Repsol YPF

A árbore do noni é orixinaria da India pero cultívase en rexións tropicais como as illas do Pacífico, a Polinesia, Hawaii ou Porto Rico. Coñecida desde hai varios miles de anos polos antigos nativos, estes empregábana en diversos usos, principalmente como planta medicinal. Porén, ata mediados do século XX foi unha especie máis ben descoñecida.

O seu nome científico é Morinda Citrifolia, unha especie que precisa temperaturas altas, con porcentaxes elevadas de humidade e moito sol. Trátase dun arbusto leñoso que pode chegar a medir ata seis metros de altura. Como curiosidade, cómpre salientar que dá froita todo o ano de xeito gradual, de forma que, nunha mesma póla, pódense atopar nonis verdes xunto a outros xa moi maduros. Cando a froita madura, desprende un aroma moi característico que lembra o cheiro do queixo forte e que serve de repelente contra os paxaros. Por esta razón, o noni tamén se coñece como a “planta do queixo”. 

Propiedades nutricionais

Segundo diferentes estudos científicos, o noni posúe propiedades nutricionais que van máis alá da simple achega de nutrientes, incluso se considera que ten propiedades terapéuticas. Desde 2004 o seu consumo estendeuse por Europa, especialmente no contorno dos produtos naturais,  de dietética e complementos nutricionais.

Atopáronse máis de 150 compostos nutricionais nesta froita que xustifican os seus efectos beneficiosos. Entre eles salientan as antraquinonas, que realizan unha actividade antibacteriana e regulan a dixestión, os fitosteroles, similares ao colesterol, pero de orixe vexetal, que axudan a regular os seus niveis e reducen a absorción deste. Outros compoñentes son os bioflavonoides e o ácido ascórbico, que actúan como antioxidantes, ou as glicopiranosas, que regulan os niveis de azucre e o ácido graxo esencial linoléico, responsable da absorción intestinal, entre outros.

O zume de noni é un antioxidante e rexenerador celular. Contén unha substancia chamada proxeronina, que no organismo é transformada en xeronina, un composto químico fundamental nas diferentes reaccións bioquímicas que se producen no organismo. Sería esta substancia, xunto con outros compoñentes da froita, a que intervén principalmente na capacidade de rexeneración celular que posúe o noni. 

Emprégase como tratamento natural de apoio en casos de alerxias, ou asma, hipertensión, problemas de dixestión, os asociados coa dor (musculares, xaquecas …) e enfermidades como o cancro ou a fibromialxia, entre outros varios. Ademais, reforza o sistema inmunolóxico, axuda a reducir a febre e pódese considerar como un antibiótico natural. 

Tamén en cosmética

O noni destínase tamén a elaborar produtos cosméticos ecolóxicos, desde xabóns faciais ata locións e cremas rexeneradoras para o rostro. Por outra parte, o zume desta froita, aplicado directamente sobre a pel, serve para combater problemas cutáneos como feridas, queimaduras, acne, eccemas, fungos ou picaduras. 

Ao tratarse dunha froita pouco coñecida e dadas as súas peculiares características de maduración, resulta difícil poder acceder directamente ao noni para facer zumes na casa. Así que a única alternativa é adquirilo embotellado. Cando se vaia comprar, hai que ter en conta que todos os zumes de noni non son iguais. É moi importante fixarse na composición. O mellor é aquel que sexa zume de noni puro 100 %, obtido por prensado ou por decantación de froita de noni fermentada, sen auga engadida nin outros zumes, nin tampouco conservantes, que só prexudican a calidade da froita.

Artigos relacionados

- Leite de soia proteínica

- Zumes naturais, preparar e consumir