Repsol YPF

Trátase da segunda parte dunha campaña realizada o ano pasado denominada “Do restaurante a casa” na que  se promovía que o cliente, unha vez finalizada a cea, puidese levarse o viño sobrante a casa e incluso regalábase unha bolsa para poder transportalo con maior comodidade. 

É habitual que nunha comida ou cea haxa alguén que beba pouco e prefira decantarse por outro tipo de bebida, para así evitar que o viño quede sen finalizar. Noutros casos, acostúmase prescindir de pedir unha segunda botella, ante a seguridade de que esta vai quedar inacabada sobre a mesa.   

Para evitar situacións como estas que, unidas ao endurecemento das normas de Tráfico tiveron o seu reflexo no consumo total realizado nos últimos balances anuais, xurdiu a iniciativa de animar os clientes a levarse o viño que sobrase á súa propia casa. 

Clientes reticentes
Esta idea, aquí novidosa, xa se practicaba noutros países como Estados Unidos onde é unha costume estendida que o consumidor poida finalizar no seu domicilio tanto os pratos como a bebida que pediu no restaurante e pola que aboou a correspondente factura. Algo similar púxose en marcha no ano 2004 en Francia, obtendo excelentes resultados. 

Aínda así, a poboación europea en xeral, amósase bastante reticente á hora de solicitar que lle sexa entregado algo que, por costume social, acostuma quedar sobre a mesa para que o persoal do establecemento o recolla. A idea de solicitarlle ao camareiro a botella para levala a casa e saír do establecemento co viño sobrante,  acostuma provocar reaccións de rexeite por parte dos clientes que senten reparos pola imaxe que poidan transmitir. 

Non só os clientes, senón algúns chefs tamén se manifestan totalmente contrarios a unha iniciativa que, na súa opinión, choca radicalmente coas normas establecidas acerca de cómo se debe degustar un caldo que, desta forma, queda exposto a cambios de temperatura e se remove durante o transporte. Na súa opinión, deberían adoptarse outras medidas, como cambiar as medidas das botellas aínda que son conscientes de que isto esixiríalles un gran investimento aos elaboradores de caldos. 

De calquera forma, desde o Consello Regulador da D. O. Rioxa e dentro dun proxecto para promover o consumo responsable de viño, preparou varios miles de bolsas plastificadas en cor negra cun deseño no que se podía ler o lema ‘Goce do viño en casa’. 

Consumo responsable
Agora, a iniciativa vai en dirección contraria. Trátase dunha campaña pioneira en España que, conscientes de que non sempre é fácil encontrar na carta o viño que se prefire, promóvese nesta ocasión que sexa o propio cliente o que achegue a botella do seu viño favorito á mesa no restaurante e sen pagar polo destape. O obxectivo é achegar aos clientes a cultura do viño nun contexto de consumo responsable dieta sa e prezos accesibles. 

De novo hai que mirar fóra do territorio español para atopar países como Inglaterra en cuxos restaurantes se puxo de moda o que os clientes pagasen o destape dunha botella, previamente adquirida noutro establecemento ou incluso traída da súa propia bodega. 

Porén, a proposta do Consello Regulador do Viño de Rioxa vai máis alá porque non se fai ningún cargo ao cliente polo destape do viño e, por suposto, se a botella non se consume por completo, é posible levala de novo a casa. 

Esta experiencia piloto, enmarcada no “Proxecto Rioxa Paixón”, está promovida por Vinos de Rioja e a cadea Fast Food e estará en funcionamento nos restaurantes que posúe en Madrid a partir das 8 da tarde durante todo o mes de outubro. Tan só queda agardar que o proxecto arraigue.

Artigos relacionados:
- Do porco, ata os andares
- Do mar, o mero