Repsol

- Zer dira ADR izenekoak?

ADR siglek American Depositary Receipt adierazten dute (Gordailu Ziurtagiri Amerikarra).

ADR delakoak finantza tresnak dira, atzerriko konpainien akzioak Estatu Batuetako burtsetan ere negozia daitezen sortuak. Akzioak banku baten babesean geratzen dira eta, aipatu tituluak ordezkatzeko, ADRak jaulkitzen ditu. Repsol YPF-ri dagokionez, ADR bat akzio bat da.

- Zein merkatutan kotizatzen dute Repsol YPF-ren akzioek?

Repsol YPF-ren akzioek ondorengo merkatuetan kotizatzen dute:

• Espainiako burtsak: Madril, Bilbo, Bartzelona eta Valentziako burtsak
• Buenos Aireseko Burtsa                

Konpainiaren akzioek merkatu horietako bakoitzean duten bilakaera, baita sektoreko beste enpresa batzuekiko eta burtsako indize ezberdinekiko alderaketa ere, Repsol YPF-ren web orrian eskuragarri dauden denbora errealeko grafikoen bidez ikus daiteke, "Ekonomia eta finantza informazioa" atalean, "Akziodun eta inbertitzaileentzako informazioa" ataletik sartuta.

- Nola jakin dezake akziodun batek Repsol YPF-ren akzioetan egin duen inbertsioaren egungo balioa?

Repsol YPF-ren web orrian akziodunek badute orri erraz bat, "Inbertsioaren egungo balorazioa" atalean, hasierako inbertsioaren datuak sartuta egun zer balio duen jakiteko.

- Zer sinbolo dute Repsol YPF-ren akzioek merkatu ezberdinetan?

Repsol YPF-ren akzioek kotizatzen duten merkatuetako bakoitzean ondorengo sinboloa dute:

• Reuters-en:
  - REP.MC, Madrilgo Burtsako Etengabeko Merkaturako. 

    - REPYY.PK OTCQX merkaturako.

    - REP.BA, Buenos Aireseko Burtsarako.

• > Bloomberg-en:
    - REP SM, Madrilgo Burtsako Etengabeko Merkaturako.
    - REPYY.US OTCQX merkaturako.
•   - REP AR, Buenos Aireseko Burtsarako.                

- Nork du eskubidea Akziodunen Batzar Nagusira joateko?

Batzar Nagusira konpainiako akziodun guztiak joan daitezke, beren akzio kopurua kontuan izan gabe, betiere, akzioak dagokion kontabilitateko erregistroan ongi erregistratuta badituzte bilera baino bost egun aurretik. Era berean, dagokien bertaratze txartela izan behar dute (horiek izaera nominatiboa izan behar dute eta legez dagokien erakundeek jaulki behar dituzte). 

Bertaratze txartelak erregistratzeko epea batzarrarentzat zehaztutako ordua baino bi ordu lehenago hasiko da.

- Akziodunek nola eska ditzakete txostenak edo argibideak Batzar Nagusiko gai zerrendaren inguruan?

Bilera egin aurretik zazpi egun lehenagora arte dute akziodunek Akziodunarentzako Informazio Bulegoaren bidez eta beren egoera egiaztatuz Administrazio Kontseiluari gai zerrendari buruzko beharrezko informazioa edo argibideak eskatzeko edo beharrezkoak iruditzen zaizkien galderak idatziz egiteko. Era berean, azken Batzar Nagusiaz geroztik sozietateak Balore Merkatuaren Batzorde Nazionalari eman ahal izan dion eta publikoak eskuragarri duen informazioaren inguruko argibideak eskatu edo galderak idatziz egin ahal izango dituzte akziodunek. 

Halaber, Batzar Nagusia egiten ari den bitartean, sozietateko akziodunek ahoz eskatu ahal izango dituzte beharrezkoak iruditzen zaizkien argibideak gai zerrendaren inguruan. Ez bada posible une horretan akziodunaren eskubidea asetzea, Administrazio Kontseiluaren eginbeharra izango da informazio hori idatziz ematea eskatu duenari batzarra amaitu eta zazpi egunetara. 

Administrazio Kontseiluak nahitaez eman beharko du eskatutako informazioa; ez, ordea, presidentearen iritziz, eskatutako informazioa publiko egiteak sozietateko interesak kaltetzen baditu. Hala ere, gutxienez kapital sozialaren laurdena osatzen duten akziodunek eskaera babesten dutenean nahitaez eman beharko da informazio hori.

- Ohiko Batzar Nagusiari buruzko zer dokumentazio uzten da akziodunen esku batzarraren aurretik?

Ohiko Batzar Nagusiaren deialdiaren iragarkia argitaratu ondoren, dokumentazio hau uzten da akziodunen esku:

• Batzar Nagusiaren deialdia onartu beharreko hitzarmen proposamenekin batera, eta, beharrezkoak balira, Administrazio Kontseiluaren txostenak, proposamenen arrazoibide eta egokitasunari buruzkoak.
• Repsol YPF, SAren eta bere sozietate filialen urteko kontuak eta kontu finkatuak, baita Repsol YPF, SAren emaitzaren aplikazioaren proposamena (dagokion ekitaldiarena).
• Repsol YPF, SAren kudeaketa txostena eta ekitaldiko kudeaketaren gaineko txosten finkatua.
• Repsol YPF, SAren urteko kontuen eta urteko kontu finkatuen auditoria txostenak.
• Korporazio gobernuen inguruko urteko txostena.
• Erantzukizun Korporatiboaren Txostena.
• Eta nahitaezkoa den bestelako edozer txosten edo Administrazio Kontseiluak erabakitzen duen besteren bat.        

Era berean, deialdiaren osagarria dagoenean, argitaratzen den egunetik kontatzen hasita, sozietateak web orrian argitaratuko du osagarri horrek aipatzen dituen proposamenen testua, betiere, lehenago sozietateari bidali bazaizkio.       

- Non eta nola lor dezake akziodunak informazioa Batzar Nagusiaren aurretik?

 

Batzar Nagusiari buruzko dokumentazio guztia sozietatearen egoitza sozialean (Paseo de la Castellana 278) dagoen Akziodunarentzako Informazio Bulegoan eta web orrialdean eskuratu ahal izango da.

American Depositary Shares-en (ADSs) akziodunak, obligaziodunak edo titularrak direnek dohainik jaso ahal izango dituzte Batzar Nagusiko dokumentuak, Akziodunentzako Informazio Bulegoan eskatzen badituzte.

Era berean, Batzar Nagusia egingo den lekuan eta egun berean, gune zehatzetan akziodunen eskura izango da dokumentazioa.

- Akziodunak nola bidal dezake bere ordezkaria Batzar Nagusira?

Bertaratzeko eskubidea duen akziodunak Batzar Nagusian ordezkaritza eduki ahal izango du beste pertsona baten bidez (azken horrek ez du zertan akziodun izan). Ordezkaritza idatziz eta berariaz batzar bakoitzerako emango da.

Ordezkaritza idatziz edo urrutiko hedabideen bidez eman beharko da, tartean dauden subjektuen identitatea behar bezala bermatuta baldin badago. Horrek guztiak bat egin beharko du legez ezarritako prozedurekin. Ordezkaritza berariaz batzar bakoitzerako eman beharko da. Salbuespen moduan Sozietate Anonimoen Legearen 108. artikuluan zehazten dena dugu. 

Unean uneko indarreko xedapenen arabera eta teknikaren egoeraren arabera, Administrazio Kontseiluak batzar bakoitzerako urrutiko hedabideen bidez ordezkaritza emateko modurik egokiena ezartzen du. Prozedura hori batzarraren deialdian zehaztapen guztiekin azaltzen da.

- Zer baldintza izan behar dira Batzar Nagusia modu egokian eratzeko?

Batzar Nagusia modu egokian egongo da eratuta lehen deialdian akziodunek (akziodunak berak edo ordezkariak) gutxienez boto eskubidedun kapital harpidetuaren % 25 dutenean.

Bigarren deialdian, Batzar Nagusia ongi eratuta egongo da dagoen kapital zenbatekoa dagoela ere.

Ohiko edo Ezohiko Batzar Nagusian obligazio jaulkipenak, kapitalaren haztea edo murriztea, sozietatearen aldaketa, bat egitea, bereizketa edo deuseztapena eta, oro har, sozietatearen estatutuen aldaketa modu egokian adostu ahal izateko beharrezkoa izango da lehen deialdian boto eskubidedun kapital harpidetuaren % 50 bertan izatea (akziodunak berak edo ordezkariak). Bigarren deialdian, nahikoa izango da aipatutako kapitalaren % 25 bertan egotea.

- Noiz hitzartu ahal izango du Batzar Nagusiak modu egokian Sozietatearen Estatutu aldaketa?

Boto eskubidedun kapital harpidetuaren % 50 baino gutxiago ordezkatzen duten akziodunak bertaratzen direnean, sozietatearen estatutuak aldatzeko hitzarmenak modu egokian adostu ahal izateko bertaratutako edo batzarrean ordezkatutako kapitalaren bi herenek aldeko botoa eman behar dute
.

Kasu berezietan, Sozietatearen Estatutuetako 27. artikuluko azken paragrafoa, Batzar Nagusian akziodun bakar batek edo talde berekoak diren sozietateek eman ditzaketen gehienezko botoei buruzkoa, eta Estatutuetako 22. artikuluko azken paragrafoan aipatzen den arau berezi hori aldatzeko akordioak aldatzeko hitzarmenak egin ahal izateko, boto eskubidea duen Batzar Nagusira bertaratutako kapitalaren aldeko botoek % 75 izan behar dute, lehenengo eta bigarren deialdian.

- Nor da Akziodunen Batzar Nagusiko presidente?

Batzar Nagusiko presidente Administrazio Kontseiluko presidentea da. Bera ez bada bertan, presidenteordea izango litzateke presidente, eta bietako inor ez baldin badago, bilerara bertaratu diren bazkideek aukeratutako akzioduna izango da presidente.
Presidenteak idazkaria izango du. Idazkaria Administrazio Kontseiluko bera izango da. Bera ez bada, Administrazio Kontseiluko idazkariordea izango da idazkari eta bera ere ez baldin badago batzarrak berak erabakitzen duen pertsona izango da.

- Akziodunen Batzar Nagusian akziodunek esku har dezakete?

Batzar Nagusian aztertu beharreko ekitaldiari buruzko txostenarekin eta proposamenarekin hasi aurretik eta ekitaldia hobeto antolatuta egon dadin presidenteak akziodunei eskatzen die norbaitek hitza hartu nahi izanez gero Mahaiko laguntzaileari hori adierazteko bertaratze txartela erakutsiz. Hala, esku-hartze txandak antolatuko dira.

Presidenteak ekitaldiko alderdirik esanguratsuenei buruzko azalpena amaitu ondoren akziodunei ematen die hitza (hala eskatu dutenei). Presidenteak gai zerrendaren barnean mantenduko eta zuzenduko du, betiere, eztabaida. Salbuespen moduan dugu Sozietate Anonimoen Legearen Testu Bategineko 131. eta 134. artikuluek zehazten dutena. Presidenteak amaitutzat joko du eztabaida, bere ustez, nahikoa eztabaida izan denean.

- Nola lortu daitezke akordioak Akziodunen Batzar Nagusian?

Boto eskubidedun kapital gehiengoaren aldeko botoa (bertan daudenena eta ordezkariena) behar dute akordioa lortzeko, Legean eta Estatutuetan dauden salbuespenekin.

Akziodun batek edo talde bereko sozietateek Akziodunen Batzar Nagusian eman dezakeen gehienezko boto kopurua bozka eskubidedun kapital sozialaren % 10 izango da.

Xede horretarako talde berean sartzen direla ulertzen da beste erakunde batek kontrolatzen dituzten erakundeak, egun indarrean dagoen 1988ko uztailaren 28ko Balore Merkatuko Legeko 4. artikuluak zehazten duen egoeran. Botoa emateko orduan dagoen muga horrek ez du inolako eragozpenik jartzen etorrerako quoruma zehazteko garaian batzarrean dauden akzioak kontatzeko.

Presidenteak bestelakorik esan ezean, hitzarmenak sinatzeko prozesua deialdian aurreikusitako gai ordenari jarraiki egingo da. Lehenik eta behin, Administrazio Kontseiluak formulatutako hitzarmen proposamenak bozkatuko dira, eta, ondoren, hala balegokio, beste proposatzaile batzuek formulatuak bozkatuko dira, behin-behineko lehentasun ordenari jarraiki. Nolanahi ere, akordio proposamena onartu ostean, automatikoki eroriko dira harekin bateraezinak diren gainontzeko guztiak; horrenbestez, ez da bozkatu beharrik izango. Gai zerrendan agertu gabe Batzordeak konpon ditzakeen gaiei buruzko proposamenak aurkezten badira, presidenteak erabakiko du zer ordenatan bozkatuko diren.

Eskuarki, eta presidenteak aho batez edo eskua altxatuta, edo ordezko beste sistemaren bat erabiliz bozkatzeko erabakia hartzeko duen aukerari kalterik egin gabe, hitzarmen proposamenak ondoko prozedurari jarraituta bozkatuko dira: 

(i) Gai zerrendako gaiei buruzko hitzarmen proposamenak dedukzio negatiboko sistemaren bidez bozkatuko dira. Hala, aldeko boto moduan bertan dauden eta ordezkatutako akzioei dagozkienak ulertuko dira, ondokoak deduzituta: (a) aktan hala jaso dadin, notarioari (egon ezean, idazkariari edota bere laguntzaileari) euren boto edota abstentzio asmoa ezagutzera emanda, aurkako botoa emango dutela edota ez dutela bozkatuko adierazten duten titularren edota ordezkarien akzioei dagozkien botoak, (b) Araudi honen arabera balizkoak diren urrutiko komunikabideen bidez, aurkako botoa emango dutela edota ez dutela bozkatuko espresuki adierazi duten titularren akzioei dagozkien botoak eta (c) hitzarmen proposamena bozkatu aurretik bileratik joan diren eta bilera utzi izana notarioaren aurrean (egon ezean, bilerako idazkariaren edota bere laguntzailearen aurrean) jakinaren gainean utzi duten titularren edota ordezkarien akzioei dagozkien botoak.

(ii) Gai zerrendan ez dauden gaiei buruzko hitzarmen proposamenak dedukzio positiboko sistemaren bidez bozkatuko dira. Hala, aurkako botoak direla ulertuko da bertan dauden eta ordezkatutako akzioei dagozkienak, ondokoak deduzituta: (a) aktan hala jaso dadin, notarioari (egon ezean, idazkariari edota bere laguntzaileari) euren boto edota abstentzio asmoa ezagutzera emanda, aldeko botoa emango dutela edota ez dutela bozkatuko adierazten duten titularren edota ordezkarien akzioei dagozkien botoak eta (b) hitzarmen proposamena bozkatu aurretik bileratik joan diren eta bilera utzi izana notarioaren aurrean (egon ezean, bilerako idazkariaren edota bere laguntzailearen aurrean) jakinaren gainean utzi duten titularren edota ordezkarien akzioei dagozkien botoak.

Aurreko ataletan botoari edo abstentzioari buruz aurreikusten diren notarioaren edo idazkariaren aurreko adierazpen edo jakinarazpen horiek banaka egin daitezke, auzi bakoitzaren inguruko proposamenari lotuta, edo hainbat auziren inguruko botoa batera eman, edo guztiena batera. Horretarako, notarioari bere nortasunaren berri eman beharko dio boto-emaileak, baita akziodun edo ordezkari gisa jarduten ari den argitu, zenbat akzioren gainean duen eragina adierazi, eta zein boto emango duen edo, besterik gabe, ez duela bozkatuko. Notarioa ez badago, batzarreko idazkariari edo haren laguntzaile lanak egiten dituenari eman beharko dio horren guztiaren berri.

Gai zerrendan agertzen ez diren auziei buruzko akordio proposamenen kasuan, ez dira ez bertaratutakotzat ez ordezkatutzat joko ondoko akzioak: Batzarra egin aurretik urrutiko bozketa bideak erabili dituzten akziodunen akzioak. Era berean, Baloreen Merkatuaren Legearen 114.1 artikuluak erreferentzia egiten dien hitzarmenetako bat onartzeko, agindu horretan ezarritakoari jarraiki, bozkatzeko eskubidea gauzatzeko aukerarik ematen ez duten akzioak ere ez dira ulertuko bertan dauden edota ordezkatutako akzio moduan.

- Nola onartzen da Batzar Nagusiko akta?

Batzarraren akta Batzarrak berak onartu ahal izango du Batzarra egin ostean eta, hala egin ezean, presidenteak eta bere bi kontu hartzailek, bata gehiengoaren ordezkaritzan eta bestea gutxiengoarenean, onartuko dute hamabost egunen barruan. Bi modu horietako batean onartutako aktak exekuzio indarra izango du onartzen den egunetik aurrera.

Batzarrean notarioa egon bada, notario akta izango da Batzarreko akta, beraz, ez du onarpenik behar izango.

Ohikoa da Administrazio Kontseiluak, Sozietate Anonimoen Legearen Testu Bategineko 114. artikuluari jarraituz, Batzar Nagusian notarioa egon dadila eskatzea, Batzar Nagusiko akta egin dezan. Era berean, Administrazio Kontseiluak akta egin beharko du gutxienez kapital sozialaren % 1 ordezkatzen duten akziodunek hala eskatzen dutenean.

OHARRA: Emandako erantzunak orientagarriak dira, eta ez dute inolako kalterik eragiten berez guztiz aplikagarria den eta indarrean dagoen araudiarengan (Sozietate Anonimoen Legea, Sozietatearen Estatutuak eta Akzionisten Batzorde Nagusiaren Araudia).

(*) 2010eko apirilaren 30erako zehaztutako Ohiko Batzar Nagusian, gai zerrendako bigarren eta hirugarren puntuetan, Sozietatearen Estatutuetako 22. artikulua eta Batzar Nagusiaren Araudiko 9.2 artikulua aldatzea proposatzen da, artikulu horiek zabaltzeko, merkataritza sozietateen egitura aldaketei buruzko 3/2009 Legeak Sozietate Anonimoen Legearen Testu Bategineko 103. artikuluan gehitutakoak horietan sartuta. Zehazki, honako hauek: (i) akzio berrien lehentasunezko harpidetza eskubidea ezabatzea edo mugatzea; (ii) aktiboa eta pasiboa osorik ematea; eta (iii) egoitza soziala atzerrira eramatea.