Repsol YPF

Aínda que a súa orixe pode ser xenética, na súa aparición inciden factores como unha dieta rica en graxas e azucre, a inxestión de alcohol e a obesidade.
Como o colesterol, os índices altos de triglicéridos resultan un problema frecuente e teñen nun plan de nutrición axeitado, a mellor medida de prevención e control.

Os triglicéridos son un tipo de lípidos ou graxas que se forman no intestino a partir dos alimentos que consumimos e deben manterse nuns niveis determinados, aínda que non poden ser cero, xa que resultan necesarios para o organismo, que os emprega como fonte de enerxía. Despois da comida, os triglicéridos no sangue elévanse para posteriormente pasar ao tecido adiposo e aos músculos. Unha parte deles é absorbida polo fígado, onde se sintetizan, tras o cal regresan ao torrente sanguíneo en certas doses. O problema xorde cando, despois deste proceso, as súas taxas no sangue son excesivas, superando os 150 miligramos por decilitro de sangue. Ata 199 miligramos considérase un límite alto, mentres que 200 é xa unha taxa de triglicéridos moi elevada. A consecuencia de tales cifras é a aparición de placas de ateroma que se adhiren ás veas e arterias, estreitándoas e podendo provocar accidentes cardiovasculares.

A mellor dieta para frear o problema é sen dúbida a mediterránea, rica en froitas e verduras e pobre en graxas animais e saturadas. O consumo de peixes azuis, presentes tamén nesta dieta, é importante, non tanto porque actúen directamente sobre os triglicéridos, senón porque achegan flexibilidade aos vasos sanguíneos e son vasodilatadores, dúas características que os fan eficaces fronte á placa de ateroma e a formación de trombos. Así contrarrestarán o efecto negativo duns triglicéridos elevados. Outros alimentos beneficiosos son as carnes de ave, como o polo e o pavo, os lácteos desnatados, todas as verduras e todas as froitas, menos os froitos secos e as variedades confeitadas. Tamén hai que limitar o consumo de carnes graxas, alimentos precociñados e produtos ricos en azucre. É mellor optar polos edulcorantes artificiais e esquecer calquera tipo de doce, sexa ou non caseiro. Convén consumir ovos con cautela, e non se exceder co café nin coas bebidas refrescantes, aínda que sexan baixas en calorías. O mesmo se pode dicir de salsas e margarinas deste tipo.

É importante sinalar que o consumo excesivo de glicosa, frutosa ou chocolate e o alcohol, resultan nefastos para o trastorno. Este último, considerado saudábel en doses moderadas, como dous vasos de viño ao día, está contraindicado porque incrementa a produción de triglicéridos no fígado. A obesidade tamén é unha causa directa do problema: está comprobado que na medida na que aumentan os quilos de máis, se incrementan as súas cifras. Por iso, unha dieta equilibrada e hipocalórica para rebaixalos, e o deporte, son hábitos beneficiosos.

Outros factores resultan de máis difícil control, como acontece coa idade: segundo se van cumprindo anos, as taxas de triglicéridos tenden a elevarse. O mesmo sucede se o problema é xenético, é dicir, afecta aos mesmos membros dunha familia. Algúns medicamentos como esteroides e diuréticos poden incidir nas súas taxas, de igual forma que doenzas hepáticas como a cirrose, ou unha diabete mal controlada.