Repsol YPF

Ao longo de todo o ano podes consumir froita cada día, a calquera hora e preparada de moi diversas formas: enteira ou cortada, en ensaladas ou macedonias, e en zumes ou sorbetes. Outro tanto sucede coas verduras e hortalizas, que che permiten preparalas crúas, salteadas e rebozadas. Non obstante, o importante é consumir estes produtos de tempada, que é cando realmente conservan e manteñen todas as súas propiedades.  

Primavera

Coa primavera chegan as fresas, os albaricoques e as cereixas, ademais de espárragos, endivias, coliflores e coles de Bruxelas. Se de peixe se trata, as nosas costas proporciónannos anchoas, pescada, atún, robalizas, mexillóns e centolas, entre outros moitos. 

As Festas da Primavera en Murcia son unha ocasión ideal para degustar a súa espléndida gastronomía, realizada a base de produtos autóctonos. A horta murciana, que se estende ao longo da cunca do Segura, abastece de froitas, legumes e hortalizas cos que elaborar pratos típicos como a ensalada murciana, o zarangollo —un revolto de verduras, feito con ovo, cabaciña e cebola— ou os paparajotes —unha sobremesa popular feita con follas de limoeiro, recubertas cunha masa elaborada a base de fariña e ovo, que logo se friten e se espolvorean con azucre. 

Durante a Semana Santa, a tradición cristiá de non comer carne os venres fixo que xurdan deliciosos guisos de peixe, legumes e verduras. A tradicional potaxe de vixilia elabórase con bacallau , garavanzos e espinacas, aínda que existen algunhas variantes que tamén incorporan xudías brancas e acelgas, ademais doutros tipos de peixe. Tamén son propios destas datas os pratos a base de sopa de allo, lentellas estufadas ou patacas guisadas. 

Verán

O comezo do verán, por San Xoán, arranca nas zonas de costa coa tradición de comer sardiña. Este peixe azul, que pertence ao grupo dos alimentos antioxidantes, é rico en fósforo e calcio, e ten unha carne graxa rica en vitaminas liposolubles, o que o converte nun alimento moi saudable. Para que estean zumarenta se precisamente non perdan esta graxa que lles dá o seu aroma e sabor, o segredo está en non as cociñar demasiado.

Así mesmo, esta é a estación da calor por excelencia, na que a cociña se alixeira para preparar pratos rápidos e frescos, a base de ensaladas e froitas, como melóns e sandías. É o tempo do gazpacho, un dos pratos estrela da tempada, xunto coas cremas e as sopas frías. Tamén é o momento idóneo para preparar pratos vexetarianos lixeiros, arroces, carnes e peixes á prancha, acompañados de gornicións a base de vexetais.

Outono

Coas temperaturas máis suaves do outono, aparecen no mercado produtos como as setas (deliciosas tanto á brasa, crúas e salteadas, utilizadas en máis dunha ocasión como acompañamento doutros pratos), as carnes de caza e, pensando xa no vindeiro inverno, as conservas caseiras. 

En Cataluña celébrase La Castanyada o día de Todos os Santos (31 de outubro), unha festa tradicional na que se consume o froito máis abundante do outono: a castaña. Cómese asada, e acompañada con panellets, patacas doces e froita confeitada. 

Desde o outono ata ben entrada a primavera realízase a recollida manual de alcachofas e, aínda que o inverno é o mellor momento para consumila fresca, podes atopar este produto en conserva durante todo o ano. Todos os anos, a localidade mediterránea de Benicarló celebra no mes de xaneiro a súa tradicional Festa de la Carxofa, na que se ofrece a posibilidade de degustar multitude de pratos elaborados con este produto estrela da súa horta. 

Inverno

Unha vez chegado o inverno, as cociñas énchense de sopas quentes e guisos fumeantes cos que facer fronte ás baixas temperaturas. Pero é nas datas de Nadal cando a gastronomía adquire un protagonismo total. Son días nos que se multiplican as celebracións e aparecen na nosa mesa pratos típicos como o pavo ou o cordeiro. Os turróns e doces son tamén grandes protagonistas e é un bo momento para degustar froitos secos, ricos en graxas e proteínas, ademais de vitamina B e Omega 3, fósforo, magnesio, cobre, calcio e ferro.

A gastronomía española, fiel seguidora da dieta mediterránea, é unha boa escusa para coidarse comendo ao longo do ano. Non abusar das graxas e evitar os excesos son, sen dúbida, a clave para unha alimentación sa e equilibrada en calquera tempada.

Artigos relacionados:

- Dime o que comes e direiche como es

- Cales son os alimentos que prexudican ao teu organismo?A>