterol en sangue.

Manter a xuventude

Tradicionalmente, as ameixas consideráronse como un alimento que axudaba a previr enfermidades, especialmente na vellez e que contribuía a que o organismo se mantivese en boa forma. Isto débese a que se trata dunha froita rica en vitaminas A e E, dous poderosos antioxidantes. As ameixas pasas, en concreto, poden chegar a presentar ata vinte compostos diferentes moi efectivos contra os radicais libres.

A vitamina A coida da pel, fortalece o sistema inmunitario e protexe a saúde dos ollos, ao previr posibles perdas de visión. Tamén axuda a previr o cancro. En canto á vitamina E, neutraliza a acción dos radicais libres e isto axuda a que a pel se manteña máis nova. Xunto a estas dúas vitaminas, as ameixas tamén conteñen vitaminas do grupo B, que axudan a manter a mente en forma e a regularizar o ritmo cardíaco. 

O outono é unha época do ano na que o mercado ofrece diferentes variedades de ameixas, unha froita que tamén se recomenda para combater os síntomas de estrés ou depresión. Comprobouse que se se inxiren con regularidade contribúese a manter o corpo tranquilo, previndo o nerviosismo e a tensión. 

En gastronomía, ademais de empregarse na elaboración de marmeladas, confeituras e sobremesas, é frecuente atopar as ameixas, xeralmente pasas, acompañando pratos de pasta, pato, coello, guisos de porco ou pasteis de carne pero tamén receitas de peixe como o bacallau. 

Marca de Calidade

A ameixa é un produto moi apreciado en comunidades como A Rioxa. A súa produción comercialízase en diferentes mercados da cornixa cantábrica e Navarra, chega a Barcelona e esténdese ata Bélxica. 

Esta froita pasou a converterse nun referente da zona. De feito, en terras rioxanas celébranse anualmente tres festas relacionadas coa Ameixa Raíña Claudia e a súa promoción: a Festa da Ameixeira en Flor, cara ao mes de abril, coincidindo coa floración das froiteiras do val do Iregua, a Festa da Ameixa Raíña Claudia, que acostuma coincidir co fin da recolección desta froita e a Xornada da Pasa, en vésperas do Nadal, na que se degustan doces, licores e as famosas chocoruelas (pasas bañadas en chocolate).

O último paso foi crear a Marca de Calidade Ciruela Reina Claudia de Nalda y Quel. En xullo de 2007, a cirola de Quel recibiu a marca de calidade e en verán de 2008 esta localidade acolleu por primeira vez, xunto con Nalda, a Festa da Ameixa Raíña Claudia. Ocasión para gozar de licores, xeados e os máis variados produtos elaborados con estas froitas como principais ingredientes. 

Artigos relacionados:

- Sobremesas con froitas