Repsol YPF

En ocasións como as celebracións de Nadal, acostumamos romper coa nosa liña habitual de alimentación e sometemos o organismo a un exceso de alimentación que pode chegar a pasar factura. Coa chegada do ano novo chegan tamén os bos propósitos e un recomendable pode ser seguir unha dieta saudable, que nos axude a recuperarnos da sensación de pesadez que sufrimos ao final de festa.
 
Desde o Instituto Médico Europeo da Obesidade (IMEO) estímase que cada unha destas comidas pode ser equivalente en calorías a dous días de dieta normal. Unha das razóns é que, con frecuencia, se restrinxe a inxestión de comida previa e chégase á mesa cun exceso de fame. A isto haille que sumar o maior consumo de bebidas alcohólicas, que fai que moitas calorías se transformen en graxa corporal; e sen esquecer a falta de actividade propia do período vacacional. A principal consecuencia que deriva de todo isto é o incremento de quilos, que acostuma oscilar a media de tres por persoa.
 
Para recuperarnos destes excesos, os expertos recomendan incrementar a actividade física e seguir unha dieta depurativa baixa en calorías, que nos axude a perder o peso que se colleu nas últimas xornadas. A finalidade das dietas depurativas é limpar o organismo e eliminar toxinas. E consiste en alimentarse exclusivamente de froitas e verduras, ricas en vitaminas e minerais, o que aumenta a función diurética, as ganas de ouriñar e a expulsión de toxinas. Como tamén conteñen moita fibra, incrementan a expulsión de excrementos e impurezas. Porén, non se debe realizar durante máis de tres días seguidos. 

Unha vez conseguidos os resultados que se desexan, o ideal sería manter uns hábitos de comida saudable e realizar exercicio durante todo o ano. 

Elixe ben o que comes

Ante todo, cómpre ter claro que non se trata de restrinxir as comidas de maneira drástica, senón de moderar as racións e evitar o consumo de certos alimentos, substituíndoos por outros máis lixeiros como as verduras, ensaladas e froitas, a poder ser crúas ou pouco cociñadas. Os tomates, espinacas ou pementos, así como as cebolas ou os porros, son ricos en minerais e antioxidantes.  

Algúns alimentos, como os espárragos ou o brócoli, conteñen glutatión, un desintoxicante que te axuda a fortalecer defensas e eliminar toxinas. Outros como a leituga, as endivias ou a lombarda posúen fibra, polo que a súa inxestión proporciona unha maior sensación de saciedade. Dentro do grupo das froitas salienta especialmente a piña, tamén rica en fibra e que practicamente carece de graxa.
 
Outro aspecto a ter en conta é a forma na que cociñas os teus alimentos, xa que non é o mesmo preparalos rebozados que á prancha. Neste sentido, o máis recomendable acostuma sercociñar ao vapor.

Nos teus almorzos podes inxerir zumes de uva, mazá ou limón con azucre integral xunto cun iogur. Nas túas comidas e ceas proba con ensaladas a base de leituga, tomate, apio e cebola, ou sopas de allo, tortillas de espárragos ou pratos elaborados a base de verdura. Tanto a media mañá como a media tarde, podes tomar un pequeno petisco como un iogur ou unha peza de froita. 

Para que o resultado sexa máis efectivo, unha dieta saudable  débese acompañar da práctica de exercicio físico, realizado de forma moderada, sen que nunca chegue a superar a resistencia de cada persoa, xa que se corre perigo de sufrir lesións que tan só servirán para prexudicar o organismo. Iso si, toda aquela persoa que decida pórse a dieta e simultanealo coa práctica deportiva, debería solicitarlles aos expertos en nutrición a elaboración dun estudo nutricional para evitar danos físicos esaxerados. 

Artigos relacionados:

- Adelgaza sen perder a cabeza

- Ensínaos a comer ben