Repsol YPF

Menu harrigarriak egiteko aukera ematen dute minutu gutxian. Aukerak izugarri ugariak dira. Arrautza oso ohiko elikagaia da gure mahaietan, ogia eta esnea bezalaxe. Arrautzak makina bat ezaugarri nutritibo bikain biltzen du, eta gainera ederki egiten du bat beste edozein osagairekin.

Proteinak eta bitaminak
Arrautza gorringoz eta zuringoz osatua dago. Gorringoak koipea eta bitaminak (A, B, D eta E) ditu, baina ez du karbono-hidratorik. Zuringoan proteinak daude,
zuringoa baita enbrioiari jaten eman behar dion aldea. Arrautzaren elikagai guztiak aprobetxatu ahal izateko, gutxienez hiru minutuan egosi beharko da. Antzina arrautza gordinak elikagai indargarritzat hartzen baziren ere, egiatan gure organismotik igarotzean batere eraginik ez dute sortzen.

Arrautza freskoa den jakiteko zenbait metodo dago. Metodorik zaharrena argitara begiratzean datza, ea mutur batean duen aire-ganbera ikus daitekeen: zenbat eta aire-ganbera txikiagoa izan, orduan eta freskoagoa izango da. Egoera onean dagoela ziurtatzeko beste modu bat, berriz, zuringo lodia eta gorringoa ondo zentratua duen konprobatzea da. Arrautzak frijitzean edo galdarraztatzean, zuringoa gorringoaren inguruan ondo bilduta geratu beharko da.

Arrautzak prestatzeko makina bat modu
Sukaldean arrautzak hamaika modutan erabil daitezke: olioan frijituak, zuringoaren ertzak kizkurtu arte; plantxan, apur bat koipetutako zartagin lodi batean; egosiak. Uretan irakiten utzi beharra dago, ondo eginak gustatuz gero 10 bat minutuan; arrautza bigunak (mollets) nahiago izatekotan, ordea, nahikoa da 5 minutuan uztea. Azkenik, 3 minutuan utzita uretan pasatutako arrautzak ateratzen dira.

Oso arrautza freskoak dira galdarrazta daitezkeen bakarrak. Horretarako ontzi bat surtan jarri, barruan ur neurri bi eta ozpin neurri bat sarturik. Ura irakiten hasteko unean, aldez aurretik katilu batean kraskatutako arrautzak gehitu beharko dira. Arrautzak mamitzen diren bitartean, zuringoa gorringoaren gainean bilduko da. Ondoren oihal garbi batean xukatzen utziko dira, ertzak ebakiko dira itxura ona izan dezan, eta arrautzak hautatu den errezetaren arabera aterako dira.

Nahaskiek oso arrakasta handia lortzen dute. Arrautzak gatz-apur batekin eta esne-gain edo esne koilarakada batekin irabiatuko dira. Gero arrautzak zartagin edo burruntzali batean Maria bainuan mamituko dira, nahasketari etengabe eraginez pikorrik ez ateratzeko. Mamitzeko bidean daudenean goarnizioa (perretxikoak, hegaluzea, ketuak, urdaiazpikoa, eta abar) ipiniko zaie. Puntuan dagoenean, platerak arin batean aterako dira, bestela zartaginetik ateratakoan oraindik ere mamitzen jarraitzen dute eta.

Tortillak nahaskiak baino are hedatuagoak dira. Askotariko formulak daude, baina, ezbairik gabe, patata-tortilla da ezagunena, olioan egositako patatekin eta arrautzekin egiten dena.
Tortilla frantsesa gure eguneroko menuetan sarriena da, oso bizkor prestatzen baita. Arrautza hutsez egin eta zapi baten moduan tolesten da. Gure gastronomiak eskaintzen dizkigun aukeren artean, tortilla paisana deritzoguna aurki dezakegu, barazkiz eta
urdaiazpikoz edo txorizoz egina; Sacromonte-tortilla Granadako aldaera bat da, eta osagaien artean bildots-garunak sartzen ditu; Badaude beste tortilla batzuk; adibidez, bakailaoz, baratxuriez eta piperrez eginak. Baina arrautzek beste tortilla berezi eta gozo batzuk egiteko aukera ugari ematen dute. Sukaldariaren irudimena beste mugarik ez da izango.